Jesus datai ke Jerusalem kena ngintu Pengerami Nyerahka Rumah Sembiang (tauka, Hanukkah). Pengerami tu diintu kena ngingatka pengawa nyerahka baru Rumah Sembiang. Lebih ari seratus taun sebedau nya, Raja Siria ke benama Antiokus Epipanes nirika siti alta ke petara pelesu ba Rumah Sembiang. Udah nya, bala anak siku imam Judah ngerampas baru Jerusalem lalu sida nyerahka baru Rumah Sembiang ke Jehovah. Kenyau ari nya, siti pengerami diintu maya 25 Kislew, ninting taun. Bulan Kislew berengkah ari ujung bulan November nyentukka ngagai pun bulan Disember.

Maya nya musin chelap, lalu Jesus bejalai ba Serambi Solomon ba Rumah Sembiang. Orang Judah begelumu ngelingi iya lalu nanya: “Berapa lama nuan deka nejuka kami berunding? Enti nuan nya Kristus, tak padahka aja meh ngagai kami.” (John 10:22-24) Ku Jesus nyaut sida: “Aku udah madah ngagai kita, tang kita enda arap.” Jesus bedau madah ngagai sida enggau terus terang, pasal iya nya Kristus, baka ke dipadahka iya ngagai siku indu Samaria ba telaga. (John 4:25, 26) Tang, iya kala madah: “Sebedau Abraham ada, aku endang udah bisi.”—John 8:58.

Jesus deka orang mandingka utai ke digaga iya enggau jaku benabi ke madah pasal pengawa ke deka dikereja Kristus. Lalu sida ulih ngaga pemutus ke diri empu sekalika iya endang Kristus tauka enda. Nya kebuah Jesus enda ngasuh murid iya madah ngagai orang bukai, iya nya Messiah. Tang diatu iya madah enggau terus terang ngagai orang Judah ke ngelaban iya: “Pengawa ke dikereja aku dalam nama Apai aku deka meri saksi pasal aku. Tang kita enda arap.”—John 10:25, 26.

Nama kebuah sida enda pechaya Jesus nya Kristus? Iya madahka: “Kita enda arap laban kita ukai bedus aku. Bedus aku ngelala nyawa aku, aku ngelala sida, lalu sida nitihka aku. Aku meri sida pengidup ti meruan belama iya, lalu sida enda sekali-kali deka dipunaska. Lalu nadai orang ke ulih ngerampas sida ari aku. Sida ke diberi Apai aku ngagai aku berega agi ari utai bukai.” Udah nya, Jesus madahka kaul iya enggau Apai iya amat rapat, ku iya: “Aku enggau Apai beserakup.” (John 10:26-30) Taja pan Jesus ba bumi lalu Apai iya ba serega, tang seduai iya beserakup laban seduai iya bisi siti tuju ti sama.

Jaku Jesus ngasuh orang Judah amat ringat nyentukka sida deka nuku iya ngena batu. Tang Jesus enda takut. Ku Jesus bejaku: “Baka ke diasuh Apai, aku udah ngereja mayuh pengawa ti manah ke kita. Ni bagi pengawa ke ngasuh kita deka nuku aku ngena batu?” Ku orang Judah nyaut: “Kami nuku nuan ukai ketegal pengawa manah nuan, tang ketegal nuan bejaku ngelaban Petara. . . . tang nuan ngumbai diri petara.” (John 10:31-33) Taja pia, Jesus nadai kala madahka diri Petara. Nyadi, nama kebuah sida nuduh iya munyi nya?

Tu ketegal, lebuh Jesus nyebut pasal “bedus.” Iya madah: “Aku meri sida pengidup ti meruan belama iya.” Utai nya enda ulih dikereja mensia. (John 10:28) Orang Judah pechaya semina Petara aja bisi kuasa ngereja utai ke baka nya. Taja pan Jesus udah madah iya nerima kuasa ari Apai iya, tang orang Judah enggai nerima nya.

Kena nyaut jaku tuduh sida, Jesus madahka: “Endaka bisi ditulis ba Adat kita, [ba Masmur 82:6], ‘Petara bejaku: “Nuan nya petara”’? . . . Enti Petara ngumbai orang ke dikutuk ba Bup Kudus nya ‘petara,’ patut kita madah ngagai aku, ‘Nuan bejaku ngelaban Petara,’ lebuh aku madahka, ‘Aku Anak Petara,’ taja pan aku dikuduska  Apai lalu dikirumka Iya ke dunya?”—John 10:34-36.

Iya ke amat, ayat Bup Kudus ngumbai hakim mensia ti enda adil nya “petara.” Nyadi, nama kebuah orang Judah nyalahka Jesus maya iya madah “Aku Anak Petara”? Ngambika ulih ngemetulka runding sida, Jesus madah: “Enti aku enda ngereja pengawa ke diberi Apai aku, anang arapka aku. Tang enti aku ngereja nya, arap meh ke pengawa ke dikereja aku, taja pan kita enda arapka aku. Enggau nya kita deka nemu sereta tetap arap, Apai beserakup enggau aku lalu aku beserakup enggau Apai.”—John 10:37, 38.

Pengudah ninga saut Jesus, orang Judah nguji baru deka nangkap iya, tang Jesus ngerarika diri. Iya ninggalka Jerusalem lalu mupuk ke seberai Sungai Jordan, alai John berengkah maptisa orang kira-kira empat taun sebedau utai tu nyadi. Endur nya engka enda jauh ari begian selatan Danau Galili.

Mayuh orang datai ngagai Jesus lalu madahka: “Sekali pan nadai meh John kala ngaga kereja ajih, tang semua utai ke dipadahka John pasal orang tu endang amat.” (John 10:41) Ketegal nya, mayuh orang Judah arapka Jesus.