Iesu be Ierusalema dekenai ia mai, Dubu Hahelagaia Ariana (eiava Hanukkah) totona. Unai aria ai dubu idia hahelagaia lou negana idia laloa. Lagani 100 gunanai, Suria ena king, Antiochus IV Epiphanes, ese Dirava ena dubu ai ia noho boubou patana badana latanai boubou patana ma ta ia haginia. Gabeai, Iuda hahelaga tauna ta ena natudia ese Ierusalema idia abia lou bona Iehova dekenai dubu idia hahelagaia lou. Unai nega amo, Kisileve 25 ai aria ta idia karaia, unai hua be November ena dokona bona December ena matamana kahanai.

Unai be keru negana, bona Iesu be dubu helaga lalonai, Solomona ena dehe dekenai ia raka. Unuseniai Iuda taudia ese idia hagegea bona idia nanadaia: “Dahaka dainai ai dekenai sibona oi gwauraia hedinarai lasi? Bema oi be Keriso, ai oi hamaoroa.” (Ioane 10:22-24) Iesu be edena bamona do ia haere? Ia gwau: “Umui lau hamaoroa vadaeni to umui abidadama lasi.” Iesu ese ia hamaorodia lasi, ia be Keriso, ranu guri ai Samaria hahinena ia hamaoroa hegeregerena. (Ioane 4:25, 26) To inai hereva amo sibona ia hahedinaraia, ia gwau: “Aberahamo ia do vara lasi neganai, lau noho vadaeni.”​—Ioane 8:58.

Iesu ia ura taunimanima ese ia karaia karadia be idia perovetalaia Keriso ese do ia karaia karadia ida idia hahegeregerea, unai amo do idia diba ia be Keriso. Unai dainai nega haida ena hahediba taudia ia hamaoroa taunimanima do idia hamaoroa lasi ia be Mesia. To hari ia ese unai dagedage Iuda taudia ia hamaoroa: “Lauegu Tamana ena ladanai lau karaia noho gaukaradia ese lau idia gwauraia hedinarai. To umui abidadama lasi.”​—Ioane 10:25, 26.

Dahaka dainai idia abia dae lasi Iesu be Keriso? Ia gwau: “Umui abidadama lasi, badina umui be egu mamoe lasi. Lauegu mamoe ese egu gadona idia kamonai, idia lau diba, bona idia be egu murinai idia raka. Idia dekenai mauri hanaihanai lau henia bona idia be do idia mase ore lasi, bona ta ese egu imana amo idia do ia henaoa lasi. Lauegu Tamana ese lau dekenai ia henia gaudia ese gau ibounai idia hereaia.” Bena Iesu ese ia bona ena Tamana edia hetura karana ia herevalaia, ia gwau: “Lau bona Tamana be tamona.” (Ioane 10:26-30) Iesu be tanobadai bona ena Tamana be gubai, unai dainai ia bona ena Tamana be tauanina tamona lasi. To, edia ura be tamona bona idia lalotamona.

Iesu ena hereva dainai Iuda taudia idia badu bona nadi idia abia ia idia hodoa totona. To unai ese Iesu ia hagaria lasi, ia gwau: “Tamana ese ia henia gaukara namodia momo be umui vairanai lau hahedinaraia. Edena gaukara dainai umui ura lau umui hodoa?” Idia haere: “Gaukara namona ta dainai oi ai hodoa lasi, to Dirava ena ladana oi hadikaia dainai, . . . oi sibona be dirava ta ai oi halaoa.” (Ioane 10:31-33) Iesu ia gwau lasi ia be dirava ta, to dahaka dainai unai bamona idia hereva?

Iesu ia gwau ia be mai ena siahu, to Iuda taudia idia abia dae Dirava sibona be mai ena siahu. Hegeregere, Iesu ese “mamoe” herevalaia ia neganai, ia gwau: “Idia dekenai mauri hanaihanai lau henia,” taunimanima be unai idia karaia diba lasi. (Ioane 10:28) Iesu be Iuda taudia vairanai ia gwau ia be Tamana amo siahu ia abia, to unai idia lalopararalaia lasi.

Edia samania koikoi herevana haloua totona, Iesu ia henanadai: “Emui Taravatu [Salamo 82:6] ai inai idia torea, a? ‘Lau gwau, “Umui be dirava.”’ Bema Dirava ena hereva ese ia gwauraia dika taudia be ia ese ia gwauraia ‘dirava,’ . . . vadaeni, edena bamona umui be lau, Tamana ese ia hahelagaia bona tanobada dekenai ia siaia tauna dekenai umui gwau, ‘Oi be Dirava  ena ladana oi hadikaia,’ badina lau gwau, lau be Dirava ena Natuna?”​—Ioane 10:34-36.

Oibe, Toretore Helagadia ese hahemaoro taudia dikadia ia gwauraia “dirava.” Vadaeni dahaka dainai Iuda taudia be Iesu ena hereva, “Lau be Dirava ena Natuna,” dekenai idia badu? Edia lalona veria totona, Iesu ia gwau: “Bema lau be egu Tamana ena gaukara lau karaia lasi, lau umui abidadama henia lasi. To bema unai gaukara lau karaia noho, ena be umui ese lau umui abidadama henia lasi, namona be unai gaukara umui abidadama henia. Unai amo do umui laloparara bona diba do umui abia noho, Tamana be lau ida ia lalotamona bona lau be Tamana ida lau lalotamona.”​—Ioane 10:37, 38.

Unai dainai Iuda taudia idia ura Iesu idia dogoatao, to ia heau. Ierusalema ia rakatania bona lagani 4 gunanai Ioane ese bapatiso ia karaia matamaia gabuna dekenai ia hanaia lao, unai be Ioridane Sinavaina kahanai. Unai gabu be Galilea Gohu ena saut kahana kahirakahira.

Hutuma be Iesu dekenai idia mai bona idia gwau: “Ioane be hoa karana ta ia karaia lasi, to Ioane ese inai tauna dainai ia gwauraia gaudia ibounai be momokani.” (Ioane 10:41) Unai dainai Iuda taudia momo ese Iesu idia abidadama henia.