Hesus tabata na Hudea ainda siñando e hendenan. Awor, el a kuminsá papia di un tópiko ku su oyentenan por a komprondé fásilmente: karné i kurá di karné. Pero el a papia ku nan pa medio di ilustrashon. Kisas e hudiunan a kòrda riba David, kende a bisa: ‘SEÑOR ta mi Wardador; lo mi no tin falta di nada. E ta pone mi drumi den lugánan di yerba bèrdè.’ (Salmo 23:1, 2) Den un otro salmo, David a animá e nashon pa hasi lo siguiente: “Laga nos hinka rudia dilanti di SEÑOR, esun ku a traha nos. Pasobra e ta nos Dios, i nos ta e pueblo ku e ta pastoriá.” (Salmo 95:6, 7) Sí, pa hopi tempu kaba, e israelitanan kendenan tabata bou di Lei tabata ser kompará ku karné.

Tur e karnénan simbóliko akí tabata den kurá den e sentido ku nan a nase bou di e pakto di e Lei di Moises. E Lei a fungi komo un kurá ku a protehá e israelitanan kontra mal influensia di hende ku no tabata bou di e Lei. No opstante, algun israelita tabata maltratá e tou di Dios. Hesus a bisa: “Di bèrdat bèrdat mi ta bisa boso: Esun ku no drenta e kurá di karné di porta, ma bula drenta di otro kaminda, ta un ladron i un sakiadó. Ma esun ku ta drenta di porta ta e wardadó di karné.”—Huan 10:1, 2.

Kisas loke Hesus a bisa a pone e hendenan pensa riba hòmbernan ku tabata pretendé di ta e Mesías, òf Kristu. E hòmbernan akí tabata manera ladron i sakiadó. E pueblo no mester a sigui guia di e gañadónan ei. Nò, nan mester a sigui “e wardadó di karné,” di kende Hesus a bisa:

“Esun ku ta warda porta ta habri p’e, i e karnénan ta skucha su stèm; e ta yama su karnénan na nan nòmber i ta saka nan hiba pafó di kurá. Ora e saka tur esnan ku ta di dje pafó, e ta bai nan dilanti i e karnénan ta siguié, pasobra nan konosé su stèm. Nan sigur lo no sigui un hende straño; mas bien, nan lo hui for di dje, pasobra nan no konosé e stèm di hende straño.”—Huan 10:3-5.

Mas promé, Huan Boutista, kende tabata manera un wardadó di porta, a identifiká Hesus komo esun ku e karnénan figurativo ku tabata bou di e Lei mester a sigui. Tabatin karné, tantu na Galilea komo einan na Hudea, ku a rekonosé e bos di Hesus. Unda lo el a hiba nan? I kiko esei lo a nifiká pa nan si nan a siguié? Algun di e hendenan ku a skucha Hesus su ilustrashon lo tabatin gana di sa kontesta pa e preguntanan ei pasobra “nan no tabata komprondé kiko e kosnan ku e tabata papia ku nan a nifiká.”—Huan 10:6.

Hesus a bisa nan: “Di bèrdat bèrdat mi ta bisa boso, ami ta e porta pa e karnénan pasa dor di dje. Tur ku a bini na mi lugá ta ladron i sakiadó; ma e karnénan no a skucha nan. Ami ta e porta; ken ku drenta paden via di mi lo haña salbashon, i lo e drenta i sali i haña tereno di yerba pa kome.”—Huan 10:7-9.

Ta bisto ku Hesus tabata introdusiendo algu nobo. Su oyentenan tabata sa ku e no por tabata ke men ku e ta porta di e pakto di Lei pasobra e pakto ei tabata eksistí pa hopi siglo kaba. Pues, Hesus mester tabata referí na un otro kurá ku lo el a hiba su karnénan. Kiko esei lo a nifiká pa e karnénan?

Dunando mas detaye di su papel, Hesus a bisa: “Ami a bini pa nan por haña bida, anto bida na abundansia. Ami ta e bon wardador; e bon wardador ta entregá su alma pa e karnénan.” (Huan 10:10, 11) Mas promé, Hesus a enkurashá su disipelnan, bisando: “No tene miedu, tou chikitu, pasobra boso Tata a haña ta bon pa duna boso e Reino.” (Lukas 12:32) Sí, e personanan ku lo a forma parti di e “tou chikitu”  ta esnan ku Hesus lo a hiba den un kurá nobo pa nan haña “bida na abundansia.” Pues, ta un gran privilegio pa forma parti di e tou ei!

Pero Hesus tabatin mas kos pa bisa. El a bisa: “Mi tin otro karné ku no ta di e kurá akí; nan tambe mi tin ku trese, i nan lo skucha mi stèm, i nan tur lo bira ún tou bou di ún wardadó.” (Huan 10:16) Pues, e ‘otro karnénan’ ku Hesus a papia di dje aki ta di un otro kurá, un kurá diferente for di esun di e “tou chikitu,” kendenan lo heredá e Reino. Maske e karnénan den e dos kuránan akí tin destinashon diferente, nan tur lo benefisiá di Hesus su papel. Hesus a bisa: “E Tata stima mi, pasobra mi ta entregá mi alma.”—Huan 10:17.

Hopi di e hendenan den e multitut a bisa: “E tin demoño, i su kabes no ta bon.” Pero otronan tabata skucha ku atenshon i tabata dispuesto pa sigui e Bon Wardador. Nan a bisa: “Esakinan no ta palabranan di un hende poseí pa demoño. Akaso demoño por laga hende siegu mira?” (Huan 10:20, 21) Evidentemente nan tabata referí na loke Hesus a hasi un poko tempu promé, esta, e echo ku el a kura un hòmber ku a nase siegu.