Cusiidiruʼ Jesús ca binni de Judea, ne yanna gúdxibe laacaʼ xiixa ni nabé runibiaʼcaʼ: de dendxuʼ ne de currá. Peru biquiiñebe ni casi ti ejemplu. Zándaca bietenalaʼdxiʼ ca judíu ca diidxaʼ ni guníʼ David: «Jehová nga Pastor stinneʼ. Gastiʼ ziaadxaʼ naa. Rinebe naa ra nuu guixi gaʼ para guiziiladxeʼ» (Salmo 23:1, 2). Ne lu sti salmo, gudxi David guidxi que: «Guzuxíbinu nezalú Jehová, ni bizáʼ laanu, purtiʼ laa nga Dios stinu ne laanu nga xquidxi ra nuu guixi gaʼ stiʼ» (Salmo 95:6, 7). Nga runi, ca israelita ni zinanda Ley, siempre huachaagacabe laacaʼ casi ti grupu de dendxuʼ.

Cumu gúlecabe ndaaniʼ ti guidxi ni nuu xaʼnaʼ pactu stiʼ Ley stiʼ Moisés, ngue runi casi ñaca ñuucabe ndaaniʼ ti currá. Ley que zeeda gácani casi ti «currá» purtiʼ rápani laacabe para cadi chinándacabe ca costumbre ni cadi jneza ni runi xcaadxi binni. Peru cadi galán modo runi tratar caadxi israelita ca dendxuʼ stiʼ Dios. Ngue runi bisiene Jesús: «Dxandíʼ ni chitidxeʼ laatu riʼ, tu qué chuʼ neza ra puertaʼ stiʼ currá ra nuu ca dendxuʼ, sínuque guiuu sti ladu la? gubaanaʼ ne binni qué iquiiñeʼ laa. Peru ni chuʼ neza ra puertaʼ la? ngue nga pastor stiʼ ca dendxuʼ que» (Juan 10:1, 2).

Zándaca guníʼ ique ca binni cucaadiagaʼ Jesús, caniʼbe de ca hombre ni ná naca Mesías o Cristu. Naca ca hombre riʼ casi gubaanaʼ ne binni qué iquiiñeʼ ne cadi caquiiñeʼ chinanda guidxi que laacabe, sínuque naquiiñeʼ chinándacabe «pastor stiʼ ca dendxuʼ» ni bizeeteʼ Jesús ora guníʼ:

«Ruxheleʼ hombre ni rapa ra puertaʼ que guiuu pastor que. Riníʼ pastor que lá ca dendxuʼ stiʼ, runadiágacame stidxi ne ribee laacame. Ora maʼ guleebe guiráʼ ca dendxuʼ stibe, rizanírube lúcame ne rinanda ca dendxuʼ que laabe, purtiʼ runibiáʼcame stídxibe. Qué rinándacame tobi ni qué runibiáʼcame, sínuque ruxooñecame de laa, purtiʼ qué runibiáʼcame stidxi» (Juan 10:3-5).

Beeda gaca Juan Bautista casi ti «hombre ni rapa ra puertaʼ» ora binibiáʼ Jesús casi pastor ni naquiiñeʼ chinanda ca dendxuʼ ni nuu xaʼnaʼ Ley. Caadxi de laacaʼ, casi ca ni nuu ndaaniʼ guidxi Galilea ne Judea maʼ binibiaʼcaʼ stidxi Jesús. Peru nuu xcaadxi ni cadi cayene xii ngue nuube guiniʼbe (Juan 10:6). Ngue runi zándaca guinabadiidxacaʼ: «¿Paraa zinebe laacaʼ ya?» Ne «¿xi zazaaca de laacaʼ pa chinándacaʼ laabe?».

Para guníʼ Jesús: «Dxandíʼ ni chitidxeʼ laatu riʼ, naa nga puertaʼ stiʼ ca dendxuʼ. Guiráʼ ca ni huayeeda ne gudíʼdicaʼ pur naa la? gubaanaʼ ne binni qué iquiiñeʼ laacaʼ, peru qué rucaadiaga ca dendxuʼ laacaʼ. Naa nga puertaʼ; ni guiuu neza ra nuaaʼ la? zalá, ne zanda guiuu ne guiree ne zadxela guixi» (Juan 10:7-9).

Rihuínnica caníʼ Jesús de xiixa nacubi. Nanna ca ni cucaadiagaʼ laabe que cadi laadibe nga «puertaʼ» stiʼ pactu stiʼ Ley ni maʼ ziné gayuaa iza de nuu. Ni nuube guiniʼbe nga, ca dendxuʼ cueebe fuera ziuucaʼ ndaaniʼ sti currá. ¿Xi para yaʼ?

Bizeeteʼ Jesús xi chiguni ora guníʼ: «Naa bendaʼ ti ganda gápatu guendanabani ne guibánitu xadxí. Naa nga pastor chaʼhuiʼ. Ti pastor chaʼhuiʼ la? rudii xpida pur ca dendxuʼ stiʼ» (Juan 10:10, 11). Maca de ante guníʼ Jesús ca diidxaʼ riʼ para cuʼ gana ca discípulo stiʼ: «Cadi guidxíbitu, grupuhuiiniʼ de dendxuʼ, purtiʼ racalaʼdxiʼ Bixhózetu gudii laatu Reinu» (Lucas 12:32). Ziné Jesús ca ni naca parte de «grupuhuiiniʼ de dendxuʼ» ndaaniʼ ti currá nacubi para gápacaʼ guendanabani ne guibánicaʼ para siempre. ¡Pabiáʼ sicarú nga para ca ni naca parte de grupu de dendxuʼ ca!

 Peru laaca guniʼruʼ Jesús: «Napaʼ xcaadxi dendxuʼ ni cadi nuu ndaaniʼ currá riʼ; naquiiñeʼ chicaaʼ laacaʼ ne zunadiágacaʼ stidxeʼ. Zácacaʼ ti grupu si ne zápacaʼ ti pastor si» (Juan 10:16). «Xcaadxi dendxuʼ» riʼ cadi nuucaʼ ndaaniʼ currá ra nuu «grupuhuiiniʼ de dendxuʼ» ni chiguicaa Reinu. Gadxé gadxé ni cabeza cada grupu de dendxuʼ riʼ. Peru zacaa guiropaʼ grupu riʼ ndaayaʼ pur Jesús. Jesús guníʼ: «Nadxii Bixhozeʼ naa pur ndiʼ: purtiʼ cudieeʼ xquendanabaneʼ» (Juan 10:17).

Stale de ca binni que bizulú caniʼcaʼ: «Nuu ti demonio lu cuerpu stibe ne cayaca íquebe». Peru nuu xcaadxi ni caguixhe atención ne cusihuínnicaʼ racaláʼdxicaʼ chinándacaʼ «pastor chaʼhuiʼ» que purtiʼ nacaʼ: «Laaca xa zacá riníʼ tobi ni nuu demonio lu cuerpu stiʼ. ¿Zándaxa guxheleʼ ti demonio lú ti ciegu?» (Juan 10:20, 21). Zándaca guníʼcabe zaqué purtiʼ bietenaláʼdxicabe ora bisianda Jesús ti hombre ni qué ruuyaʼ dede dxi gule.