Yesũ nĩwaendie Yelusaleme kwondũ wa Mboka ya Kũthew’a kwa Ĩkalũ. Mboka ĩsu yaĩ ya kũlilikana kũthew’a ĩngĩ kwa ĩkalũ. Ĩvindanĩ yĩu, nĩvavĩtĩte myaka mbee wa 100 kuma yĩla mũsumbĩ wa Silia weetawa Andioko Evivane wa kana, waakie kĩthembeo vala vaĩ kĩthembeo kĩnene ĩkalũnĩ ya Ngai. Ĩtina, ana ma mũthembi waĩ Mũyuti nĩmoosie ĩngĩ ndũa ya Yelusaleme na mathesya ĩkalũ ĩngĩ kwondũ wa Yeova. Kuma ĩvinda yĩu, nĩkweethĩawa na mboka kĩla mwaka ĩla yeekawa matukũ 25 ma mwei wa Kĩyuti wĩtawa Kiselevu, ũla kwosana na kalenda kaitũ nĩ mwei wa 11 ũithela na mwei 12 ũyambĩĩa.

Ĩvindanĩ yĩu Yesũ waĩ Yelusaleme kwaĩ ĩvinda ya mbevo. Aitembeanga ĩkalũnĩ valandanĩ wa Solomoni, Ayuti nĩmamũthyũlũlũkile na mamũkũlya: “Wĩtwĩkalya tweteele nginya ĩndĩĩ? Ethĩwa nue Klĩsto tũtavye ũtheinĩ.” (Yoana 10:22-24) Yesũ amasũngĩie ata? Ameie atĩĩ: “Nĩnĩmũtavisye na mũikũĩkĩĩa.” Yesũ ndaamatavya ĩmwe kwa ĩmwe kana nĩwe Klĩsto tondũ wamũtavisye mũndũ mũka Mũsamalia me kĩthimanĩ. (Yoana 4:25, 26) Ĩndĩ nĩwamavuanĩsye ĩũlũ wa wumo wake yĩla wameie atĩĩ: “Mbee wa Avalaamu atanethĩwa, naĩ kw’o.”—Yoana 8:58.

Yesũ endaa andũ mamanye mo ene kana nĩwe Klĩsto kwa kũsianĩsya maũndũ ala weekaa na kĩla Maandĩko maĩtye Klĩsto ũkeka. Nĩkyo kĩtumi mavinda amwe weeaa amanyĩw’a make maikatavye mũndũ kana nĩwe Masia. Ĩndĩ ĩvindanĩ yĩĩ nĩwatavisye Ayuti asu ĩmwe kwa ĩmwe amea: “Mawĩa ala nĩtethasya ĩsyĩtwanĩ ya Asa wakwa nĩmaumasya ũkũsĩ ĩũlũ wakwa. Ĩndĩ inyw’ĩ mũiĩkĩĩaa.”—Yoana 10:25, 26.

Nĩkĩ Ayuti asu mataĩkĩĩaa kana Yesũ nĩwe Klĩsto? Yesũ ameie-ĩ: “Inyw’ĩ mũiĩkĩĩaa nũndũ mũi malondu makwa. Malondu makwa nĩmethukĩĩasya wasya wakwa, na nĩnĩmesĩ, na nĩmangatĩĩaa. Nĩnĩmanengae thayũ wa tene na tene, na maikanangwa o na ĩndĩĩ, na vaiĩ mũndũ ũkamavulya kuma kw’okonĩ kwakwa. Ala Asa wakwa ũnengete nĩ ma vata kũte syĩndũ syonthe.” Yesũ nĩwasyokie amatavya ũndũ wĩthĩawa na ngwatanĩo ya vakuvĩ na Ĩthe wake. Ameie-ĩ: “Nyie na Asa twĩ kĩndũ kĩmwe.” (Yoana 10:26-30) Yesũ ndoonanasya kana we na Ĩthe wake nĩ mũndũ ũmwe, nĩkwĩthĩwa Yesũ aĩ ĩũlũ wa nthĩ na Ĩthe wake aĩ ĩtunĩ. Ĩndĩ, oonanasya kana we na Yeova maĩ na kĩeleelo kĩmwe na meekaa maũndũ me ngwatanĩo nĩ kana meanĩsye kĩeleelo kĩu.

