Jesus edi Jerusalem ndidụk Usọrọ Ediyak Nnọ (m̀mê se ẹsikotde Hanukkah). Ẹsinam usọrọ emi nditi ini emi ẹkefiakde ẹyak temple ẹnọ. Ke se ibede isua ikie ke edem, edidem Syria emi ẹkekerede Antiochus IV Epiphanes ama ọbọp itieuwa en̄wen odori ke enyọn̄ akwa itieuwa ke temple Abasi. Nte ini akakade, nditọ oku kiet emi ekedide owo Jew ẹma ẹn̄wana ẹfiak ẹbọ mme asua Jerusalem ẹnyụn̄ ẹfiak ẹyak temple ẹnọ Jehovah. Tọn̄ọ oro, mme Jew ẹsinam usọrọ emi kpukpru isua ke Chislev 25, emi edide utịt utịt November esịm ntọn̄ọ ntọn̄ọ December idahaemi.

Ini etuep edi emi. Jesus ke asan̄a ke etehe Solomon ke temple. Mi ke mme Jew ẹdikan enye ẹkụk ẹnyụn̄ ẹdọhọ enye ẹte: “Adan̄a didie ke afo edinam ukpọn̄ nnyịn odu ke eyịghe? Edieke afo edide Christ, tịn̄ nọ nnyịn in̄wan̄-in̄wan̄.” (John 10:22-24) Jesus ọkpọbọrọ didie? Kop se enye ọbọrọde mi: “Mma ntịn̄ nnọ mbufo, edi mbufo inịmke ke akpanikọ.” Jesus idọhọke mmọ nnennen nnennen ke imọ idi Christ nte enye ọkọdọhọde n̄wan Samaria ke mben obube mmọn̄. (John 4:25, 26) Edi akpakana mmọ ẹdiọn̄ọ owo emi enye edide ke ini enye ọkọdọhọde mmọ ete: “Ami mma ndodu mbemiso Abraham edidu.”—John 8:58.

Jesus oyom mme owo ẹse m̀mê se imọ inamde edi se ẹkedọhọde ke Christ ayanam, ndien ẹda oro ẹbiere m̀mê imọ idi Christ. Emi akanam enye esidọhọ mme mbet esie ete yak mmọ ẹkûtịn̄ unọ mme owo ke imọ idi Messiah. Edi idahaemi mme Jew ẹtọn̄ọde mfịna ye enye mi, enye ọdọhọ mmọ ete: “Mme utom eke ami ndade enyịn̄ Ete mi nnam, mmọ emi ẹtie ntiense ẹban̄a mi. Edi mbufo inịmke ke akpanikọ.”—John 10:25, 26.

Nso inam mmọ mînịmke ke Jesus edi Christ? Jesus etịn̄ ntak ete: “Mbufo inịmke ke akpanikọ, koro mbufo mîdịghe erọn̄ mi. Mme erọn̄ mi ẹkop uyo mi, ami mmonyụn̄ mfiọk mmọ, ndien mmọ ẹtiene mi. Ami nnyụn̄ nnọ mmọ nsinsi uwem, ndien owo idisoboke mmọ tutu amama, baba owo kiet idinyụn̄ iwamakede mmọ isio mi ke ubọk. Se Ete mi ọnọde mi okpon akan kpukpru n̄kpọ eken.” Enye etịn̄ n̄ko nte imọ ikperede ete imọ ete: “Ami ye Ete idi kiet.” (John 10:26-30) Kpa ye emi Jesus odude mi ke isọn̄ ndien Ete esie odu ke heaven, mmọ ẹdiana kiet ẹnyụn̄ ẹdian ubọk ntre ẹnam n̄kpọ.

Ikọ Jesus ayat mme Jew tutu mmọ ẹfiak ẹtan̄ itiat ẹyom nditọ enye n̄wot edi ndịk inamke Jesus. Enye ọdọhọ mmọ ete: “Mma n̄wụt mbufo ediwak nti utom emi ẹtode Ete. Ewe ke otu mme utom emi ke mbufo ẹtọn̄ọ mi ke itiat?” Mme Jew ẹbọrọ enye ẹte: “Idịghe ke ntak eti utom ke nnyịn itọn̄ọ fi ke itiat, edi itọn̄ọ fi ke ntak emi osụn̄ide Abasi, koro afo . . . enịm idem ke abasi.” (John 10:31-33) Ntak emi mmọ ẹtịn̄de utọ ikọ emi ke ini edide akananam Jesus idọhọke ke imọ idi abasi?

Jesus ọdọhọ ke imọ imenyene odudu ndinam n̄kpọ emi mme Jew ẹkerede ke Abasi ikpọn̄ ekeme ndinam. Ke uwụtn̄kpọ enye ọkọdọhọ ke imọ imekeme ndinọ “mme erọn̄” “nsinsi uwem.” Idụhe owo ndomokiet emi ekemede ndinam emi, Abasi ikpọn̄ ekeme ndinam. (John 10:28) Mme Jew ẹfre ke Jesus ama ọdọhọ ke Ete imọ ọnọ imọ odudu ndinam emi.

Jesus etịn̄ ikọ ndiwụt ke imọ ikọdọhọke ke imọ idi Abasi. Enye obụp mmọ ete: “Nte owo ikewetke ke Ibet mbufo [ke Psalm 82:6] ite, ‘Ami ndọhọ nte: “Mbufo ẹdi mme abasi”’? Edieke enye okokotde mbon oro ikọ Abasi okobiomde ikpe ‘mme abasi,’ . . . nte mbufo ẹdọhọ mi emi Ete akanamde asana onyụn̄ osiode ọdọn̄ ke ererimbot ẹte, ‘Afo omosụn̄i Abasi,’ koro ndọhọde nte, Ami ndi Eyen Abasi?”—John 10:34-36.

Edieke Ikọ Abasi okotde ndiọi ebiereikpe “mme abasi,” ntak emi mme Jew ẹkpedọhọde ke ikpanaha Jesus ọdọhọ ke imọ idi “Eyen Abasi”? Jesus etịn̄ ikọ emi akpanade anam mmọ enịm ke enye edi Eyen Abasi ete: “Edieke ami mmenamke utom Ete mi, ẹkûnịm mi ke akpanikọ. Edi edieke  ami nnamde mmọ, idem ọkpọkọm mbufo inịmke mi ke akpanikọ, ẹnịm utom oro ke akpanikọ, man mbufo ẹkpedi ẹdifiọk ẹnyụn̄ ẹka iso ẹfiọk ẹte ke Ete abuana n̄kpọ ye ami, ami nnyụn̄ mbuana n̄kpọ ye Ete.”—John 10:37, 38.

Ke ini mme Jew ẹkopde emi, mmọ ẹdomo ndimụm Jesus edi enye ọbọhọ mmọ. Enye ọkpọn̄ Jerusalem, ebe Akpa Jordan, aka ebiet emi John akadade enịm mme owo baptism n̄kpọ nte isua inan̄ ke edem. Etie nte ebiet emi iyomke usụn̄ ikpọn̄ usụk usụk Inyan̄ Galilee.

Otuowo ẹdi ẹbịne Jesus mi, mmọ ẹnyụn̄ ẹdọhọ ẹte: “John ikanamke baba idiọn̄ọ kiet, edi adan̄a ediwak n̄kpọ emi John eketịn̄de aban̄a owo emi ẹkedi akpanikọ.” (John 10:41) Emi anam ediwak mme Jew ẹbuọt idem ye Jesus.