Sama Yesu dhi nyime gi puonjo e alwora mar Judea, otiyo gi ranyisi mayot ma jowinjone ong’eyo maber. En ranyisi mar rombe kod kund rombe. Kata kamano, owuoyo kuomgi e yor ngero. Jo-Yahudi nyalo paro weche ma Daudi nowacho niya: ‘Jehova e jakwadha. Ok anachand gimoro. Omiya nindo e lege mang’ich.’ (Zaburi 23:1, 2) E zaburi machielo, Daudi nonyiso oganda mar Jo-Yahudi kama: ‘Wago chongwa piny nyim Jehova Jachwechwa. Nimar en Nyasachwa, kendo wan ji mag lege, gi rombe mag lwete.’ (Zaburi 95:6, 7) En adier ni chakre chon, Jo-Israel ma ne nie bwo Chik ne ipimo gi kueth mar rombe.

‘Rombego’ osebedo ka gin e “kund rombe.” Tiende ni ne onyuolgi e bwo singruok mar Chik Musa. Chik ne chalo kaka chiel ma geng’ogi kik gidonj e timbe maricho ma ne nyalo miyo chenro mar singruogno okethre. Kata kamano, nitiere Jo-Israel moko ma ne sando kueth Nyasaye. Yesu wacho kama: “Adier, adier, awachonu ni, ng’at ma ok luw dhoot sama odonjo e kund rombe, to oidho kodonjo gi yo machielo, ng’atno en jakuo kendo en jayeko. To ng’at ma luwo dhoot sama odonjo en jakwadh rombe.”​—Johana 10:1, 2.

Nyalo bedo ni Jo-Yahudi tudo ngerono gi jomoko mosega luongore kata mosega kawore ni gin Mesia, tiende ni Kristo. Ging’eyo ni joma kamago chalo gi jokuoge kendo joyeko. Omiyo, ok onego giluwre gi joma wuondore kaka mago. Kar mano, onego giluw “jakwadh rombe” ma Yesu wuoyo kuome.

Yesu wacho e wi “jakwadh rombe” kama: “Jarit-dhoot yawone kendo rombe winjo dwonde. Kae to oluongo rombene owuon gi nyingegi, eka otayogi kogologi oko. Ka osegolo rombe duto ma mage owuon oko, otelo e nyimgi kae to rombego luwo bang’e, nikech ging’eyo dwonde. Ok gibi luwo ng’at ma gikia ngang’, to gibiro ringo ng’atno nikech ok ging’eyo dwond joma gikia.”​—Johana 10:3-5.

Motelo ne mano, Johana Jabatiso ma en kaka jarit-dhoot nowacho ni, rombe manie bwo Chikgo ne dhi luwo Yesu. To rombe moko man Galili kod moko man Judea kae oseng’eyo dwond Yesu. Kata kamano, obiro ‘tayogi’ koterogi kanye? To ang’o ma biro timore ne joma luwe? Moko kuom joma winjo ranyisino nyalo wuoro ahinya nikech ‘ok ging’eyo tiend gik ma owachonegi.’​—Johana 10:6.

Yesu leronegi kama: “Adier, adier, awachonu ni, an e dhoot mar rombe. Ji duto mosebiro kara, gin jokuo kendo joyeko; to rombe osetamore winjogi. An e dhoot; ng’at ma donjo kokalo kuoma, ibiro rese, kendo obiro donjo iye mi owuog oko kendo onwang’ chiemo.”​—Johana 10:7-9.

Nenore maler ni Yesu puonjogi wach manyien. Joma winjo Yesu ong’eyo ni Yesu ok e dhoot ma terogi e singruok mar Chik ma osebedoe kuom higni mang’eny. Omiyo, nyaka bed ni Yesu wacho ni rombe ‘motayo’ biro donjo e kund rombe machielo. To gikone ang’o ma timore?

Yesu medo lero migawo ma en-go kowacho kama: “Asebiro mondo eka giyud ngima kendo mondo giyude mogundho. An e jakwath maber; jakwath maber chiwo ngimane ne rombe.” (Johana 10:10, 11) Motelo ne mano, noyudo Yesu osehoyo jopuonjrene kama: “Un kueth matin, kik ubed maluor nimar Wuonu oseyie miyou Pinyruoth.” (Luka 12:32) Kuom adier, jogo manie “kueth matin” e joma Yesu tayo koterogi e kund rombe manyien, mondo gibi “giyud ngima kendo mondo giyude mogundho.” Mano kaka bedo e kuethno en gueth miwuoro!

 Kata kamano, Yesu ok tiek mbakano gi kanyo. Owacho niya: “An gi rombe mamoko ma ok gin mag kundni; gin bende nyaka akelgi iye, kendo giniwinj dwonda, mi ginibed kueth achiel e bwo jakwath achiel.” (Johana 10:16) “Rombe mamoko” mowuoyoego to “ok gin mag kundni.” Omiyo, nyaka bed ni gin mag kul machielo mopogore gi kul ma “kueth matin” ma biro locho e Pinyruoth nitiere. Joma nie kunde ariyo mag rombego nigi pok mopogore. Kata kamano, rombe manie kunde ariyogo pod biro yudo gueth ma migawo mar Yesu biro kelo. Yesu wacho kama: “Mano e momiyo Wuora ohera, nikech achiwo ngimana.”​—Johana 10:17.

Thoth joma ni ei ogandano wacho kama: “En gi jachien kendo neko omake.” To jomoko ei ogandano chiko itgi maber ka gidwaro luwo Jakwath Maber. Omiyo, giwacho niya: “Magi ok gin weche mag ng’at ma nigi jachien. Be jachien nyalo yawo wenge muofni?” (Johana 10:20, 21) Onge kiawa ni giwuoyo e wi hono ma Yesu nosetimo motelo kane ochango ng’at ma ne muofu chakre nyuolne.