Yésus a te zu Jérusalem asu Abô’ô ya môse be nga yoé temple (nge na, Hanoukka). Ba jem abô’ ete amu ba beta yoé temple. Den a nto ntete mimbu a mvuk, Antiochus IV Épiphane njô ya Syrie a nga lôñ autel e beta autel ya Temple Yéhôva yôp. Mvus ayap éyoñe valé, bone be prêtre éziñ a mbe mone Bejuif, be nga beta nyoñe Jérusalem a bo na, temple a beta bo vôme ba kañe Yéhôva. Ataté éyoñ éte, ba bo abô’ô na be simesane jam ete mbu ôse, ataté ngone Kislev e too melu 25, ngone ja tôban ézezañ Ngon awôm a jia akekui ézezañ Ngon awôm a baa.

Bi ne ôyôn, a biyoñe bite bi ne avep. Yésus a ke a wulu e Temple e mbala’a si Salomon a nga lôñ. Vôm ate, Bejuif ba mane bômane nye a sili nye na: “Wo ye tyelé bia minleme yôp akui nté mbé? Nge wo ô ne Krist, kate bia de ne ngeññ.” (Jean 10:22-24, Mfefé Nkôñelan) Aval avé Yésus a yalan? A jô na: “Me maneya kate mia, mi te buni.” Yésus a nji jô be ne sañesañe na a ne Krist ane a nga jô minga ya Samarie anjeñ. (Jean 4:25, 26) Ve, a liti be za a né éyoñ a jô na: “Te yen Abraham a za bialé’é, me to.”​—Jean 8:58.

Yésus a yi na bôte bebiene be yemelane na a ne Krist, éyoñe ba ve’e mam a bo a mam be nga jô na Messie a ye bo. Amu nalé nye a nga jô beyé’é bé, biyoñe bife na, be bo teke kate bôte befe na nnye a ne Messie. Ve éyoñe ji, a kate Bejuif ba vini nye ne sañesañ na: “Mam me abo a jôé Tate, mme mete me akañete ajô dam. Ve mi ne te buni.”​—Jean 10:25, 26.

Amu jé be nji buni na Yésus nnye a ne Krist? A jô na: “Mi ne te buni amu mi nji bo mintômba miam. Mintômba miam mi ayeme tyiñe jam, a ma fe me ayeme mie, mi atôñe ma: me ave fe mie ényiñ ya melu mese; mi aye bo te jañ, te ke môt a ye wôlé me mie mo mam. [Jôm Esa wom a nga ve ma é ne anen a dañe biôm bise bivok, MN].” Nde Yésus a kate be abim ngul élat é ne zañe ba Ésa wé a jô’ô na: “Bia Tate bi ne jôme jijia.” (Jean 10:26-30) Éyoñ a kobô mejô mete Yésus a ne si valé, Ésa ki e yôb été; nde nalé a vo’o tinane na ba Ésa be ne jôme jia. Ve, a viane liti na, be bili nsôñane wua, be ne nlatan.

Mejô me Yésus ma bo na Bejuif be wô’ô mbia ôlun, nde ba beta nyoñe meko’o na be wôé nye. Jam ete é nji bo na Yésus a ko woñ. A jô na: “Abui abeñe mame ya be Esaa wom me litiya mia, jam avé ya été e nde mia lume me dee mekok?” Ane Beyude be nga yalane nye na: “Bi nji kômbô lume wo mekok amu mbamba jam, ve amu wo ta Zambe, amu na . . . wo viane bo womien ane Zambe.” (Jean 10:31-33, Mfefé Nkôñelan) Yésus a nji ve’ele jô na a ne Zambe, nde amu jé ba bôté nye ajô?

Yaa, Yésus a jô na a bili ngul Bejuif ba buni na Zambe étam nnye a yiane bi. Éve’an é ne na, éyoñ a nga kobô ajô “mintômba” a nga jô na: “Me ave fe mie ényiñ ya melu mese,” jame môta binam a se ngule ya bo. (Jean 10:28) Bejuif ba vuane na, Yésus émien a nga mem e bôt été na, Ésa wé nnye a nga ve nye ngul éte.

Asu na a liti be na mame ba jô me ne minsos, Yésus a sili na: “Ke e ne ntilane metiñe menane [e kalate Besam 82:6] na, Me nga jô na, Mi ne bezambe? Nge a nga loene be na bezambe, ba mejô me Zambe me nga zu be be (bôt be nji bo ngule ya wôé mejô ya kalate Zambe ntuk), ye mi ajô môt, Ésa a nga bo nye mbamba môt a lôme nye si nyô na, Wo abo ébiasé; amu me ate jô na, Me ne Mone Zambe?”​—Jean 10:34-36.

Ôwé, ja’a Mintilane mia loene bikotekote betyi’i mejô na “bezambe.” Nde aval avé Bejuif bete be ne bôté Yésus ajô amu a jô na “Me ne Mone Zambe”? Amu nalé, a belane jam e ne bo be na be tyendé ôsimesan a jô’ô na: “Nge me ne te bo  mam me Ésa wom, te bunane ma. Ve nge me abo mam mete, akôsa bo mi ne te buni ma, buna’ane mam me abo: nde mi aye buni a yeme na Tate a ne be ma, me fe me ne be Tate.”​—Jean 10:37, 38.

Éyoñe Bejuif ba wô’ô nalé, ba jeñe na be bi Yésus, ve a beta solane be mo. A kôlô Jérusalem a ke Ôsôé ya Jourdain yat, vôme Jean a nga taté na a du bôt den a nga ke mimbu minyin. Vôm ate a nji ve’ele bo ôyap a sud ya Mañ ya Galilée.

Ékôane bôt ja zu be Yésus a jô nye na: “Jean a nji fo’o bo étua jam éziñ, ve mame mese a nga jô, ajô môte nyô, me mbe bebela.” (Jean 10:41) Amu nalé, abui Bejuif da buni Yésus.