Omu Yesu atwalileho lika kunangula vatu muYuleya, avulukile vyamikoko namemba avo vize vatachikijile chikuma vaka-kumwivwilila. Oloze avihanjikile mujila yachifwanyisa. VaYuleya atela vanukile mazu aNdavichi aze ambile ngwenyi: “Yehova ikiye Kafunga kami, kangweshi kukalikiza chuma numba chimweko. Eji kunguutamisanga kuulilo wamwila wachimbete.” (Samu 23:1, 2) Muka-kwimba jisamu weka alwezele muyachi waIsalele ngwenyi: “Tufukamenu kumeso aYehova Tengi yetu. Mwomwo ikiye Kalunga ketu, kaha etu tuvatu vakuulilo wenyi.” (Samu 95:6, 7) Eyo, muJishimbi, vaIsalele vavafwanyishile kuutanga wamikoko putu vene kushikulu.

Ava “mikoko” vanapunga “mulimba lyamikoko” kulumbununa nge vasemukilile mulushiko lwaJishimbi jaMose. Jishimbi japwile nge kembwe yize yahandunwine vaIsalele kuvilinga vyavipi vize valingilenga vatu vaze kavapwile mulushiko kanako. Oloze vaIsalele vamwe vayanjishilenga mikoko jaKalunga. Ngocho Yesu ambile ngwenyi: “Chamuchano vene nangwamba kuli enu ngwami, ou mwazeneka kwingilila kuchikolo hakwingila mulimba lyamikoko, oloze mwanyina nakwingilila kweka, napu mwiji kaha nawa muka-kupupa. Oloze ou mwengilila kuchikolo, ikiye kafunga kamikoko.”—Yowano 10:1, 2.

Vatu pamo vashinganyekele vyavatu vaze valyongele kupwa Meshiya chipwe Kulishitu. Vatu kana vapwile nge veji chipwe vaka-kupupa. Ngocho vatu kavatelele kukavangiza ava vaka-kulyongako. Oloze vatelele kukavangiza “kafunga kamikoko” uze Yesu ahanjikile ngwenyi:

“Muka-kulama kuchikolo mwamusokolwelako, kaha mikoko navevwilila kulizu lyenyi. Mwasanyika mikoko jenyi halijina halijina nakuvalovolamo. Omu mwalinga hanalovola lyehi mikoko jenyi vosena, ikiye himwavatetekela, kaha mikoko navamukavangiza, mwomwo vatachikiza lizu lyenyi. Kaveshi kukavangiza mutu wekako, oloze navamuchina, mwomwo kavatachikiza mazu avatu vekako.”—Yowano 10:3-5.

Hakavanga, Yowano Muka-kumbapachisa, uze apwile nge muka-kulama kuchikolo, avulukile Yesu ngwenyi ikiye vatela kukavangiza kumikoko vachifwanyisa vamuJishimbi. Kaha mikoko vamwe muNgalileya namuYuleya vatachikijile lizu lyaYesu. Uno atelele ‘kuvatetekela’ kulihi? Kaha nganyo muka yafuminemo hakumukavangiza? Vatu vamwe vaze vevwile chifwanyisa kanechi atela valikomokelele mwomwo “kavatachikijile mwalumbunukilile vyuma vize apwile nakuhanjika kuli vakikoko.”—Yowano 10:6.

Yesu alumbunwine ngwenyi: “Chamuchano vene nangwamba kuli enu ngwami, ami yami chikolo chamikoko. Vosena vaze vaneza nakulyongela mulijina lyami, vanapu veji kaha nawa vaka-kupupa. Oloze mikoko kavavevwililileko. Ami yami chikolo. Weshowo mwengilila muli ami navamulwila, kaha mwengilanga nakulovoka nakuwana kuulilo.”—Yowano 10:7-9.

Kufumaho, Yesu avalwezele vyuma vyavihya. Vaka-kumwivwilila vatachikijile ngwavo kapwile chikolo chalushiko lwaJishimbi jize jinelilanga hamyaka yayivuluko. Ngocho apwile nakulumbununa nge mikoko vaze apwile ‘nakutetekela’ vatelele kwingila mulimba lyeka. Uno vyuma muka vyafuminemo?

Yesu atwalileho nakulumbununa milimo yenyi ngwenyi: “Ami nguneza mangana ngwami vapwenga nakuyoya, ngwami vapwenga nakuyoya chakumbwambumuka. Ami yami kafunga wamwenemwene. Kafunga wamwenemwene eji kwechanga mwono wenyi hali mikoko jenyi.” (Yowano 10:10, 11) Hakavanga Yesu avendejekele tumbaji twenyi hakwamba ngwenyi: “Enu utanga wamikoko waundende, kanda namwivwa womako, mwomwo Senu namitongwela kumihana Wangana.” (Luka 12:32) Chikupu vene, vaze vatwama ‘muutanga wamikoko waundende’ vakiko vaze Yesu ali nakutetekela mulimba lyalihya mangana vakahase ‘kupwa nakuyoya, ngwenyi vakapwe nakuyoya  chakumbwambumuka.’ Ocho kutokwa kana vayaya chakupwa muutanga kana!

Chipwe ngocho, Yesu kakuminyinyine aha kahako. Ambile ngwenyi: “Nguli namikoko veka nawa, vaze kaveshi vakulimba linoko. Navakiko nawa ngwatela kuvaneha, kaha navevwililanga kulizu lyami, ngocho navapwanga utanga umwe, nakafunga umwe.” (Yowano 10:16) Ava “mikoko veka” “kaveshi vakulimba linoko.” Oloze vapwa vakulimba lyeka, keshi ‘vamuutanga wamikoko waundende’ vaze navakaswana Wanganako. Awa memba avali amikoko akwechi lutalililo lwakulihandununa. Chipwe ngocho, awa memba avali nawakanganyala kumulimo waYesu. Ambile ngwenyi: “Shikaho anguzangila Tata, mwomwo ami nangwecha mwono wami.”—Yowano 10:17.

Vatu vavavulu vambile ngwavo: “Ali nandemone, nazaluka.” Oloze veka vasolokele nge vapwile nakumwivwilila chikuma nakufwila kumukavangiza ou Kafunga Wamwenemwene. Vambile ngwavo: “Mazu awa kaweshi kuhasa kufuma kuli mutu ali nandemoneko. Uno ndemone mwahasa kutonesa meso akapuputa numba?” (Yowano 10:20, 21) Chasoloka nge vapwile nakutalisa kuli Yesu hakuka mutu uze asemukile kapuputa.