Ndeto sya Yesũ nĩsyathatisye Ayuti nginya mavanga ĩngĩ kũmũkimanga na mavia mamũae. Ĩndĩ Yesũ ndaatelemw’a nĩ ũndũ ũsu. Ameie atĩĩ: “Nĩnĩmwonetye mawĩa maingĩ maseo kuma kwa Asa. Nĩ wĩa wĩva katĩ wa asu ũũtuma mwenda kũngimanga?” Namo mamwĩa: “Tũiũkũkimanga nũndũ nĩwĩkaa mawĩa maseo, ĩndĩ nũndũ nĩwaumana; nũndũ . . . wĩtw’ĩkĩthasya ngai.” (Yoana 10:31-33) Yesũ ndaasya kana we nĩ ngai, kwoou nĩkĩ Ayuti mamwĩie ũu?

Yĩla Yesũ wameie kana we na Ĩthe wake nĩ kĩndũ kĩmwe, oonanasya kana e na ũtonyi ũla Ayuti moonaa waĩle kwĩthĩwa na Ngai e weka. Kwa ngelekany’o, Yesũ aineena ĩũlũ wa “malondu” aisye: “Nĩnĩmanengae thayũ wa tene na tene,” na ũsu nĩ ũndũ andũ mataĩ na ũtonyi wa kwĩka. (Yoana 10:28) Ayuti nĩmavũthĩĩasya ũw’o wa kana Yesũ nĩwawetie ate kũvitha kĩndũ kana nĩwanengiwe ũkũmũ nĩ Ĩthe wake.

Yesũ aileana vyũ na ndeto sya ũvũngũ sya Ayuti amakũlilye-ĩ: “Kũiandĩkĩtwe Mĩaonĩ yenyu [ĩvukunĩ ya Savuli 82:6], ‘Nyie naisye: “Inyw’ĩ mwĩ ngai”’? Ethĩwa nĩwametie ‘ngai’ ala ndeto ya Ngai yamasilĩle . . . nyie ũla nĩtheetw’e nĩ Asa na akandũma ĩũlũ wa nthĩ mwĩmbĩa, ‘We nũkũumana,’ nũndũ nĩnasya, ‘Nyie nĩ Mwana wa Ngai’?”—Yoana 10:34-36.

Maandĩko metaa asili ala twĩsĩ kana mayĩatĩĩaa sila wa katĩ “ngai.” Kwoou, nĩkĩ Ayuti asu mathatie yĩla Yesũ waisye, “Nyie nĩ Mwana wa Ngai”? Nĩwawetie ũndũ wa kũmaĩkĩĩthya kana we nĩ Mwana wa Ngai. Ameie-ĩ: “Ethĩwa ndiũtethya mawĩa ma Asa wakwa, mũikandĩkĩĩe. Ĩndĩ ethĩwa nĩngũmatethya, o na ethĩwa mũikũndĩkĩĩa, ĩkĩĩai mawĩa asu, nĩ kana mũmanye na mũendeee kũmanya kana Asa e ngwatanĩo vamwe nakwa, nakwa nĩ ngwatanĩo vamwe na Asa.”—Yoana 10:37, 38.

Yĩla Yesũ watavisye Ayuti ndeto isu, nĩmavangie kũmũkwata ĩndĩ Yesũ eevonokany’a amatia. Ĩtina wa ũu, nĩwaumie Yelusaleme na athi mũingo wa Ũsĩ wa Yolotani kĩsionĩ kĩla Yoana wambĩĩie wĩa wake wa kũvatisa vakuvĩ myaka ĩna mĩvĩtu. Kĩsio kĩu kĩyaĩ vaasa na ngalĩko ya ĩtheo ya Ũkanga wa Kalilii.

Yesũ e kĩsionĩ kĩu, andũ aingĩ nĩmookie vala waĩ na masya atĩĩ: “Yoana ndaaĩka kyama o na kĩmwe, ĩndĩ maũndũ onthe ala Yoana waneenie ĩũlũ wa mũndũ ũũ maĩ ma w’o.” (Yoana 10:41) Na kwoou Ayuti aingĩ nĩmamũĩkĩĩe Yesũ.