Nọ Jesu o gbe bi wuhrẹ evaọ Judia na, ọ ta kpahe oware jọ nọ ahwo nọ a be gaviezọ kẹe na a rẹ sai wo otoriẹ riẹ lọlọhọ, oyehọ igodẹ gbe uwou-igodẹ. Ọtadhesẹ ọ rọ ta kpahe onana. Ẹsejọhọ ahwo Ju na a kareghẹhọ ẹme nọ Devidi ọ ta inọ: “ỌNOWO họ oriri mẹ, fikiere oja ovo o sae ruọ omẹ hẹ. Ọ rẹ te rehọ ẹbe ọrọrọ kuọ omẹ.” (Olezi 23:1, 2) Devidi ọ jọ olezi ọfa ta kẹ ahwo Ju nọ: “Ma diguẹ obọ aro ỌNOWO, ọnọ ọ ma omai! Keme ọye họ Ọghẹnẹ mai, mai họ ahwo riẹ nọ ọ rẹ kuọ, gbe igodẹ nọ e rọ obọ riẹ.” (Olezi 95:6, 7) Ẹhẹ, u kri no nọ a rọ rehọ emọ Izrẹl nọ e rrọ otọ Uzi na ro dhesẹ igodẹ.

“Igodẹ” nana e rrọ “uwou-igodẹ,” keme a yẹ rai fihọ otọ ọvọ Uzi Mosis na. Uzi na o wọhọ ogba nọ a di wariẹ ae họ, onọ o hẹriẹ e rai no iruemu etọtọ nọ ahwo nọ a rrọ otọ Uzi na ha a bi dhesẹ. Rekọ ahwo Izrẹl jọ a je gboja kẹ uthuru Ọghẹnẹ. Jesu ọ ta nọ: “Uzẹme, uzẹme, mẹ ta kẹ owhai, ọnọ ọ rehọ unu ruọ uwou-igodẹ hẹ rekọ ọ tẹ gadiẹ obọfa jọ, ọyena họ oji gbe owhewheriwhe. Rekọ ọnọ ọ rehọ unu ẹthẹ ruọ eva, ọyena họ othuru igodẹ.”—Jọn 10:1, 2.

Ẹsejọhọ ahwo na a te kareghẹhọ otujọ nọ a jẹ ta nọ ae họ Mesaya hayo Kristi na. Enana e wọhọ iji gbe iwhewheriwhe. U fo nọ ahwo na a re lele otu eviẹhọ itieye na ha. Ukpoye, a re lele “othuru igodẹ” nọ Jesu ọ ta kpahe na, inọ:

“Oriẹthẹ na o re rovie kẹ ọnana, yọ igodẹ na e rẹ kezọ kẹ urru riẹ. O re se igodẹ riẹ odẹ o ve su ae vrẹ. Nọ ọ tẹ rọ igodẹ riẹ kpobi ruọ otafe no, ọ vẹ karo kẹ ae, igodẹ na i ve lele iei keme a riẹ urru riẹ. A re lele ọrara vievie he rekọ a rẹ dhẹ se iẹe ba, keme a riẹ urru erara ha.”—Jọn 10:3-5.

Evaọ oke nọ u kpemu, Jọn Ọhọahwo-Ame na nọ ọ wọhọ oriẹthẹ na, o dhesẹ nọ Jesu họ ọnọ igodẹ na, koyehọ ahwo Ju kpobi nọ a rrọ otọ Uzi na a re lele. Yọ ahwo jọ evaọ Galili gbe otujọ evaọ Judia, oria nọ Jesu ọ rrọ obọnana a vuhu urru riẹ mu no. Kọ diẹse o ti “su ae vrẹ” kpohọ? Kọ irere vẹ a ti wo nọ a bi lele Jesu na? Ẹsejọhọ enọ nana e jọ ahwo jọ nọ a jẹ gaviezọ kẹ ọtadhesẹ Jesu nana udu keme “a wo otoriẹ ẹme nọ ọ jẹ ta kẹ ae na ha.”—Jọn 10:6.

