Zezi ɔli Ɲanmiɛn i sua’n i sanwun yolɛ’n i ti cɛn dilɛ’n wie, Zerizalɛmun lɔ. (Be flɛ cɛn sɔ’n ekun kɛ Anuka.) Be di cɛn sɔ’n be fa kle kɛ be fali Ɲanmiɛn i sua’n wlali Ɲanmiɛn i sa nun naan ɔ ti i liɛ klonglo. ?Ngue ti yɛ be kpɛli cɛn sɔ’n i ba-ɔ? Be yoli sɔ afin Siri Famiɛn nga be flɛ i Antiosisi Epifanin Nnan su’n, ɔ kplannin amuɛn sɔwlɛ kun Ɲanmiɛn i sua’n nun lɔ tɛ yiwlɛ dan’n su. Kɛ ɔ yoli sɔ’n, i afuɛ ya (100) yɛ. I sin’n, Ɲanmiɛn ɲrun jranfuɛ kun i mma’m be fali Zerizalɛmun klɔ’n ekun. Kpɛkun be fali Ɲanmiɛn i sua’n wlɛli i Ɲanmiɛn i sa nun ekun. Kɛ ɔ fɛ i lɛ’n, afuɛ nuan kwlakwla be di i ti cɛn Kislɛvu anglo’n i cɛn ba ablaɔn-nin-nnun’n (25) su. Zuifu’m be anglo sɔ’n, ɔ bo i bo Novanblu anglo’n i afiɛn, kpɛkun ɔ wie Desanblu anglo’n i afiɛn.

Blɛ sɔ’n nun’n, ayrɛ o nun kpa. Laglasi gua bɔbɔ. Kɛ ɔ́ yó sɔ’n, nn Zezi su wlanwlan Ɲanmiɛn i sua’n nun lɔ, lika nga Salomɔn i kpata’n wo lɛ’n nun. Zuifu’m be wa bo sin yiɛli i. Be usɛli i kɛ: “?Cɛn onin yɛ á kán ndɛ sɔ’n klé e-ɔ? Sɛ wɔ yɛ a ti Klisi’n, kɛn i weinwein kle e.” (Zan 10:22-24) ?Wafa sɛ yɛ Zezi tɛli be su-ɔ? Ɔ tɛli be su kɛ: “N kan kleli amun, sanngɛ amun lafiman su.” Zezi w’a kɛnmɛn i trele sa w’a kleman be kɛ i yɛ ɔ ti Klisi’n niɔn. Kusu nn Samari bla’n i liɛ’n su’n, ɔ yoli sɔ. (Zan 10:25, 26) Sanngɛ ɔ kannin ndɛ kun fa yili i wun nglo kleli be i osu nin-a cɛman sɔ liɛ. Ɔ seli be kɛ: “Nanwlɛ, ń kán klé amun kpa kɛ ka naan b’a wu Abraamun’n, n wo lɛ.”​—Zan 8:58.

Zezi kunndɛ kɛ sran’m be fa ninnge ng’ɔ yoli be’n, be sunnzun ninnge nga Ɲanmiɛn Ndɛ waan Klisi wá yó’n be nian. I liɛ’n, bé wún i wlɛ kɛ i yɛ ɔ ti Klisi’n niɔn. I sɔ’n ti yɛ blɛ sunman nun’n, ɔ seli i sɔnnzɔnfuɛ’m be kɛ nán be se sran’m be kɛ i yɛ ɔ ti Mesi’n niɔn. Sanngɛ kasiɛn su’n, ɔ seli Zuifu nga be wa bo sin yiɛli i’n be trele kɛ: “N kan kleli amun, sanngɛ amun lafiman su. Junman nga n su di be min Si i dunman nun’n, be di min ti lalo. Sanngɛ amun lafiman su, afin amun timan min bua wie.”​—Zan 10:25, 26.

?Ngue ti yɛ Zuifu’m b’a lafiman su kɛ Zezi yɛ ɔ ti Klisi’n niɔn? Zezi bɔbɔ tɛli su. I waan: “Amun lafiman su, afin amun timan min bua wie. Min bua’m be tie min nɛn’n, n si be, kpɛkun be su min su. N man be nguan m’ɔ leman awieliɛ’n. Ɔ maan be su nunnunman le, yɛ sran fi su deman be min sa nun le. Be nga min Si fa be mannin min’n, be ndɛ lo min tra like kwlaa.” I sin’n, ɔ kannin wafa ng’ɔ nin i Si’n be bo ti kun’n i ndɛ. Ɔ seli kɛ: “Min nin Siɛ’n e ti kun.” (Zan 10:26-30) I nun nga Zezi kán ndɛ sɔ’n, nn ɔ wo asiɛ’n su wa, yɛ i Si’n wo ɲanmiɛn su lɔ. Ɔ maan ndɛ ng’ɔ kannin’n kleman kɛ ɔ nin i Si’n be ti sran kunngba. Sanngɛ i bo’n yɛle kɛ be nɲɔn’n be bo ti kun junman dilɛ’n nun.

