Jesusqa Judëachömi nunakunata yachatsir sïguirqan y tsëchöqa üshakunapaq y ishkë kanchapaqmi parlarqan. Tsëqa juk igualatsikïmi karqan. Itsachi judïukunaqa yarpäyarqan David kënö nishqa kanqanta: “Jehovämi mitsimaqnï. Manam imäpis pishinqatsu. Llullu qewakunachömi punutsiman” (Salmus 23:1, 2). Jina Davidqa kënömi nirqan: “Qonqurikushun Kamamaqnintsik Jehoväpa puntanman. Porqui pëqa Diosnintsikmi y noqantsiknam qewanchö këkaq marka kantsik” (Salmus 95:6, 7). Awmi, israelïtakunataqa juk kanchachö üshakunatawanmi imëpis igualatsiyaq.

‘Kanchachönöqa’ këkäyarqan Diospa Leyninta chaskishqa markachö yurishqa karninmi. Y tsë Leymi cercu cuenta juk nacion nunakunapa mana alli costumbrinkunapita tsapaq. Peru wakin israelïtakunaqa tsë kanchachö Diospa üshankunatam mana allipa tratëkäyarqan. Tsëmi Jesusqa kënö nirqan: “Rasumpa kaqllatam qamkunata niyaq: üsha corralman punkupa mana yëkoq kaq, sinöqa juk lädupa lloqaq kaqqa, suwam y jukkunapa imantapis mälas apakoqmi. Peru punkupa yëkoq kaqqa, üshakunapa mitseqninmi” (Juan 10:1, 2).

Jesus tsënö ninqanqa itsachi tsëchö nunakunata pensatsirqan Diospa akrashqan o Cristu kayanqanta nishqa kaqkunaman. Pëkunaqa imëka suwakoqkunanö y jukkunapa imantapis mälas apakoqkunanömi kayarqan, engañakoq kayaptinmi pëkunataqa qatiyänantsu karqan. Tsëpa rantinqa ‘üshakunapa mitseqnintam’ qatiyänan karqan, y pëpaqmi Jesus kënö nirqan:

“Pëtaqa täpakoqpis punkuta kichapunmi, y qayanqantam üshakunaqa wiyayan. Pëqa jutimpam üshankunata qayan y waqtaman jorqan. Llapan üshankunata waqtaman jorqarirqa, puntankunatam ëwan, y üshakunaqa qepantam ëwayan, porqui imanö qayanqantam reqiyan. Pëkunaqa manam ni imanöpapis mana reqiyanqan nunataqa qatiyanqatsu, antis pëpitaqa escaparmi ëwakuyanqa, porqui mana reqishqa nunakuna qayanqantaqa manam reqiyantsu” (Juan 10:3-5).

Bautizakoq Juanqa unënam ‘punkuta kichaq’ cuenta Jesus mitsikoq kanqanta nishqa karqan, y pëtam israelïtakunaqa üsha cuenta qatiyänan karqan. Galilëachö y Judëachöqa Jesus yachatsikunqanta wiyarirninmi wakinqa pï kanqanta cuentata qokuriyarqan. Peru wakinkunaqa manam entiendiyarqantsu (Juan 10:6). Itsa tsëchi kënö tapunakuyarqan: “¿Mëmantaq pushan?” y “¿imataq qatir sïguiyaptinqa pasanqa?”.

Jesusmi kënö nirqan: “Noqaqa üshakunapaq punkum kä. Noqa tukur shamushqa kaqkunaqa, llapampis suwa y jukkunapa imantapis mälas apakoqmi kayan; peru üshakunaqa pëkunata manam wiyayashqatsu. Noqam punku kä; pipis noqapa yëkoq kaqqa, salvashqam kanqa, y pëqa yëkunqam y yarqunqam, y pastutam tarinqa” (Juan 10:7-9).

Pëkuna mana entiendiyanqantam Jesusqa parlëkarqan. Wiyëkaqkunaqa, conträtu Leyman yëkatsikoq “punku” pë mana kanqantaqa musyayaqmi. Pëqa entienditsikïta munëkarqan, ‘waqtaman jorqanqan’ üshakunaqa juk kanchaman yëkuyänampaq kaqtam. ¿Imapaq?

Jesusqa cargumpitam kënö nir entienditsikurqan: “Noqaqa kawëyoq kayänampaqmi shamurqö, imëyaqpis kawëyoq kayänampaq. Noqaqa alläpa alli kaq mitsikoqmi kä; alläpa alli kaq mitsikoqqa, üshakunarëkurmi kawëninta qon” (Juan 10:10, 11). Puntatapis Jesusqa qateqninkunata kënömi nishqa karqan: “Ama mantsakäyëtsu wallkalla üshakuna, porqui Teytëkikunaqa Gobiernuta qoyäshunëkipaqmi churapukashqa”  (Lücas 12:32). “Wallkalla üshakuna” kaqkunataqa, ‘imëyaqpis kawëyoq kayänampaqmi’ Jesusqa juk mushoq kanchaman pushanqa. ¡Alläpa kushikïpaqmi tsë kanchachö këqa!

Jina kënömi nirqan: “Juk üshäkunapis kapamanmi, pëkunaqa manam kë kanchapitatsu kayan; pëkunatapis kë kanchamanmi pushamushaq, y qayanqätam wiyayanqa, y juk grüpulla y juk mitseqyoqllam kayanqa” (Juan 10:16). Tsë ‘juk üshakunaqa’ manam tsë ‘kanchapitatsu kayan’, juk parlakïchöqa, Diospa Gobiernunta chaskiyänampaq kaq ‘wallkalla üshakunapitaqa’ jukläyam kayan. Jukläya shuyäkïyoq karpis, ishkan grüpukunam Jesuspa mandakoq këninchö bendicionkunata chaskiyanqa. Jesusmi kënö nirqan: “Teytaqa kuyaman, porqui kawënïtam qö, tsënöpa yapë chaskinäpaq” (Juan 10:17).

Tsënam wakinkunaqa, “pëqa supëyoqmi, y löcuyashqam” niyarqan. Peru wakin shumaq wiyakïkaqkunaqa ‘alläpa alli kaq mitsikoqta’ cäsukïta y qatitam munayarqan, tsëmi kënö niyarqan: “Kë ninqankunaqa manam supëyoq nunapitanötsu shamun. ¿Manachi supëqa wiskupa nawinta kachakätsita puëdinmantsu aw?” (Juan 10:20, 21). Itsachi tsënöqa niyarqan, yurikunqampita patsë wisku kashqa nunata kachakätsinqampita.