Legan nin manbabangat si Jesus diad Judea, walay impaimano ton kabkabisado na saray ondedengel​—saray karnero tan pukokan. Inusar to itan bilang ilustrasyon. Nayarin nanonotan na saray Judio may imbaga nen David: “Si Jehova so Pastol ko. Agak onkulang na antokaman. Paparukolen to ak ed saray marikan panagpastolan.” (Salmo 23:1, 2) Diad sananey nin salmo, pinaseseg nen David so interon nasyon: “Ontalimukor tayod arapan nen Jehova a Manamalsa tayo. Ta sikato so Dios tayo, tan sikatayo ray totoon walad panagpastolan to.” (Salmo 95:6, 7) On, abayag lan ikokomparad pulok na karnero iray Israelitan sakop na Ganggan.

Sarayan “karnero” et walad loob na sakey a “pukokan” ta manlapu lad inkiyanak da et sakop la ra na Mosaikon Ganggan a sipanan. Say Ganggan so pinagka-alar a mangibiig ed sikara ed saray totoon mauges so kagagawa ra tan agsakop na satan ya uksoyan. Balet, wala ray Israelitan mamaltratoen day pulok na Dios. Inkuan nen Jesus: “Ibagak ed sikayoy tua, samay onloob ed pukokan na saray karnero ya ag-ondalan ed puerta balet ta onkalab ed sananey a dalan et sakey a matakew tan tulisan. Balet samay ondalan ed puerta et sikatoy managpastol na saray karnero.”​—Juan 10:1, 2.

Nayarin naisip na totoo iramay lalakin ibabaga ran sikara so Mesias odino Kristo. Singa iraya matakew tan tulisan. Agnepeg ya tumboken na totoo irayan impostor. Imbes, say nepeg dan tumboken et say “managpastol na saray karnero.” Oniay imbaga nen Jesus nipaakar ed sayan managpastol:

“Sikatoy lukasan na managbantay na puerta, tan dengelen na saray karnero so boses to. Tawagen tod ngaran iray karnero to tan ipaway to ra. Sano nipaway to lay amin a karnero to, sikatoy onlad unaan da, tan ontumbok irad sikato lapud kabat day boses to. Agda tumboken so sakey ya estranghero noagta ibatikan da, lapud agda kabat so boses na saray estranghero.”​—Juan 10:3-5.

Diad apalabas, impaamta la nen Juan a Managbautismo, say managbantay na puerta, ya si Jesus so nepeg ya tumboken na saray simbolikon karnero ya walad sakop na Ganggan. Tan wala ray simbolikon karnero ed Galilea tan dia ed mismon Judea ya akabidbir ed boses nen Jesus. Iner so ‘pangipawayan tod sikara’? Antoy resulta na itumbok dad sikato? Nayarin mankelaw iray arum ya ondedengel ed sayan ilustrasyon ta “agda atalosan so kabaliksan na saray imbaga tod sikara.”​—Juan 10:6.

Impaliwawa nen Jesus: “Ibagak ed sikayoy tua, siak so puerta parad saray karnero. Amin iramay sinmabi a mangibabagan sikara so tuan managpastol et matatakew tan tulisan; balet agdinmengel ed sikara iray karnero. Siak so puerta; nilaban so siopaman ya onloob ed panamegley ko, tan sikatoy onloob tan ompaway tan makaromog na panagpastolan.”​—Juan 10:7-9.

Malinew ya walay balon ipapaliwawa nen Jesus ed saya. Amta na saray ondedengel ya aliwan sikatoy puertan paonlad Ganggan a sipanan, ya wala lan pigay siglo. No ontan sirin ibabaga ton saray karneron ‘ipaway’ to et onloob ed sananey ya pukokan. Antoy resulta?

Impaliwawa nin maong nen Jesus so betang to: “Linma ak dia pian nawalaan ira na bilay, salanti, andukey a bilay. Siak so maong a managpastol; say maong a managpastol et iter toy bilay to parad saray karnero.” (Juan 10:10, 11) Diad apalabas et niligliwa la nen Jesus iray disipulo to nen imbaga ton: “Agkayo natatakot, melag a pulok, ta inabobonan la na Ama yo so pangiter ed sikayo na Panarian.” (Lucas 12:32) On, saramay kaibad “melag a pulok” so igiya tod balon pukokan, pian “nawalaan ira na bilay, salanti, andukey a bilay.” Talagan bendisyon so magmaliw a kabiangan na satan ya pulok!

Balet agni asumpal ditan so imbaga nen Jesus: “Wala ni ray arum a karnerok, ya anggapo ed sayan pulok; nepeg ko ran awiten met, tan dengelen day boses ko, tan magmaliw iran sakey  a pulok, a walaay sakey a managpastol.” (Juan 10:16) Sarayan ‘arum a karnero’ et “anggapo ed sayan pulok.” Kanian, wala ra sirin ed sananey ya pukokan, dumad saramay “melag a pulok” ya manawir na Panarian. Sarayan duaran pulok odino pukokan na karnero et nandumaay pansumpalan da. Balet siansian pareho iran minabang ed betang nen Jesus. Inkuan to: “Saya so makasengeg ya aaroen ak na Ama, lapud iter ko so bilay ko.”​—Juan 10:17.

Oniay reaksion na dakel ed saray ondedengel: “Sikatoy aselepan na demonyo tan natatapis la.” Balet say arum et madengedengel tan labay dan tumboken so Maong a Managpastol. Imbaga da: “Aliwan oniay panagsalita na toon aselepan na demonyo. Nayarian kasi na demonyo a lukasan iray mata na bulag a totoo?” (Juan 10:20, 21) Malinew ya say tutukoyen da et samay impamaabig nen Jesus ed lakin niyanak a bulag.