Vaavaa Yesu onatiteleleiye ohusiha o Yuteya, owo onnaloca echu yeeyo alipa oowiriyana awe anaweryaaya wiiwexexa mookhweya—mukukhuli ni mihuwo sa ipucepuche. Nyenya owo onaloca moosiphela. Ayuta ancipale annuupuwela masu a Tavite: “Apwiya ti mukukhuli aka, hiyavo enakirama. Annakitxhùwiha mmakuwani a munyepu.” (Salumu 23:1, 2) Mu salumu mukina, Tavite aahiwopa nloko: “Rwani, nikokhore vatxheyani, niwepese Apwiya anipatunse; ntakhara awo ti Muluku ahu, hiyo nri nloko naya, iputxeputxhe sa muhuwo aya, muhuwo awo anetxihaya.” (Salumu 95:6, 7) Chiryene, Aisarayeli elamuleliwaka ni Nlamulo na Mose awo yaari ntoko muhuwo wa ipucepuche.

“Iputxeputxhe” iha saari mu “muhuwo” yoowo awo yaayariwaayamo ehooleliwaka ni nlakano na Nlamulo na Mose. Nlamulo naari ntoko waaya, aakhapelela orweela wa meerelo ootakhala a achu yahaari mu marehereryo yaala. Aisarayeli akina, yaanahuweliha muhuwo wa Muluku. Yesu aahiloca: “Eparipari txhiryene kinnolèlani: mutxhu ohinavolowa vamulako wa nikhola na iputxeputxhe, nto onatxupha nipuro nikina, yowo ori mpava ni mulipa ònanariha. Nto yowo onavolowa vamulako t’ori mukukhuli a iputxeputxhe.”—Yohani 10:1, 2.

Akhweya achu yaanwuupuwelaka alopwana yiseera okhala Mesiya, naari Kristu. Ala yaahaala okhala ntoko mipava ni mulipa oonanariha. Achu hiyaaphwanela waacharaka alipa wootha si yaala. Moohiyana, awo yaaphwanela omucharaka “mukukhuli a iputxeputxhe,” yoowo Yesu aamulonceiye ariki:

“Mulipeleli onnamuhulela yowo mulako, nave iputxeputxhe sinniwa nsu nawe. Owo onnitxhana iputxeputxhe sawe ni masina aya ni onnakumiherya vate. Amalihà okumiherya vate iputxeputxhe sawe, onnahola nave iputxeputxhe sinnamutxhara, wona wi sosuwela nsu nawe. Nto mutxhu mukina hikamutxhara, ini inammutxhawa ntakhara hisuwenle nsu na atxhu òhisuwanyeya.”—Yohani 10:3-5.

Wuupaceryani, Yohani Mpatisi, ntoko mulipeleli, aahimusuweliha Yesu ntoko yoowo ipucepuche soosiphela saahooleliwa ni Nlamulo saaphwanelaaya omuchara. Nave ipucepuche ikina, o Kalileya ni omoono woolopwana wo Yuteya, saahiwerya osuwela nsu na Yesu. Ti woowi aahaaleiye ‘okumiheryawo’? Nave tuuvi waahaala okhala mphurelo moorweela wa omuchara? Akina anawiriyana niphwanaphwaniho nla akhweya annakoha, nthowa nawi “awo hiyiwale phama etxhu ene alotxeiye.”—Yohani 10:6.

Yesu onnathariha: “Eparipari txhiryene kinnolèlani, miyo kiri mulako wa iputxeputxhe. Othene arwile, miyo kihakunve ophiya, ampava ni alipa ònanarihá. Nto iputxeputxhe hiwiwelenle. Miyo kiri mulako. Yowo oni avolowe wa miyo onanvuluwa: onarwa avolowa ni onamukhuma, nave onamphwanya solya.”—Yohani 10:7-9.

Mweeparipari, Yesu vano onaloca echu evyaani. Oowiriyana awe aasuwela wi owo tahi mulako wa nlakano na Nlamulo, nenlo naakhanle mu iyaakha sincipale muculi. Mwawiihiiha owo aaphwanela oloca wi ipucepuche ‘onakhumiheiye’ sinaya ovolowa mu nikhola nikina na ipucepuche. Ni yookhumelela taani?

Atharihaka mwawooneya murici awe, Yesu onnaloca: “Miyo kirwele wi ikhaleno ekumi nave ekumi yawatxasa. Miyo kamukukhuli aphama. Mukukhuli aphama onnavaha ekumi awe iputxeputxhe sawe.” (Yohani 10:10, 11) Wuupaceryani Yesu aahaahakararya amuhuserya awe mu oloca: “Muhòve, muhuwo mukhani, ntakhara òhasivela  Atithinyu wovahani omwene.” (Luka 12:32) Mwawiihiiha, yaale anapaka makupa a “muhuwo mukhani” ti yaawo Yesu oneereiye aakerihe mu nikhola nivyaani na ipucepuche, wi “ikhaleno ekumi nave ekumi yawatxasa.” Chiri mareeliho mancipale opaka makupa a muhuwo yoola!

Nave Yesu hakwaanxe mwahawe. Owo onnaloca: “Nto kòkhalano iputxeputxhe ikina ihiri nikhola nenla. Kinnaphwanela wetxihatho seiho ni inarwa siwa nsu naka nave onarwa okhala muhuwo mmoha ni mukukhuli mmoharu.” (Yohani 10:16) “Iputxeputxhe ikina” iha ‘hiri nikhola nenla.’ Mwawiihiiha, awo akhweya ari mu nikhola nikina, noohiyana ni “muhuwo mukhani” yaawo eni yaakhele Omwene. Mihuwo seiya miili, naari mikhalelo soopiili sa ipucepuche, arino ewehereryo yoohiyana. Nlelo, mihuwo soomiili sinahaala ophura orweela wa murici wa Yesu. Owo onnaloca: “Vawihiha Atithi annakikhwela ntakhara miyo kinnavaha ekumi aka.”—Yohani 10:17.

Ancipale a vamulokoni annaloca: “Ori ni nsololo, akhala anepa.” Naamwi hiiha akina annooniherya wi awo anawiriyana ni nchuno nave ari oolakelela omuchara Mukukhuli Aphaama. Awo annaloca: “Masu ala hari a mutchu óphariwa nsololo. Mano nsololo ninnawerya omuhulela mitho óhona?” (Yohani 10:20, 21, Nlakano Nahihano) Mwawooneya awo anuupuwela sa openusa woopacerya Yesu aampakenleiye mulopwana aayariwe eevaasi.