Yesu byo asapwijilenga mu Yudea, waambile pa kafunga wawama ne bipaka bya mikooko byakwashishe bamutelekelenga kumvwisha. Bino kechi waambanga kwa kubula bishimpi ne. Kampe Bayudea bavulukile byambo byaambile Davida bya kuba’mba: “Yehoba ye Kafunga wami. Kechi nkakajilwa kintu nangwa kimo ne. Undengela kukokolokela mu munyemvu wavula.” (Salamo 23:1, 2) Mu Salamo mukwabo, Davida waambijile bantu amba: “Twayai tufukame ku meso a Yehoba Mulenga wetu. Mambo aye ye Lesa wetu, ne atweba twi bantu banji bo ajiisha.” (Salamo 95:6, 7) Mwayijile mizhilo, bena Isalela bajingatu nobe mikooko.

Ino “mikooko” yajinga mu “kipaka” mambo yasemenwe mu lulayañano lwa Mizhilo ya Mosesa. Mizhilo yajinga nobe nsakwa yaabenye Bayudea kubula kwivwanga mu byubilo bya bantu babujile kwikala mu lulayañano ne Lesa. Pano bena Isalela kechi banemekanga mikooko ya Lesa ne. Yesu waambile’mba: “Kinetu nemwambila namba, awa ubula kutwelela pa kibelo kya kipaka kya mikooko bino ukanjijila pangi, ye ngivi kabiji ye kapondo. Pakuba awa utwelela pa kibelo ye kafunga wa mikooko.”—Yoano 10:1, 2.

Bantu balangulukilenga pa banabalume befwanyikizhenga kwikala Mesiasa nangwa amba Kilishitu. Bano bajinga nobe bangivi kabiji bakapondo. Bantu kechi bafwainwe kulondela bano bantu ba bujimbijimbi ne, bino bafwainwe kulondela “kafunga wa mikooko” waambilepo Yesu amba:

“Ulama kibelo umushinkwilako kabiji mikooko yumvwa jiwi janji. Wita mikooko yanji pa mazhina ne kwiilupwila pangye ya kipaka. Inge wiilupula mikooko yanji yonse pangye, utangilako ne mikooko imulondela, mambo yayuka jiwi janji. Mwenyi kechi ikamulondela ne, bino ikamunyema mambo kechi yayuka jiwi ja benyi ne.”—Yoano 10:3-5.

Yesu saka akyangye kwiya, Yoano Mubatizhi byo ajinga nobe Ulama kibelo walumbulwile kuba’mba Yesu ye bakalondelanga ku mikooko kwesekana na Mizhilo. Kabiji mikooko imo mu Ngalilea ne monkamwa mu Yudea bayukile jiwi ja kwa Yesu. Kwepi ko afwainwe kwiitwala? Kabiji ñanyi kintu kikafumamo inge ke imulondele? Bantu baumvwinenga kino kishimpi bakuminye bingi mambo “kechi bakwatankenye bintu byo ebambijilenga ne.”—Yoano 10:6.

Yesu waambile’mba: “Kinetu nemwambila namba, amiwa nekibelo patwelela mikooko. Aba bonse baiya na kwibepekezha kwikala bakafunga bakine, bo bangivi kabiji bo bakapondo; ne mikooko kechi ibomvwina ne. Amiwa ne kibelo; yense utwela kupichila mwi amiwa ukapuluka, kabiji ukatwela ne kulupuka ne kutaana munyemvu.”—Yoano 10:7-9.

Pa kino kimye Yesu wakebelenga kwamba pa kintu kya katataka. Bamutelekelenga bayukile kuba’mba kechi ye wajinga kibelo ku lulayañano lwa Mizhilo yajingako kala ne. Yesu watazhizhenga mu kuba’mba mikooko yafwainwe kutwela kwingijisha kibelo kikwabo. Ñanyi bintu byafuminemo?

Yesu byo atwajijile kulumbulula mwingilo wanji, waambile’mba: “Amiwa naiya kuba’mba bamone bumi ne kwikala na bumi bwa myaka. Amiwa ne kafunga wawama; kafunga wawama welela mikooko yanji bumi bwanji.” (Yoano 10:10, 11) Pa kimye kitanshi Yesu watundaikile baana banji ba bwanga amba: “Kwakamwa ne, anweba kajitanga kacheche, mambo Shenu wimutongwela kwimupa Bufumu.” (Luka 12:32) Kya kine, aba baji mu kano “kajitanga kacheche” ke boba Yesu bo akatwezha mu kino kipaka kya katataka kabiji bakekala na “bumi bwa myaka.” Ke kintu kyawama bingi kwikala mu jino jitanga.

Bino Yesu wanungilepo amba: “Nji na mikooko ikwabo, yabula ya mu kino kipaka; ino nayo nafwainwa kwiileta, ne ayo ikomvwa jiwi jami, kabiji ikekala jitanga jimo ne kafunga umo.”  (Yoano 10:16) Byo kiji kuba’mba ino “mikooko ikwabo” kechi “ya mu kino kipaka” ne, kwafwainwa kwikala kipaka kikwabo, kupusanako na kino kya ba mu “kajitanga kacheche” bakaswana Bufumu. Abino bipaka bibiji kechi bikekala kuntu kumo ne. Mikooko iji mu bipaka byonse ikamwenamo kimye Yesu kyo akalamanga. Yesu waambile’mba: “O ene mambo Batata o bantemenwa, mambo mpana bumi bwami, kuba’mba nkebutambule jibiji.”—Yoano 10:17.

Bavula mu jibumba baambilenga’mba: “Uno muntu uji na ndemona kabiji wakonya.” Bakwabo nabo bamwesheshenga’mba babena kuteleka kabiji bakebelanga kulondela Kafunga Wawama. Baambile’mba: “Bino kechi byambo bya muntu uji na ndemona ne. Nanchi ndemona wakonsha kulabisha meso a bampofu nyi?” (Yoano 10:20, 21) Bano bantu baambilenga pe Yesu wabukile muntu wasemenwe mpofu.