Ndɛ nga Zezi kɛnnin’n i lɛ’n yoli Zuifu’m be ya kpa. I sɔ’n ti’n, be isali yɔbuɛ ekun kɛ bé fá fínfín i. Sanngɛ srɛ w’a kunman Zezi. Ɔ seli be kɛ: “Siɛ’n i dunman nun’n, n yoli sa kpanngban n kleli amun. ?Sa sɔ’m be nun onin ti yɛ amun kunndɛ kɛ amún fínfín min yɔbuɛ-ɔ?” Zuifu’m be tɛli i su kɛ: “Nán kɛ sa kpa mɔ a yoli’n ti yɛ e waan é fínfín wɔ yɔbuɛ-ɔ, sanngɛ kɛ mɔ a saci Ɲanmiɛn i wun’n ti-ɔ. Afin [...] a yo ɔ wun kɛ Ɲanmiɛn sa.” (Zan 10:31-33) Zezi nin-a seman le kɛ ɔ ti Ɲanmiɛn Kpli. ?Yɛ nn ngue ti yɛ be tɔnnin i suɛn sɔ-ɔ?

Zezi seli kɛ ɔ le tinmin. Sanngɛ Zuifu be se be wun kɛ Ɲanmiɛn kunngba cɛ yɛ ɔ le tinmin-ɔn. I wie yɛle kɛ cɛn kun’n, kɛ Zezi kán “bua’m” be ndɛ’n, ɔ seli kɛ: “N man be nguan m’ɔ leman awieliɛ’n.” Kusu klɔ sran kwlá yomɛn i sɔ liɛ’n. (Zan 10:28) Zezi bɔbɔ seli Zuifu’m be kɛ tinmin ng’ɔ le i’n, ɔ fin i Si. Zuifu’m be yoli kɛ be wla fili i ndɛ sɔ’n su sa.

Kɛ Zezi tɛ́ be su’n, ɔ usali be kɛ: “?B’a klɛmɛn i amun Mmla’n [ɔ o Jue Mun 82:6 ] nun kɛ, ‘N seli kɛ: “Amun ti ɲanmiɛn”’? Ɔ maan be nga Ɲanmiɛn ndɛ’n bu be fɔ’n, Ɲanmiɛn flɛli be kɛ “ɲanmiɛn.” [...] ?Sɛ ɔ ti sɔ’n niɔn, ngue ti yɛ min mɔ Ɲanmiɛn kpali min sieli min ngunmin’n, m’ɔ sunmannin min mɛn’n nun’n, kɛ n seli kɛ ‘N ti Ɲanmiɛn Wa’n,’ amun se min kɛ ‘n saci Ɲanmiɛn wun-ɔn?”​—Zan 10:34-36.

Jɔlɛ difuɛ nga be ti klɔ sran bɔbɔ’n, Ɲanmiɛn Ndɛ’n flɛ be kɛ “ɲanmiɛn.” ?Ɔ maan sɛ Zezi seli kɛ ɔ “ti Ɲanmiɛn Wa’n,” ngue ti yɛ i sɔ’n kó ló Zuifu’m be ngasi-ɔ? I sin’n, ɔ fali be ɲin sieli i ndɛ kun su. Sɛ be bu ndɛ sɔ’n i akunndan  kpa’n, bé wún i wlɛ kɛ ɔ ti Ɲanmiɛn Wa sakpa. Ɔ seli be kɛ: “Sɛ nán min Si i junman yɛ n di’n, nán amun lafi min su. Sanngɛ sɛ n yo sa sɔ mun’n, kannzɛ amun lafiman min su’n, maan amun lafi sa sɔ’m be su. I liɛ’n, amún sí kɛ Siɛ’n nin min o nun, naan n kusu e nin Siɛ’n e o nun.”​—Zan 10:37, 38.

Kɛ Zuifu’m be tili i sɔ’n, be kunndɛli ekun kɛ bé trɛ́ i, sanngɛ ɔ jasoli lɛ. I sin’n, ɔ tuli Zerizalɛmun lɛ, ɔ kpɛli Zurdɛn nzue ba’n ɔ ɔli i sin lɔ. Lika sɔ’n nun yɛ i afuɛ afuɛ kɔe nnan yɛ’n, Zan boli sran’m be batɛmun yolɛ bo’n niɔn. Atrɛkpa’n, lika sɔ’n nin Galile Jenvie’n i ja ngua lɔ lika’n be nunman mmua.

Sran kpanngban be bali Zezi wun lɛ. Sran sɔ’m be seli kɛ: “Zan w’a yoman abonuan sa fi. Sanngɛ ndɛ kwlaa ng’ɔ kɛnnin i bian nga i lika’n, be ti nanwlɛ.” (Zan 10:41) I sɔ’n kle kɛ Zuifu kpanngban be lafili Zezi su.