Jesu o ru ẹme na vẹ nọ: “Uzẹme uzẹme mẹ be ta kẹ owhai, mẹ họ unuẹthẹ nọ igodẹ na e rẹ rọ ruọ eva. Enọ e nyaze be ta nọ ae omarai họ omẹ yọ iji gbe iwhewheriwhe; rekọ igodẹ na e gaviezọ kẹ ae he. Mẹ họ unuẹthẹ na; ohwo kpobi nọ ọ rọ ẹkwoma mẹ ruọ eva a ti siwi ei, yọ ohwo yena ọ te sae ruọ eva jẹ ruọ otafe jẹ ruẹ ẹbe nọ ọ rẹ re.”—Jọn 10:7-9.

O rrọ vevẹ nọ oware okpokpọ jọ Jesu o bi wuhrẹ ai na. Enọ e be gaviezọ kẹe na a riẹ nọ ọye họ unuẹthẹ kpohọ ọvọ Uzi na ha, onọ o rrọ anwọ ikpe buobu nọ i kpemu na. Fikiere ẹme nọ Jesu ọ be ta na họ, igodẹ nọ i bi lele iei na, o ti “su ae vrẹ” ruọ uwou-igodẹ ofa. Kọ eme o ti noi ze?

Jesu ọ ta haro kpahe owha-iruo riẹ inọ: “Mẹ nyaze re a ruẹsi wo uzuazọ re a je woi vọvọ. Mẹ họ emamọ othuru-igodẹ na; emamọ othuru-igodẹ na o re siobọno uzuazọ riẹ fiki igodẹ na.” (Jọn 10:10, 11) Evaọ oke nọ u kpemu, Jesu ọ rehọ eme nana tuduhọ ilele riẹ awọ inọ: “Ozọ u mu owhai hi, uthuru okakao, keme o ruọ Ọsẹ rai no inọ ọ rẹ kẹ owhai Uvie na.” (Luk 12:32) Enọ e rrọ “uthuru okakao” na họ enọ Jesu o ti su ruọ uwou-igodẹ okpokpọ na, re a ‘wo uzuazọ je woi vọvọ.’ Oghale riẹ o rro kẹhẹ re ohwo ọ jọ usu uthuru yena.

Rekọ Jesu ọ jọ etẹe ku ẹme na họ họ. Ọ ta haro nọ: “Me wo igodẹ efa, enọ e rrọ uthuru nana ha; mẹ te rehọ eyena ze hrọ re, yọ a te gaviezọ kẹ urru mẹ, a vẹ te jọ uthuru ọvo, evaọ otọ  othuru-igodẹ ọvo.” (Jọn 10:16) “Igodẹ efa” na a “rrọ uthuru nana ha.” Onana u dhesẹ nọ uthuru ofa a rrọ, nọ u wo ohẹriẹ no “uthuru okakao” nọ o te reuku Uvie na. Eko uthuru ivẹ nana a wo ọvuọ ẹruore riẹ. Ghele na, eko ivẹ na a ti wo erere no obọ Jesu ze. Jesu ọ ta nọ: “Oyejabọ nọ Ọsẹ na o ro you omẹ, keme me bi siobọno uzuazọ mẹ.”—Jọn 10:17.

Ibuobu enọ e jọ etẹe a tẹ ta nọ: “Idhivẹri ọ riẹe oma yọ uzou riẹ o gbẹ gba ha.” Rekọ amọfa a dhesẹ nọ a be gaviezọ kẹe yọ a gba riẹ mu nọ a re lele Emamọ Othuru-Igodẹ na. A ta nọ: “Ohwo nọ idhivẹri ọ rrọ oma ọ rẹ ta eme itiena ha. Kọ idhivẹri ọ rẹ sai rovie ibiaro ohwo nọ o tuaro?” (Jọn 10:20, 21) U muẹro nọ a be ta kpahe ọzae nọ a yẹ tuaro nọ Jesu o rovie aro riẹ na.