Jesu ko wá Jelusalẹm na Hùnwhẹ Klandowiwe tọn. Hùnwhẹ ehe nọ yin bibasi to whemẹwhemẹ nado flin whenue tẹmpli lọ vọ́ yin kinklandowiwe. To nuhe hugan owhe kanweko jẹnukọn, Ahọlu Silia tọn Antiochus IV Epiphane basi agbà de do agbà daho he tin to tẹmpli Jiwheyẹwhe tọn mẹ ji. To nukọn mẹ, visunnu yẹwhenọ Juvi de tọn lẹ vọ́ Jelusalẹm gọyí bosọ vọ́ tẹmpli lọ klandowiwe na Jehovah. Sọn whenẹnu gbọ́n, hùnwhẹ enẹ nọ yin bibasi to whemẹwhemẹ to azán 25tọ osun Kislẹvi tọn, he sọgbe hẹ vivọnu novembre po bẹjẹeji décembre po tọn to egbehe.

Avivọ-whenu wẹ, yèdọ ojlẹ he mẹ aimẹ nọ fá te taun. Jesu to zọnlinzin to tẹmpli mẹ gbọn agbà gaa Sọlomọni tọn mẹ. Tofi, Ju lẹ lẹdo e bo kanbiọ ẹ dọmọ: “Nawẹ e na dẹnsọ bọ hiẹ na jo alindọn mítọn do ayihaawe mẹ? Eyin hiẹ wẹ Klisti lọ, dọna mí madoadúdẹji.” (Johanu 10:22-24) Nawẹ Jesu na yinuwa gbọn? E gblọn dọmọ: “Yẹn ko dọna mì, ṣogan mì ma yise.” Jesu ma ko dọna yé tlọlọ dọ ewọ wẹ Klisti lọ gba, dile e dọna yọnnu Samalianu lọ do to dotọ̀ de kọ̀n. (Johanu 4:25, 26) Ṣigba, ewọ ko do mẹhe e yin hia to whenue e dọmọ: “Whẹpo Ablaham do yin jiji, yẹn ko tin.”—Johanu 8:58.

Jesu jlo dọ gbẹtọ lẹ ni wá tadona kọ̀n na yede dọ ewọ wẹ Klisti lọ gbọn azọ́n etọn lẹ yiyijlẹdo nuhe yin didọdai dọ Klisti lọ na wà lẹ go dali. Enẹ wẹ zọ́n bọ e dọna devi etọn lẹ to ojlẹ delẹ mẹ wayi dọ yé ni ma dọna mẹdepope dọ emi wẹ yin Mẹsia lọ blo. Ṣigba todin, e dọna Ju he to homẹgble ji ehelẹ tlọlọ dọmọ: “Azọ́n he yẹn to wiwà to oyín Otọ́ ṣie tọn mẹ lẹ, ehelẹ wẹ to kunnude gando go e. Ṣigba, mìwlẹ ma yise.”—Johanu 10:25, 26.

Naegbọn yé ma yise dọ Jesu wẹ Klisti lọ? E dọmọ: “Mìwlẹ ma yise, na mì ma yin lẹngbọ ṣie lẹ wutu. Lẹngbọ ṣie lẹ nọ dotoaina ogbè ṣie, yẹn sọ yọ́n yé, bọ yé nọ hodo mi. Podọ yẹn na na yé ogbẹ̀ madopodo, bọ yé ma na yin vivasudo gbede to aliho depope mẹ, podọ mẹdepope ma na hò yé yí sọn alọ ṣie mẹ. Nuhe Otọ́ ṣie ko na mi yin nude he klohu onú devo lẹpo.” Enẹgodo, Jesu dọ lehe haṣinṣan ewọ po Otọ́ etọn tọn po siso sọ na yé dọmọ: “Dopo wẹ yẹn po Otọ́ lọ po.” (Johanu 10:26-30) Jesu to aigba ji fi bọ Otọ́ etọn to olọn mẹ, enẹwutu e ma sọgan to didọ dọ ewọ po Otọ́ etọn po yin dopo to paa mẹ gba. Kakatimọ, yé yin dopo, na yé tindo lẹndai dopolọ bo tin to kọndopọ mẹ wutu.

