Yésu a yé i Yérusalem inyu ngand Sai (tole Hanukkah). I ngand ini i yé mbigda mayibil ma témpel inyu ngélé yôhne iba. Iloo mbôgôl i nwii bisu bi ngéda, kiñe i Siria le Antiochus IV Épiphane a bi oñ juu li bisesema i ngii juu li bisesema likeñi li témpel. I mbus ngéda, bon ba prisi i Lôk Yuda yada ba bi tiimba yoñ énél i Yérusalem, ba ti Yéhôva témpel. Ibôdôl ha nyen ba bi bôdôl lôôs i ngand i hiki nwii i hilo 25 hi sôñ Kislev, ipôla mamélél ma sôñ Maye sép ni bibôdle bi sôñ Libuy li nyéé.

Di yé ngéda mbéñ, lihep li yé ngandak. Yésu a yé hiôm ikété témpel, i libebe li Salômô li li gwé ngandak mbiñ. Bôt ba Lôk Yuda ba nkéña nye, ba mbat nye le: “W’a sék bés miñem letee ni ngéda mbe? Ibale u yé Kristô, pahle bés hala.” (Yôhanes 10:22-24) Ndimbhe i Yésu i yé le kii? A nkal bo le: “Me bi kal bé, ndi ni nhémle bé.” Yésu a bi kal bé bo kunda yada le a yé Kristô, kiki a bi kal muda Samaria i bee. (Yôhanes 4:25, 26) Ndi a bi yelel bo njee a yé ngéda a bi kal le: “Ilole Abraham a ngwéé, me bé niñ.”​—Yôhanes 8:58.

Yésu a ngwés le bôt ba nyimbe ni bomede le a yé Kristô mu kiki ba hégha minson nwé ni mam Bitilna bi nkal le Kristô a nlama boñ. Inyu hala, a mbéna kal banigil bé le ba kal bañ mut nye ki nye le a yé Mésia. Ndi nano, a nkal bana bôt ba nkolba nye le: “Minson me yé boñ i jôl li Tata mi mbok mbôgi inyu yem. Ndi ni nhémle bé.”​—Yôhanes 10:25, 26.

Inyuki ba nhémle bé le Yésu a yé Kristô? A nkal bo le: “Ni nhémle bé inyule ni ta bé mintômba nwem. Mintômba nwem mi ñemble kiñ yem, me nyi nwo, mi noñ ki me. Me nti nwo niñ boga, nw’a tjiba bé kekikel; mut to wada a nla bé to kadal nwo i moo mem. I mintômba Tata a bi ti me mi yé nseñ iloo mam mape momasôna.” Nano, Yésu a nkal bo lelaa maada a gwé ni Isañ ma yé bas bas, a nkal le: “Me ni Tata di yé wada.” (Yôhanes 10:26-30) Yésu a yé isi ndi Isañ a yé ngii, jon Yésu a ta bé kal le nye ni Isañ ba yé mut wada. Ndi ba yé wada mu kiki ba nsal ntôñ, inyule ba gwé nlélém njômbi, adna i yé ipôla yap.

Bibuk bi Yésu bi ñunbaha bôt ba Lôk Yuda kayéle ba ntémb ba mbôdôl bada ngok inyu nol nye. Ndi hala a nkônha bé Yésu woñi, a nkal bo le: “Me ñunda bé ngandak minson minlam mi nlôl yak Tata. Ikété minson mi, ni ñumul me ngok inyu umbe?” Ba ntimbhe nye le: “Di ñôm bé we ngok inyu nson nlam, ndi inyule u ñôbôs jôl li Nyambe; inyule . . . u nkadba le u yé nyambe.” (Yôhanes 10:31-33) Kekikel Yésu a kal bé le a yé Djob, ndi inyuki ba ñôm nye nsohi?

Inyu bôt ba Lôk Yuda, Yésu a yé kal le a gwé ngui i boñ mam ba nyi le Djob nyetama nyen a nla boñ. Kiki hihéga, ngéda a bé pôdôl “mintômba,” Yésu a bi kal le: “Me nti nwo niñ boga,” jam bôt ba binam ba nla bé boñ. (Yôhanes 10:28) Lôk Yuda i nhôya le Yésu a bi kal i mbamba le Isañ nyen a bi ti nye kunde i.

Inyu kolba bipôdôl gwap, Yésu a mbat le: “Baa i ta bé ntilga ikété Mbén nan le [i kaat Tjémbi 82:6]: ‘Me bi kal le: “Ni yé banyambe”’? Ibale Nyambe a bi sébél i bôt bañga yé i bi kolba le ‘banyambe’ . . . baa ni nkal me nu Tata a bi téé mpubi, a ep ki i nkoñ isi le: ‘U ñôbôs Nyambe jôl,’ inyule me nkal le: ‘Me yé Man Nyambe’?”​—Yôhanes 10:34-36.

Ñ, yak Bitilna bi nsébél bakéés ba ba yé bôt ba binam le “banyambe.” Jon lelaa bôt ba Lôk Yuda bana ba nla ôm Yésu nsohi inyule a nkal le: “Me yé Man Nyambe”? I mbus, a ñôt mahoñol map i ngii jam li nlama kwés bo nkaa, a nkal bo le: “Ibale me mboñ bé minson mi Tata, ni hémle bañ me. Ndi ibale me mboñ nwo, to ibale  ni nhémle bé me, hémlana minson, le ndi ni pam i yi, ni kônde ki nok le me yé ikété adna ni Tata, yak Tata a yé ikété adna ni me.”​—Yôhanes 10:37, 38.

Kiki ba nok hala, Lôk Yuda i nkahal yéñ manjel i gwel Yésu, ndi a ntémb a so. A nyodi i Yérusalem inyu ke i pes ipe i Lom Yordan, het Yôhanes a bi bôdôl sôble hala a yé bebee le nwii mi-na nano. Bebek homa nu a yé bebee ni nwelmbok i tuye Galiléa.

Mamut ma nlo i boma Yésu. Ma nkal le: “Yôhanes a bi boñ bé yimbne to yada, ndi i mam momasôna a bi pot inyu mut nunu ma bé maliga.” (Yôhanes 10:41) Inyu hala nyen ngandak bôt i Lôk Yuda i nhémle Yésu.