Patshidi Yezu utungunuka ne kulongesha mu Yudaya, udi mpindieu wakula bua mikoko ne bua bikumbi, bintu bivua bamuteleji bende mua kumvua bipepele. Kadi udi ubalongesha ku diambuluisha dia bilejilu. Bena Yuda bavua mua kuvuluka mêyi a Davidi aa: “Yehowa udi Mulami wanyi. Tshiakupangila tshintu nansha. Udi undadika mu miaba ya kudishila nyama idi ne bisonsa bia bungi.” (Misambu 23:1, 2) Mu musambu mukuabu, Davidi wakalomba bantu ne: “Tutuayi binu kumpala kua Yehowa Mutuenji. Bualu yeye udi Nzambi wetu, Ne tuetu tudi bantu ba mu mpata wende.” (Misambu 95:6, 7) Eyowa munkatshi mua bidimu bia bungi, bavua bafuanyikija bena Isalele bavua muinshi mua Mikenji ne tshisumbu tshia mikoko.

Bena Isalele bavua bu “Mikoko” ivua mu “tshikumbi” mu ngumvuilu wa ne: bavua baledibue muinshi mua tshipungidi tshia Mikenji ya Mose. Mikenji ivua mienze bu tshimanu tshivua tshibatapulula ne bantu bavua benza malu mabi bavua kabayi muinshi mua tshipungidi etshi. Kadi bamue bena Isalele bakakengesha tshisumbu tshia mikoko ya Nzambi. Yezu wakamba ne: “Bulelela, bulelela, ndi nnuambila ne: muntu udi kayi ubuelela ku tshiibi tshia tshikumbi tshia mikoko, kadi ubandila muaba mukuabu, muntu au mmuivi ne mupawudi. Kadi muntu udi ubuelela ku tshiibi mmulami wa mikoko.”​—Yone 10:1, 2.

Bantu bavua mua kuela meji ne: uvua wakula bua muntu yonso uvua udiamba muvuaye Masiya anyi Kristo. Bantu aba bavua bu bivi ne bapawudi. Bantu kabavua ne bua kulonda bena mafi aba to. Kadi bavua ne bua kulonda “mulami wa mikoko” uvua Yezu muambe bualu buende ne:

“Mulami wa ku tshiibi udi umunzuluila tshiibi, ne mikoko idi yumvua dîyi diende. Yeye udi ubikila mikoko yende mu mêna ayi ne udi uyipatula. Padiye upatula mikoko yende yonso, udi uya kumpala kuayi, mikoko idi imulonda, bualu mmimanye dîyi diende. Kayakulonda muenyi nansha kakese, kadi neyimunyeme, bualu ki mmimanye dîyi dia benyi to.”​—Yone 10:3-5.

Kumpala, Yone Mubatiji uvua bu mulami wa ku tshiibi wakajingulula muvua Yezu muntu uvua mikoko ya mu tshimfuanyi ivua muinshi mua Mikenji ne bua kulonda. Imue mikoko ya mu Galela ne ya mu Yudaya yakamanya dîyi dia Yezu. Nkuepi kuvuaye ne bua ‘kuya nayi’? Ntshinyi tshivua mua kuenzeka pavuayi imulonda? Bamue bavua bateleja tshilejilu etshi bavua mua kukema bualu “kabavua bajingulule tshivuaye ubambila to.”​—Yone 10:6.

Yezu wakumvuija ne: “Bulelela, bulelela, ndi nnuambila ne: meme ndi tshiibi bua mikoko. Bantu bonso badi balue pa muaba wanyi mbivi ne bapawudi; kadi mikoko ki mmibateleje to. Meme ndi tshiibi; muntu yonso udi ubuelela kundi, neapandishibue, ne yeye neabuele, neapatuke ne neapete mashinde a kudia.”​—Yone 10:7-9.

Bulelela Yezu uvua uleja bualu bupiabupia. Bateleji bende mbamanye ne: kena tshiibi tshia tshipungidi tshia mikenji tshivuaku kukadi bidimu nkama ya bungi to. Nunku uvua ne bua kuikala wamba ne: mikoko ivuaye ‘upatula’ ivua ne bua kubuela mu tshikumbi tshikuabu. Ntshinyi tshivua ne bua kuenzeka?

Yezu wakumvuija malu a bungi bua mudimu wende wamba ne: “Meme ndi mulue bua bapete muoyo ne bawupete wa bungi. Meme ndi mulami muimpe wa mikoko; mulami muimpe udi ufila muoyo wende bua mikoko.” (Yone 10:10, 11) Yezu ukavua mukankamije bayidi bende kumpala wamba ne: “Kanutshinyi, kasumbu kakese ka mikoko, bualu Tatu wenu mmuanyishe bua kunupesha Bukalenge.” (Luka 12:32) Bulelela, bantu badi benza “kasumbu kakese ka mikoko” mbantu bikala Yezu ne bua kulombola mu tshikumbi tshipiatshipia bua “bapete muoyo ne bawupete wa bungi.” Kuikala mu tshisumbu tshia mikoko etshi ndiakalenga dinene!

Kadi muyuki wa Yezu kawuvua muimanyine apu to. Wakamba ne: “Ndi ne mikoko mikuabu idi kayiyi ya mu tshikumbi etshi; yoyi payi ndi ne bua kulua nayi munda, neyumvue dîyi dianyi, neyilue tshisumbu  tshimue ne mulami umue.” (Yone 10:16) “Mikoko mikuabu” eyi kayena ya mu “tshikumbi etshi” to. Kadi idi ne bua kuikala ya mu tshikumbi tshikuabu tshidi tshishilangane ne “kasumbu kakese ka mikoko” kikala ne bua kupiana Bukalenge. Bikumbi bibidi ebi mbitekemene malu mashilangane. Kadi mikoko ya mu bikumbi bionso bibidi neyipete masanka bua mudimu udi nawu Yezu. Wakamba ne: “Ke bualu kayi Tatu mmunnange, bualu ndi mfila muoyo wanyi.”​—Yone 10:17.

Bantu ba bungi ba mu tshisumbu tshia bantu bakandamuna ne: “Udi ne demon ne mmujimije lungenyi.” Kadi bakuabu bakaleja muvuabu bateleja ne muoyo mujima ne badisuike bua kulonda Mulami Muimpe wa Mikoko. Bakamba ne: “Aa ki mmêyi a muntu udi ne demon to. Demon kena mua kutabeja mêsu a mpofu to, ki mmuomu?” (Yone 10:20, 21) Bushuwa bavua bakula bua muvua Yezu mutabeje mêsu a muntu uvua mulela mpofu kumpala.