Ciindi Jesu naazumanana kuyiisya mu Judaya, waamba makani ngobakonzya kweezyeezya kakunyina buyumuyumu aabo bamuswiilide—makani aajatikizya mbelele alimwi azyaanda zyambelele. Pele aawa ukozyanisya buya. Kweelede kuti ba Juda balaayeeyede majwi aa Davida aakuti: “Jehova Mweembezi wangu. Kunyina ncondiyoobula pe. Ulandilazika mumacelelo aamweemvwe.” (Intembauzyo 23:1, 2) Sintembauzyo aumbi wakatamba cisi kuti: “Atufwugame kumbele lya Jehova Mubumbi wesu. Nkaambo ngo Leza wesu, alimwi swebo tuli bantu bamumacelelo aakwe.” (Intembauzyo 95:6, 7) Ncobeni, kwaciindi cilamfwu bana Israyeli ibakali kweendelezyegwa aa Mulawo bakali kukozyanisyigwa kubutanga bwambelele.

“Mbelele” eezyi zyakali “mucaanda cambelele” mukuti bakazyalilwa mucizuminano ca Mulawo wa Musa. Mulawo wakali mbuli lukwakwa, wakali kubaandaanya kumicito iisofwaazya yabantu ibatakali mububambe oobu. Pele bana Israyeli bamwi bakali kupenzya butanga bwa Leza. Aboobo, Jesu waamba kuti: “Ncobeni ndimwaambila masimpe kuti, ooyo uutanjili mucaanda cambelele kwiinda kumulyango, pele uutanta akunjilila kumbi, muntu ooyo mubbi alimwi ngusikusaala. Pele ooyo uunjilila kumulyango ngomweembezi wambelele.”—Johane 10:1, 2.

Bantu balakonzya kuyeeya baalumi bamwi ibali kulyaamba kuti mbambabo Mesiya, naa Kristo. Aaba bali mbuli babbi alimwi abasikusaala. Bantu tabeelede kubatobela basilweeno aabo. Pele beelede kutobela “mweembezi wambelele,” ooyo Jesu ngwaamba kuti:

“Imulindizi wamulyango ulamujalwida, eelyo imbelele zilaliswiilila jwi lyakwe. Ulaziita mbelele zyakwe amazina aanzizyo akuzisolweda kuya anze. Amana kuzigusya mbelele zyakwe zyoonse, ulazisolweda, eelyo zilamutobela nkaambo zililizyi jwi lyakwe. Imweenzu kunyina nozimutobela naaceya, pele zilamutija nkaambo tazilizyi ijwi lyabeenzu.”—Johane 10:3-5.

Kumatalikilo, Johane Mubbapatizi, ooyo iwakali mbuli mulindizi wamulyango, wakaamba kuti Jesu ngonguwe ngozyeelede kutobela mbelele eezyo zyacikozyanyo izyeendelezyegwa aa Mulawo. Alimwi mbelele zimwi, mu Galilaya alimwi amomuno mu Judaya, zyalizyiba jwi lya Jesu. Ino lino Jesu ‘ulazisolweda anze’ kuya kuli? Alimwi ino ncinzi citiicitike akaambo kakumutobela? Kuboneka kuti bamwi ibamvwa cikozyanyo eeci bakopana, nkaambo ‘tiibacimvwisya ncabaambila.’—Johane 10:6.

Jesu wapandulula kuti: “Ncobeni ndimwaambila masimpe kuti, Ndili mulyango wambelele. Boonse ibakaboola mubusena bwangu kabalyaamba kuti ndime, mbabbi alimwi mbaasikusaala; pele mbelele tiizyakabaswiilila. Ndili mulyango; kufwumbwa uunjila kwiinda mulindime uyoofwutulwa, alimwi unoonjila akuzwa akujana macelelo.”—Johane 10:7-9.

Cilisalede kuti aawa Jesu waamba cintu cipya. Baswiilizi bakwe balizyi kuti walo tali mulyango wacizuminano ca Mulawo, eeco icaliko kwamyaanda yamyaka. Aboobo, upandulula kuti eezyo mbelele ‘nzyasolweda kuya anze’ zyuunka kuyoonjila mucaanda cambelele cimbi. Ino ncinzi citiicitike akaambo kaceeci?

Kazumanana kupandulula mulimo wakwe, Jesu waamba kuti: “Ndakaboolela kuti zibe abuumi akupona buumi butamani. Ndili mweembezi mubotu; mweembezi mubotu utuulila mbelele buumi bwakwe.” (Johane 10:10, 11) Musyule oomu Jesu wakaumbulizyide basikwiiya bakwe kuti: “Mutayoowi, nokatanga kaniini, nkaambo Uso wasala kumupa Bwami.” (Luka 12:32) Masimpe, aabo ibali ‘mukatanga kaniini’ mbambabo aabo Jesu mbayakusololela mucaanda cambelele cipya, kutegwa bakabe “abuumi akupona buumi butamani.” Eelo kaka ncoolwe cipati kuba mukatanga aaka!

Pele Jesu tanaagolela buyo waawo pe. Waamba kuti: “Ndilijisi mbelele zimbi izitali zyamucaanda eeci; azyalo eezyo ndeelede kuzileta alimwi ziyooswiilila jwi lyangu, eelyo ziyooba tanga lyomwe  alimwi zinooli amweembezi omwe.” (Johane 10:16) Eezyi “mbelele zimbi” tazili “zyamucaanda eeci.” Aboobo, zyeelede kuti nzyamucaanda cimbi, iciindene aceeco ‘cakatanga kaniini” kabaabo bayakukona Bwami. Eezyi zyaanda zyobilo zyambelele zijisi bantu bali mbuli mbelele ibajisi bulangizi bwiindene. Nokuba boobo, mbelele zyoonse izili muzyaanda eezyi zyobilo ziyoogwasyigwa kumulimo ngwajisi Jesu. Waamba kuti: “Eeci ncandiyandila Taata, nkaambo ndituula buumi bwangu.”—Johane 10:17.

Banji munkamu baamba kuti: “Unjidwe daimona alimwi ulisondokede.” Pele bamwi batondezya kuti balibikkilide maano ciindi nobamuswiilila alimwi bayanda kutobela Mweembezi Mubotu. Baamba kuti: “Aaya taali majwi aamuntu uunjidwe daimona. Sena daimona lilakonzya kujalula meso aabantu boofwu?” (Johane 10:20, 21) Kuboneka kuti baamba ciindi Jesu musyule oomu naakaponya muntu umwi iwakazyalwa kali moofwu.