Putyina Sesusi atualako okulongesa mo Sundeya, apopi otyipuka tyimwe ovateheleli vae ankho vapondola okunoñgonoka nawa — onongi noviunda. Mahi ankho ukahi nokupopia vala ongeleka. Tyafuile, ova Sundeu avahinangela onondaka mba Daviti, mbati: “Siovaa omunthita wange. Natyike matyinkhambela. Oe undangeka konofika mbeholi liatalala.” (Salmo 23:1, 2) Mo salmu onkhuavo, Daviti akongo elongo, ati: “Tuikilei konongolo kotyipala tya Siovaa una Wetutunga. Mokonda o Huku yetu, iya onthue tuvanthu votyunda tyae.” (Salmo 95:6, 7) Ova Isilayeli pu etyi ankho valandula Ovitumino ankho vapopiwa ngatyina otyunda tyonongi.

Ova Isilayeli “onongi” ankho mbukahi “motyunda,” mokonda ankho vatyitilwa momphango Yovitumino Viapelwe Moisesi. Ovitumino ankho vikahi ngongandyo iveyapula kovanthu vovituwa ovivi, vana ankho vahaendela Movitumino ovio. Mahi, ova Isilayeli vamwe ankho vatekula onya otyunda tya Huku. Sesusi ati: “Ame ndyimupopila otyili okuti, una uhanyingilila pombundi motyinyongo tyonongi, mahi aulula, omunthu oo wati oe otyimphulu oe otyifuanga. Mahi una unyingilila pombundi, omunthu oo, oe omunthita wonongi.” — Suau 10:1, 2.

Ovanthu tyafuile avasoko kovalume ankho velipopia okuti ovo, ovo Mesiya ine ovo Kilisitu. Ovalume ovo ankho vekahi ngovimphulu novifuanga. Ovanthu ankho kavapondola okulandula ovalume ovo. Mahi, ankho vena okulandula “omunthita wonongi,” una Sesusi apopia.

Wati: “Wokuyelula ombundi umuyelulila-po, iya onongi ambuivi ondaka yae. Ngwe aihana onongi mbae komanyina, embulupula-mo. Tyina amembulupula-mo ambuho, ukala komutwe wambo, iya onongi ambumulandula, mokonda mbwii ondaka yae. Kamambulandula omunthu mbehei, mahi mambukemuhateka, mokonda kambwii ondaka yovanthu mbehei.” — Suau 10:3-5.

Omanima amwe konyima, Suau Batisita, wakalele ngomunthu wokuyelula ombundi, alekesa okuti ovanthu vokukahi ngonongi, vaendela Movitumino, vena okulandula Sesusi. Iya vamwe, mo Ngalileya nomo Sundeya, avaimbuka ondaka ya Sesusi. Opi ankho ‘mevetuala’? Iya okumulandula ankho matyieta-tyi? Ovanthu vamwe, ankho vekahi nokutehelela ongeleka oyo, tyafuile ankho velilinga omapulo oo, mokonda ‘kavanoñgonokele etyi ekahi nokuvepopila.’ — Suau 10:6.

Sesusi ahangununa okuti: “Ame ndyimupopila otyili okuti, ame mbundi yonongi. Aveho vana veya okulipaka pomphangu yange, ovimphulu, mahi onongi kambuvetehelela. Ame, ame mbundi; una unyingilila mu ame makayovoka, manyingila alupuka iya avasi okulia.” — Suau 10:7-9.

Sesusi ankho ukahi nokupopia otyipuka tyimwe otyipe. Ovateheleli vae ankho vetyii okuti Sesusi ankho hambundi yomphango Yovitumino, mokonda omphango oyo ankho ikahiko-ale omanima omanyingi. Ngotyo, tyafuile ankho ukahi nokupopia okuti onongi ‘alupula,’ mambunyingila motyunda otyikuavo. Oityi otyo ankho matyietela onongi ombo?

Sesusi apopi vali konthele yotyilinga tyae, ati: “Ame neya opo mukale nomuenyo, amukala nao omunyingi. Ame ndyimunthita omuwa; omunthita omuwa waava omuenyo wae opo ayovole onongi mbae.” (Suau 10:10, 11) Sesusi wapamekele ovalongwa vae etyi evepopila okuti: “Votyunda otyitutu muhakalei nowoma, mokonda Tate yenyi uhanda okumuavela Ouhamba.” (Luka 12:32) Ovanthu “votyunda otyitutu” ovo vana Sesusi ankho matuala motyunda otyipe, opo ‘vakale nomuenyo, avakala nao omunyingi.’ Elao limwe enene okulinga onthele yotyunda otyo!

Mahi Sesusi atualako okupopia konthele yotyo. Ati: ‘Iya ame ndyina onongi ononkhuavo mbehe mbotyunda etyi; nambo ndyina okumbueta, ambutehelela ondaka yange, iya ambukala otyunda tyike vala, tyina omunthita wike vala.’ (Suau 10:16) ‘Onongi ombo ononkhuavo’ ha ‘mbotyunda etyi-ko.’ Ngotyo, votyunda otyikuavo, velikalela no “votyunda otyitutu” mavakapiñgana Ouhamba. Oviunda ovio vivali ine ovinyongo vionongi, ekevelelo liavio lielikalela. Mahi no ngotyo, oviunda ovio vivali mavikamona ouwa mokonda yotyilinga tya Sesusi. Sesusi wati: “Otyo Tate enthyolele, mokonda ndyiava omuenyo wange.” — Suau 10:17.

Ovanthu ovanyingi avati: “Ou una otyilulu, walinga otyova.” Mahi, vakuavo avalekesa okuti vesuka netyi veivite, tupu vahanda okulandula Omunthita Omuwa. Avati: “Ombu ha nondaka mbomunthu una otyilulu. Otyilulu tyipondola okupatula omaiho ovamphoki?” (Suau 10:20, 21) Tyimoneka nawa okuti ankho vekahi nokupopia konthele yomulume omumphoki Sesusi apatulile omaiho.