Ohó Jesu tọn lẹ gblehomẹna Ju lẹ sọmọ bọ yé ṣinyan zannu lẹ whladopo dogọ nado dlan do e hù. Ṣigba, ehe ma dobuna Jesu. E dọna yé dọmọ: “Azọ́n dagbe susu wẹ yẹn dohia mì sọn Otọ́ lọ dè. Detẹ to azọ́n enẹlẹ mẹ wẹ mì to zannu dlan do mi na?” Yé gblọnna ẹn dọmọ: “Mí ma to zannu dlan do we na azọ́n dagbe de gba, ṣigba na nùzinzan wutu, na . . . a hẹn dewe zun yẹwhe de.” (Johanu 10:31-33) Jesu ma sọalọakọ́n pọ́n gbede dọ emi yin yẹwhe de, enẹwutu, naegbọn yé do sawhẹ ehe dokọna ẹn?

Na Jesu to didọ dọ emi tindo huhlọn he Ju lẹ yise dọ Jiwheyẹwhe kẹdẹ wẹ tindo wutu wẹ. Di apajlẹ, e dọ gando “lẹngbọ” lẹ go dọmọ: “Yẹn na na yé ogbẹ̀ madopodo,” yèdọ nude he gbẹtọvi lẹ ma sọgan basi. (Johanu 10:28) Ṣigba, Ju lẹ yí nukunpẹvi do pọ́n nugbo lọ dọ Jesu ko yigbe to gbangba dọ emi mọ aṣẹpipa yí sọn Otọ́ emitọn dè.

Nado gbẹ́ whẹsadokọnamẹ lalo yetọn dai, Jesu dọmọ: “Be e ma yin kinkandai to Osẹ́n mìtọn mẹ [to Psalm 82:6 mẹ dọ], ‘Yẹn dọmọ: “Yẹwhe lẹ wẹ mìwlẹ yin”’? Eyin ewọ ylọ mẹhe ohó Jiwheyẹwhe tọn gblewhẹdo lẹ dọ ‘yẹwhe lẹ,’ . . . naegbọn mìwlẹ dọna yẹn mẹhe Otọ́ lọ ko hẹn zun wiwe bo dohlan aihọn lọ mẹ dọ, ‘Hiẹ zánnu,’ na yẹn dọ dọ, Visunnu Jiwheyẹwhe tọn wẹ yẹn yin wutu?”—Johanu 10:34-36.

Na nugbo tọn, Owe-wiwe lẹ tlẹ ylọ whẹdatọ gbẹtọvi lẹ dọ “yẹwhe lẹ.” Enẹwutu, naegbọn Ju ehelẹ nado gblewhẹdo Jesu na e dọ dọ “Visunnu Jiwheyẹwhe tọn wẹ yẹn yin wutu”? E dlẹnalọdo nude he dona duto yé ji dọmọ: “Eyin e ma yin azọ́n Otọ́  ṣie tọn lẹ wà wẹ yẹn te, mì ma yí mi sè blo. Ṣigba, eyin azọ́n lọ lẹ wà wẹ yẹn te, eyin mìwlẹ ma tlẹ yí mi sè, mì bo yí azọ́n lọ lẹ sè, na mì nido sọgan wá yọnẹn bosọ sọgan zindonukọn to yinyọnẹn mẹ dọ Otọ́ lọ tin to kọndopọ mẹ hẹ mi podọ yẹn tin to kọndopọ mẹ hẹ Otọ́ lọ.”—Johanu 10:37, 38.

Enẹwutu, Ju lẹ tẹnpọn nado wle Jesu, ṣigba e họnyi sọn alọ yetọn mẹ whladopo dogọ. E tọ́n sọn Jelusalẹm bo dasá Tọ̀sisa Jọdani tọn yì awà he ji Johanu bẹ baptẹm bibasi na gbẹtọ lẹ jẹeji te to nudi owhe ẹnẹ die wayi. E taidi dọ filọ ma dẹn do vivọnu Ohù Galili tọn to hùwaji.

Gbẹtọgun lẹ wá Jesu dè bo dọmọ: “Johanu ma basi ohia dopo tata, ṣigba onú lẹpo he Johanu dọ gando dawe ehe go wẹ yin nugbo.” (Johanu 10:41) Enẹwutu, Ju susu tindo yise to Jesu mẹ.