Osimbu Yesu a longisa vo Yudea, o lombolola ovina vimue vi kuatisa olonjeveleli viaye oku sokolola lonjanga kolomeme kuenda koviunda. Pole, eye o vangula vupopi wocindekaise. Citava okuti va Yudea va ivaluka olondaka via Daviti viokuti: “Yehova eye ungombo wange, ame si suki. O mekelaisa kovisenge vitalala.” (Osamo 23:1, 2) Ukualosamo ukuavo wa laleka omanu hati: “Tu kekameli kovaso a Yehova, utungi wetu. Momo eye Suku yetu, letu tumanu vaye, o tu lisa lisa, haetu tulomeme vi songuilua leka liaye.” (Osamo 95:6, 7) Va Isareli vana va kasi vemẽhi Liocihandeleko vokuenda kuotembo yalua, va siata oku sokisiwa locunda colomeme.

“Olomeme” viaco vi kasi “vocunda” cimue omo lioku citiwila vemẽhi liocisila Cocihandeleko ca eciwile ku Mose. Ocihandeleko ca kala ndolumbo lu va tepisa kovituwa ka via sungulukile viomanu ka va kaile vemẽhi liocihandeleko caco. Pole, va Isareli vamue va tata lãvi ocunda ca Suku. Kuenje Yesu o popia hati: “Ocili, ndu sapuili siti, wosi ka iñilila pombundi yocunda colomeme pole o tẽhela kumue kuiñi, eye ocimunu haeye ocingumba. Puãi wosi iñilila puvelo eye ungombo wolomeme.”—Yoano 10:1, 2.

Pamue omanu va sokolola kalume vana va enda oku litukola hati Mesiya, ale Kristu. Alume vaco va sokisiwa lovimunu kuenda ovingumba okuti, omanu va sukila oku yuvula oku va kuama. Pole, ovo va sukila oku kuama “ungombo wolomeme” una Yesu a kasi oku lombolola cilo.

Eye o popia hati: “Ukuambundi u yuluila epito, olomeme vi yeva ondaka yaye. Eye o kovonga olomeme viaye kolonduko kuenje o vi tundisa loku vi songuila. Eci opamo viosi viaye, o vi pitila kovaso kuenje olomeme viu kuama, momo via kũlĩha ondaka yaye. Umue wiñi ka viu kuama, viu tila momo ka via kũlĩhĩle ondaka ya vaiñi.”—Yoano 10:3-5.

Vokuenda kuotembo yimue ya pita, Yoano Upapatisi okuti wa sokisiwile ndukuambundi, wa situlula Yesu ndungombo una olomeme viocindekaise vi kasi vemẽhi Liocihandeleko vi sukila oku kuama. Vamue pokati kavo vo Yudea kuenda vo Galilea va limbuka ondaka ya Yesu. Pi eye a ‘vi songuila’? Onima yipi nda veya oku kuata poku u kuama? Citava okuti ava va yeva olusapo luaco va lipula momo “ovo ka va kuatele elomboloko lieci eye a kala oku va sapuila.”—Yoano 10:6.

Kuenje Yesu o popia hati: “Ocili, ndu sapuili siti, ame nduvelo wolomeme. Vosi veya loku litukula vati, ame, ovimunu haivo ovingumba; pole, olomeme ka vi yevi ondaka yavo. Ame nduvelo; wosi iñila vuvelo waco okuti [vokuange,] o popeliwa, iñaila, o tunda tunda kuenje o sanga ulilo.”—Yoano 10:7-9.

Ocili okuti Yesu o kasi oku lombolola ocina cimue cokaliye. Olonjeveleli viaye via kũlĩha okuti eye hayeko epito liocisila Cocihandeleko cina okuti tunde eci ca tumbikiwa pa pita ale anyamo alua. Citava okuti eye o kasi oku popia okuti olomeme a ‘songuila kosamua’ viñila vocunda cikuavo. Onima yipi yiyililako?

Yesu o lombolola ovina vikuavo via kongela vocikele caye poku popia hati: “Ame ndeyilila okuti va kuata omuenyo kuenda okuti omuenyo waco u supoka. Ame ndungombo uwa; ungombo uwa o pesila olomeme omuenyo waye.” (Yoano 10:10, 11) Kepuluvi likuavo Yesu wa lembeleka olondonge viaye hati: “Akacunda, ku ka kuate usumba, momo Isiene wa [panga] oku wĩhi Usoma.” (Luka 12:32) Ava va panga onepa ‘kokacunda,’ vana Yesu a kambata toke kocunda cokaliye, oco va kuate “omuenyo okuti omuenyo waco u supoka.” Esumũlũho limue linene oku panga onepa kocunda caco!

Pole, Yesu handi ka malusula ombangulo yaco. Eye o popia hati: “Ñuete olomeme vikuavo  haviocunda eciko; ovio laviovo ndi vi nena, vi yeva ondaka yange kuenje vi kala vocunda cimuamue lungombo umuamue.” (Yoano 10:16) “Olomeme [viaco] vikuavo” “haviocunda eciko,” via litepa ‘lokacunda’ ka ka piñala Usoma. Oviunda viaco violomeme vi kuete alavoko a litepa. Pole, olomeme vioviunda vivali vi ka kuatisiwa locikele ca Yesu. Eye o popia hati: “Eli olio esunga lieci Isia a ndi solele, momo mesela omuenyo wange.”—Yoano 10:17.

Omanu valua pokati kowiñi va popia vati: “Eye o kuete ondele kuenda wa linga eyui.” Pole vakuavo va lekisa okuti va yongola oku kuama Ungombo Uwa. Kuenje va popia vati: “Olondaka evi haviomunuko o kuete ondele. Ondele hẽ yi tẽla oku patulula ovaso omeke?” (Yoano 10:20, 21) Citava okuti ovo va kasi oku sokolola ocina cimue ca pita ndopo eci Yesu a patulula ulume omeke.