Jesusqa Judeapi yachachishaspa, ovejasmanta, oveja kanchamantawan parlarqa. Runastaj chayta sumajta entienderqanku. Jesusqa Diospa Leyninta kasukoj israelitasta uj tropa ovejaswan kikincharqa. Chayrayku payta uyarisharqanku chay judiosqa, rey Davidpa nisqantachá yuyarikorqanku. David nerqa: “Tata Diosqa michejniy; ni imata pisichiwanchu. Qʼomer pampaspi michiwan”, nispa (Salmo 23:1, 2). Waj salmopitaj, Davidqa israelitasta kallpachananpaj nerqa: “Qonqorikunachej Tata Diospa ñawpaqempi, imaraykuchus payqa ruwawarqanchej. Paymin Diosninchej, noqanchejtaj ayllun kanchej, qʼomer pampaspi kaj ovejasnin”, nispa (Salmo 95:6, 7).

Leyta kasukoj israelitasqa, Israel nacionpi nacekusqankurayku Diospa “ovejasnin” jina karqanku. Israel nacionmantaj, Diosninchej Leyta qorqa. Chay Leyqa oveja kancha jina karqa, imajtinchus chay nacionpi tiyakojkunata tukuy waj nacionespa costumbresninkumanta jarkʼarqa. Jinapis wakin israelitasqa Diospa ovejasninta sufrichej kanku. Chayrayku Jesusqa nerqa: “Cheqatapuni niykichej: Pichus oveja kanchaman mana punkunta yaykuspa perqa patanta wasaykojqa suwa. Pichus oveja kanchaman punkunta yaykojtaj, chaymá ovejasta michejqa”, nispa (Juan 10:1, 2).

Runasqa chayta uyarispa ichapis yuyarikorqanku, “noqa Mesías kani” nej runasmanta. Jesús nisqanman jinataj, chay runasqa ‘suwas’ karqanku, runasta engañajkunataj. Chayrayku runasqa ‘ovejasta michejpa’ qhepanta rinanku karqa, manataj chay suwa runaspa qhepantachu.

Jesusqa ‘ovejasta michejmanta’ nerqa: “Kancha punkuta qhawajtaj, michejpaj punkuta kicharin. Ovejasqa michejninkoj parlasqanta uyarinku, paytaj ovejasninta sutisninkumanta wajyaspa jawaman orqhon. Tukuy ovejasninta orqhoytawantaj ñaupaqenkuta rin, ovejastaj qhepanta rinku parlasqanta rejsisqankurayku. Mana rejsisqa runaj qhepantarí ni imarayku rinkuchu, astawanqa paymanta ayqerikapunku parlasqanta mana rejsisqankurayku”, nispa (Juan 10:3-5).

Juan Bautistaqa oveja “kancha punkuta qhawaj” jina karqa. Payqa aswan ñaupajtaña Diospa ovejasninman, Jesús ovejasta michej kasqanta rikucherqa. Chayrayku Diospa ovejasnenqa, Jesuspa parlasqanta rejsispa qhepanta rinanku karqa. Galileamanta, Judeamanta wakin runasqa Jesuspa parlasqanta rejserqanku. Jinapis wakin runasqa “imatachus niyta munasqanta mana entienderqankuchu” (Juan 10:6). Chayrayku ichapis nerqanku: “‘Jawaman orqhoytawan’, ¿maymantaj ovejasta pusanri?, ¿imataj paykunapaj kanqari?”, nispa.

Chantá Jesús nerqa: “Cheqatapuni niykichej: Noqaqa ovejas yaykunankupaj punku kani. Tukuy pikunachus llullakuspa sutiypi jamojkunaqa suwas kanku, ovejastajrí paykunata mana uyarinkuchu. Noqaqa punku kani, pillapis noqanejta yaykojqa salvasqa kanqa, payqa yaykonqataj llojsenqataj, qʼomer pastostataj tarenqa”, nispa (Juan 10:7-9).

Jesusqa chayta nispa mosoj imasta yachachisharqa. Payta uyarejkunataj chayta yacharqanku. Jesusqa “ovejas yaykunankupaj punku” karqa. Paynejta yaykojkunataj, mana Leywan ninakoj kanchamanchu yaykorqanku. Jesusqa Diospa ovejasninta ‘jawaman orqhoytawan’ waj kanchaman pusarqa. Imapajchus chayman pusasqanta qhawarina.

Jesús nerqa: “Noqataj jamuni kausayniyoj kanankupaj, wiñaypajtaj kausanankupaj. Noqa sumaj michej kani. Sumaj michejqa kausayninta ovejasninrayku qon”, nispa  (Juan 10:10, 11). Jesusqa aswan ñaupaj kutipiña yachachisqasninta sonqocharinanpaj nerqa: “Juchʼuy tropa ovejasníy, ama manchachikuychejchu, Tataykichejqa Gobiernonta qosunkichejña”, nispa (Lucas 12:32). Jesusqa “juchʼuy tropa” ovejasmanta kajkunata waj kanchaman pusarqa, “kausayniyoj kanankupaj, wiñaypajtaj kausanankupaj”. Chayrayku chay tropa ovejasmanta kajkunaqa may kusisqapunichá kanku.

Chantá Jesús nillarqataj: “Waj ovejas tiyapullawantaj, chaykunataj mana kay kanchamantachu kanku, chaykunatapis pusamunallaytaj tiyan, chay ovejasneyqa parlasqayta uyarenqanku, tukuyninkutaj uj tropalla kanqanku, uj michejniyojllataj kanqanku”, nispa (Juan 10:16). Chay ‘waj ovejasmanta’ kajkunaqa, mana “juchʼuy tropa” ovejaspa kanchankumantachu kanku. Paykunaqa kay jallpʼapi wiñaypaj kausakonqanku. “Juchʼuy tropa” ovejasmanta kajkunatajrí Diospa Gobiernonpi gobernamonqanku. Jesuspa wañuynintaj iskaynin tropa ovejasta yanapan. Chayrayku Jesús nerqa: “Tatayqa munakuwan, imaraykuchus noqa kausayniyta qoni”, nispa (Juan 10:17).

Ashkha runastaj, chayta uyarispa nerqanku: “Supayniyoj kay runaqa, manataj paypichu kashan”, nispa. Jinapis wakenqa, Jesuspa yachachisqanta sumajta uyarerqanku, qhepantataj riyta munarqanku. Chayrayku nerqanku: “Supayniyoj runaqa mana chay imasta parlanmanchu. ¿Imaynatataj uj supay qhawarichinman ciego runastari?”, nispa (Juan 10:20, 21). Chay runasqa chayta nispa nacekusqanmantapacha ciego karqa chay runata Jesús sanoyachisqanmantachá parlasharqanku.