Lobi sian 100 taon naung salpu, dipajongjong Raja Siria Antiokus IV Epipanes ma sada langgatan di bagas joro ni Debata. Di pudian ni ari, dipadenggan angka anak ni malim Jahudi ma Jerusalem jala diresmihon ma bagas joro i gabe inganan manomba Jahowa. Mulai sian i, dibahen ma parningotan tu ari peresmian ni bagas joro ganup tanggal 25 Kislew. Saonari dos ma i tu ujung ni bulan November sahat tu mula ni bulan Desember. Ro do Jesus tu Jerusalem laho mangarayahon Perayaan Pabadiahon bagas joro i.

Musim dingin do tingki perayaan i. Mardalan ma Jesus di emper ni si Salomo na di bagas joro. Ro ma angka halak Jahudi mandapothon ibana mandok, “Sadia leleng nai sungkun-sungkun rohanami bahenonmu? Molo Kristus i do ho, tangkas ma paboa tu hami.” (Johannes 10:22-24) Dialusi Jesus ma, “Nunga hupaboa tu hamu alai ndang porsea hamu.” Ndang hea didok Jesus tu nasida na Kristus do ibana songon na pinaboana tu borua Samaria. (Johannes 4:25, 26) Alai didok ibana do, “Andorang so adong si Abraham, nunga adong ahu.”​—Johannes 8:58.

Dipahombar nasida ma nian angka surirang ni Bibel tu angka ulaonna, asa diboto nasida na ibana do Kristus i. Alani i ma hea didok ibana tu angka siseanna asa unang dipaboa-boa na ibana do Messias. Alai saonari tangkas ma didok ibana tu halak Jahudi, “Angka ulaon na hubahen di bagasan goar ni Damang, i do na paboahon taringot tu ahu. Alai ndang porsea hamu.”​—Johannes 10:25, 26.

Boasa ndang porsea nasida na Kristus do Jesus? Didok Jesus ma, “Ndang porsea hamu, ala ndang biru-birungku hamu. Ditangihon biru-birungku do soarangku, hutanda do nasida, jala diihuthon do ahu. Lehononku do hangoluan na saleleng ni lelengna tu nasida, ndang adong na boi mangago jala mambuat nasida sian ahu. Ummarga do biru-biru na nilehon ni Damang i tu ahu sian saluhutna.” Dung i dipaboa Jesus ma taringot tu parale-aleonna dohot Amana. Didok ma, “Sada do ahu dohot Ama i.” (Johannes 10:26-30) Tingki didok Jesus songon i, di tano on do ibana jala di banua ginjang do amana. Alani i, ndang sarupa ibana dohot amana, alai lomo ni rohana do na sarupa.

Gabe muruk ma halak Jahudi mambege i, jala dibuat ma batu laho mambunu ibana. Alai ndang mabiar Jesus. Didok ma, “Nunga godang hupatuduhon tu hamu ulaon na denggan na sian Damang i. Ulaon na dia do sian angka i na mambahen naeng dangguronmuna ahu?” Dialusi nasida ma, “Ndang alani ulaon na denggan umbahen naeng hudangguri hami ho. Alai ala dileai ho do Debata. . . . dibahen ho do dirim songon debata.” (Johannes 10:31-33) Ndang hea didok Jesus na debata ibana, alai boasa didok nasida songon i?

Tutu, hea do didok Jesus marhuaso ibana songon Debata. Umpamana, didok ibana do, “Lehononku do hangoluan na saleleng ni lelengna” tu angka biru-biru. Hape ndang adong jolma na boi mangalehon i. Didok roha ni halak Jahudi holan Debata do na marhuaso. (Johannes 10:28) Ndang olo halak Jahudi mangakkui naung dijalo Jesus huaso sian Amana.

Alai disungkun Jesus ma, “Nda tarsurat do di Patikmuna [di Psalmen 82:6], ‘Didok Debata, “Angka debata do hamu”’? . . . Antong, molo didok Ibana do “angka debata” tu angka halak na diburai i, boasa ma dohononmuna tu ahu, ‘Na mangaleai Debata do ho’ ala hudok,  ‘Anak ni Debata do ahu’? Hape na pinabadia jala na sinuru ni Ama i do ahu tu portibi on.”​—Johannes 10:34-36.

Haru panguhum na so tigor didok do nasida “angka debata” di Surat na Badia. Boasa ma muruk halak Jahudi ala didok Jesus “Anak ni Debata” ibana? Alani i, didok Jesus ma, “Molo so ulaon na sian Damang i na huulahon, unang pola porsea hamu tu ahu. Alai molo i do huulahon, porsea ma hamu tu na huulahon i nang pe ndang porsea hamu tu ahu. Marhite i, antusanmuna ma jala tongtong ma hamu porsea na marsada do Ama i dohot ahu jala marsada do ahu dohot Ama i.”​—Johannes 10:37, 38.

Gabe muruk ma halak Jahudi mambege i. Naeng ditangkup nasida ma Jesus, alai lari do ibana. Ditadingkon ma Jerusalem jala laho tu luat na di bariba ni Sunge Jordan. Disi do si Johannes parjolo sahali gabe pandidi, hira-hira opat taon naung salpu. Ndang dao on sian selatan ni Laut Galilea.

Torop do halak di luat i mandapothon Jesus jala didok ma, “Ndang adong nanggo sada tanda halongangan dibahen si Johannes, alai sintong do sude na nidokna taringot tu ibana.” (Johannes 10:41) Gabe godang ma halak Jahudi disi na porsea tu Jesus.