Pabadi Yesu atungunuka na kulongyesha mu Yudeya, badi mwisambile mwanda ubadi bya’shi bantu abamutemesha beupusha kalolo, mwanda wa mikooko na bikutu byayo. Kadi badi mwiwakule mu lukindji. Beena Yuuda abadi na kya kutentekyesha mayi a Daviide aakula shi: “Yehowa mmulami ande, takwi kintu kyanshii nakyo: andaadisha mu bipya bii bisooswa bibishi.” (Misambo 23:1, 2) Mu ungi musambo, Daviide atekye mwilo shi: Fikai “tukuname kumpala kwa Yehowa mwitupangye. Mwanda aye nyi Efile Mukulu eetu, twi mwilo wakunkusha, kisaka kya nyema kyaakwete kulama.” (Misambo 95:6, 7) Eyendo, beena Isaleele abadi muushi mwa Mwiya abadi bu lombe lwa mikooko.

Yaaya “mikoko” ibadi mu “kikutu” mwanda ibadi itandjibwe mushi mwa kilombeno kya Mwiya wa Moyiise. Miiya ibadi nka bu lupango lubadi alwibabula kwi bantu bashibadi mu yaaya mpango. Anka bangi beena Isaleele namu, abadi balwishe loombe lw’Efile Mukulu. Yesu badi mubangye kwakula shi: “Mbiinyibiinyi, neenulungula bino shi, shyatwelela ku kiibi kya ku kikutu kya mikooko, anka eetumbu bwa kutwelela ku lungi lupese, yaawa ngifi, dingi ntomboshi. Uno naamu atwelela ku kiibi nyi mulami-a-mikooko.”—Yowano 10:1, 2.

Bantu abamonanga bu muntu kwete kwilesha bu Mesiya sunga bu Kidishitu. Abadi nka bu ba ngifi na bantomboshi. Bantu tababadi na kya kulonda baba bantu nya. Anka abadya kulonda “mulami a mikooko” kwete kulesha Yesu pa kwakula shi:

“Nsaamo amushitwila, na mikooko ayiteemesha eyi dyaye, ayitanyina mikooko yaaye yooso mu mashina aayo, kubapu atuukye nayo. Paapu kwiyituusha yooso, akidi kumpala kwaayo, ayo naamu ayimulondo, mwanda ayiwuku eyi dyaaye. Taayilondo muntu aishyaiyuuku, bikishekishe ayimusuuku, mwanda taaiwuku eyi dya bantu beenyi.”—Yowano 10:3-5.

Kumpala, Yowano Mubatshishi badi bu nsaamo, batundwile Yesu bu yawa ababadi na kya kulonda kwi yaaya mikooko ya mu kinfwanyi ya Mwiya. Na ingi mikooko mu Ngalileya na mu Yudeya ibadi itundule eyi dya Yesu. Badi na kya ‘kwiyikunkusha’ kunyi? Na mbipeta kinyi bibadya kutuuka pa kumulonda? Bangi abapushishe luno lukindji abadi na kya kwialashena mwanda: “tababadi bashinguule kibakyebanga kwamba.”—Yowano 10:6.

Yesu badi mupatuule shi: “Binyibinyi neenulungula bino shi, ami nee kiibi kya mikooko. Booso, babafikile kumpala kwande, mbangifi, dingi mbatomboshi, anka mikooko tayibadi iibateemeshe nya. Nee kiibi, su muntu atwela kwandji, apashiibwa. Atwele atuukye, apete na kyakudya.”—Yowano 10:7-9.

Kushii mpaka, Yesu bakwile mwanda upya. Bantu abadi abamutemesha abaukanga shi Yesu tabadi kiibi kya kipwano kya Mwiya kibadi kwanka takudi nkama ya bipwa nya. Binobino badi akula shi mikooko ibadi ‘akunkusha’ ibadya kutwela mu lungi lupango. Bibatushishe kipeta kinyi?

Yesu badi mupatuule kalolo mudimo waye pa kwakula shi: “Ami nee mufikye bwa shi bantu bapete muwa, beeupete ufiime. Ami nee mulami eebuwa, mulami a mikooko eebuwa apaanaa muwa waye bwa mikooko yaaye.” (Yowano 10:10, 11) Yesu bapwile kunyingisha balongi baye kumpala shi: “Lekaayi kutshiina, anwe lombe lupeela, mwanda Nsheenu ee na muloo wa kwinupa Bufumu.” (Luka 12:32) Byabya, baba be mu “lombe lupeela” mbano babakakunkusha kwi Yesu mu kikutu kipya bwa shi “bapete muwa, beeupete ufiime.” Nyi mmwabi ukata wa kwikala mu lwalwa lombe!

Yesu tabadi mwimikye mwanda waye paapa nya. Bakwile shi: “Nee na ingi mikooko ishii ya mu kino kikutu, dingi yaaya dimo, abitungu neeyikunkusha, aiteemesha eyi dyande, byabya  akukeekala lombe lumunenka na mulami umune.” (Yowano 10:16) Ino “ingi mikooko” tangikale “ya mu kino kikutu” nya. Byabya, i na kya kwikala ya mu kingi kikutu kishi mumune na “lombe lupeela” alukapyana Bufumu. Bino bisaka bibidi sunga mikooko bi na nkulupilo ilekeene. Anka, bisaka byoso bibidi abikapete bukwashi bwa mudimo wa Yesu. Bambile shi: “Yaaya mmufule, mwanda napaana muwa wande bwa kwiwatuula kunyima.”—Yowano 10:17.

Bebungi mu kibumbu abakwile shi: “Mukwatshiibwe kwi bikudi bibi, mushimishe kinangu.” Bangi naamu abalesheshe shi bakwete kumuteemesha na kitshibilo kya kulonda Mulami Eebuwa. Abadi abakula shi: “Byabya ta mbishima bya muntu mukwatshiibwe kwi kikudi kibi nya. Kikudi kibi nkilombene kubuula meeso a mpofu su?” (Yowano 10:20, 21) Abadi abakula pabitale kilengyeleshi kibakitshine Yesu kumpala pa kubuula muntu mutandjikwe mpofu meeso.