ជំពូកទី៨១
តើលោកយេស៊ូនិងបិតាគឺតែមួយក្នុងន័យអ្វី?
-
«ខ្ញុំនិងបិតានៅស្ថានសួគ៌គឺតែមួយ»
-
លោកយេស៊ូបដិសេធការចោទប្រកាន់ថាលោកតាំងខ្លួនជាព្រះ
លោកយេស៊ូបានមកក្រុងយេរូសាឡិមដើម្បីចូលរួមបុណ្យឧទ្ទិស (ឬឆានូកា)។ ពិធីបុណ្យនេះបានត្រូវធ្វើឡើងដើម្បីរំលឹកការសម្ពោធវិហារម្ដងទៀត។ ជាងមួយសតវត្សរ៍មុន ស្តេចសាសន៍ស៊ីរីឈ្មោះអាន់ទីយ៉ូកឹសទី៤អេភីផានបានសង់ទីបូជាលើទីបូជាធំក្នុងវិហាររបស់ព្រះ។ ប៉ុន្តែក្រោយមក ពួកកូនប្រុសរបស់សង្ឃជនជាតិយូដាម្នាក់បានចាប់យកក្រុងយេរូសាឡិមវិញ។ រួចមក ពួកគេសម្ពោធវិហារនោះម្ដងទៀត ហើយប្រគល់ជូនព្រះយេហូវ៉ា។ ចាប់តាំងពីពេលនោះមក បុណ្យឧទ្ទិសបានត្រូវធ្វើឡើងជារៀងរាល់ឆ្នាំនៅថ្ងៃទី២៥ ខែគីស្លេវ។ ខែនោះគឺនៅចុងខែវិច្ឆិកា និងដើមខែធ្នូ។
ឥឡូវនេះគឺជារដូវរងា។ កាលដែលលោកយេស៊ូកំពុងដើរក្នុងវិហារនាល្វែងសាឡូម៉ូន នោះជនជាតិយូដាមកចោមព័ទ្ធលោក ហើយនិយាយទៅកាន់លោកថា៖ «តើអ្នកនឹងទុកឲ្យយើងឆ្ងល់ដល់ណាទៀត? ប្រសិនបើអ្នកជាគ្រិស្ត សូមប្រាប់យើងឲ្យត្រង់មក»។ (យ៉ូហាន ១០:២២-២៤) តើលោកយេស៊ូនឹងឆ្លើយតបយ៉ាងណា? លោកតបទៅពួកគេថា៖ «ខ្ញុំបានប្រាប់អ្នករាល់គ្នាហើយ ប៉ុន្តែអ្នករាល់គ្នានៅតែមិនជឿ»។ លោកយេស៊ូមិនបានប្រាប់ពួកគេត្រង់ៗថាលោកជាគ្រិស្ត ដូចដែលលោកបានប្រាប់ស្ត្រីជនជាតិសាម៉ារីនៅឯអណ្ដូងទឹកនោះទេ។ (យ៉ូហាន ៤:២៥, ២៦) ក៏ប៉ុន្តែ លោកបានបង្ហាញអត្តសញ្ញាណរបស់លោកដោយមានប្រសាសន៍ថា៖ «ខ្ញុំប្រាប់អ្នករាល់គ្នាការពិតថា មុនអាប្រាហាំកើតមក មានខ្ញុំហើយ»។—យ៉ូហាន ៨:៥៨
លោកយេស៊ូចង់ឲ្យបណ្ដាជនសន្និដ្ឋានដោយខ្លួនឯងថាលោកជាគ្រិស្ត ដោយពិចារណាអំពីកិច្ចការដែលលោកបានធ្វើ ហើយប្រៀបធៀបជាមួយនឹងទំនាយដែលបានចែងក្នុងបណ្ដាំរបស់ព្រះស្តីអំពីកិច្ចការរបស់គ្រិស្ត។ នេះជាមូលហេតុដែលនៅពេលខ្លះ លោកបង្គាប់អ្នកកាន់តាមលោកមិនឲ្យប្រាប់អ្នកឯទៀតថាលោកជាមេស្ស៊ី។ ប៉ុន្តែ ឥឡូវនេះលោកប្រាប់យ៉ាងត្រង់ៗដល់ជនជាតិយូដាដែលប្រឆាំងនឹងលោកថា៖ «ការទាំងប៉ុន្មានដែលខ្ញុំធ្វើក្នុងនាមបិតារបស់ខ្ញុំ នោះបញ្ជាក់អំពីខ្ញុំ។ ប៉ុន្តែអ្នករាល់គ្នាមិនជឿ»។—យ៉ូហាន ១០:២៥, ២៦
ហេតុអ្វីពួកគេមិនជឿថាលោកយេស៊ូជាគ្រិស្ត? លោកមានប្រសាសន៍ថា៖ «អ្នករាល់គ្នាមិនជឿ ព្រោះអ្នករាល់គ្នាមិនមែនជាចៀមរបស់ខ្ញុំទេ។ ចៀមរបស់ខ្ញុំស្ដាប់សំឡេងរបស់ខ្ញុំ ខ្ញុំស្គាល់ពួកគេ ហើយពួកគេមកតាមខ្ញុំ។ ខ្ញុំក៏ឲ្យជីវិតដែលគ្មានទីបញ្ចប់ដល់ពួកគេ ហើយពួកគេនឹងមិនដែលត្រូវបំផ្លាញ ក៏នឹងគ្មានអ្នកណាឆក់យកពួកគេពីដៃខ្ញុំឡើយ។ អ្វីដែលបិតារបស់ខ្ញុំបានឲ្យខ្ញុំ គឺជាអ្វីដែលមានតម្លៃជាងអ្វីៗឯទៀតទាំងអស់»។ បន្ទាប់មក លោកយេស៊ូប្រាប់ពួកគេអំពីចំណងមិត្តភាពដ៏ជិតស្និទ្ធរបស់លោកជាមួយនឹងបិតា ដោយមានប្រសាសន៍ថា៖ «ខ្ញុំនិងបិតានៅស្ថានសួគ៌គឺតែមួយ»។ (យ៉ូហាន ១០:២៦-៣០) នៅពេលនោះ លោកយេស៊ូនៅផែនដី ហើយបិតាលោកនៅស្ថានសួគ៌ ដូច្នេះលោកមិនមានន័យថា លោកនិងបិតាគឺតែមួយក្នុងន័យត្រង់នោះឡើយ។ ផ្ទុយទៅវិញ លោកនឹងបិតាគឺតែមួយក្នុងន័យថា លោកទាំងពីរមានសាមគ្គីភាព ហើយមានគោលបំណងតែមួយ។
ប្រសាសន៍របស់លោកយេស៊ូបានធ្វើឲ្យជនជាតិយូដាខឹងយ៉ាងខ្លាំង។ ដូច្នេះ ម្ដងនេះទៀត ពួកគេរើសដុំថ្មបម្រុងគប់លោក។ ក៏ប៉ុន្តែ លោកយេស៊ូមិនបានភ័យខ្លាចឡើយ។ លោកមានប្រសាសន៍ទៅពួកគេថា៖ «ខ្ញុំបានសម្ដែងឲ្យអ្នករាល់គ្នាឃើញការល្អជាច្រើនពីបិតានៅស្ថានសួគ៌។ ក្នុងការទាំងនោះ តើការមួយណាជាហេតុនាំឲ្យអ្នករាល់គ្នាគប់ខ្ញុំ?»។ ជនជាតិយូដាឆ្លើយថា៖ «យើងមិនមែនគប់អ្នកដោយសារការល្អណាមួយទេ ប៉ុន្តែដោយសារអ្នកប្រមាថព្រះ ព្រោះអ្នក . . . បានតាំងខ្លួនជាព្រះមួយវិញ»។ (យ៉ូហាន ១០:៣១-៣៣) លោកយេស៊ូមិនធ្លាប់អះអាងថាលោកជាព្រះទេ។ ដូច្នេះ ហេតុអ្វីពួកគេចោទប្រកាន់លោកបែបនេះ?
លោកយេស៊ូកំពុងមានប្រសាសន៍ថាលោកមានឫទ្ធានុភាព តែជនជាតិយូដាជឿថាមានតែព្រះមួយគត់ដែលមានឫទ្ធានុភាព។ ជាឧទាហរណ៍ ស្តីអំពី«ចៀម» លោកយេស៊ូមានប្រសាសន៍ថា៖ «ខ្ញុំក៏ឲ្យជីវិតដែលគ្មានទីបញ្ចប់ដល់ពួកគេ»។ នេះជាអ្វីដែលមនុស្សមិនអាចធ្វើបានឡើយ។ (យ៉ូហាន ១០:២៨) ប៉ុន្តែ ជនជាតិយូដាមិនអើពើនឹងប្រសាសន៍របស់លោកយេស៊ូដែលធ្លាប់ប្រាប់ពួកគេថា លោកបានទទួលឫទ្ធានុភាពពីបិតារបស់លោក។
ម្ល៉ោះហើយ ដើម្បីបដិសេធការចោទប្រកាន់មិនពិតរបស់ជនជាតិយូដា លោកយេស៊ូសួរពួកគេថា៖ «ច្បាប់របស់អ្នករាល់គ្នា[នៅទំនុកតម្កើង ៨២:៦]ចែងថា៖ ‹ខ្ញុំបាននិយាយថា៖ «អ្នករាល់គ្នាសុទ្ធសឹងតែជាព្រះ»› មែនទេ? ប្រសិនបើពួកអ្នកដែលបណ្ដាំរបស់ព្រះបានផ្ដន្ទាទោស បានត្រូវហៅថា‹ព្រះ› . . . នោះតើអ្នករាល់គ្នានិយាយមកខ្ញុំ ដែលបិតានៅស្ថានសួគ៌បានញែកជាបរិសុទ្ធនិងចាត់ឲ្យចូលមកក្នុងពិភពលោកនេះថា៖ ‹អ្នកប្រមាថព្រះ› ដោយសារខ្ញុំបាននិយាយថាខ្ញុំជាបុត្ររបស់ព្រះឬ?»។—យ៉ូហាន ១០:៣៤-៣៦
ពិតណាស់ សូម្បីតែបណ្ដាំរបស់ព្រះក៏ហៅចៅក្រមមនុស្សដែលមិនយុត្ដិធម៌ថា«ព្រះ»ដែរ។ ដូច្នេះ ហេតុអ្វីជនជាតិយូដាចាប់កំហុសលោកយេស៊ូពេលលោកមានប្រសាសន៍ថា៖ «ខ្ញុំជាបុត្ររបស់ព្រះ»? ហេតុនេះ ដើម្បីជួយពួកគេឲ្យជឿជាក់ លោកយេស៊ូលើកបញ្ជាក់អំពីចំណុចមួយថា៖ «ប្រសិនបើខ្ញុំមិនធ្វើការរបស់បិតាខ្ញុំទេ នោះកុំជឿខ្ញុំ។ ប៉ុន្តែប្រសិនបើខ្ញុំធ្វើការរបស់បិតាខ្ញុំមែន ចូរជឿដោយសារការទាំងនោះ ទោះជាអ្នករាល់គ្នាមិនជឿខ្ញុំក៏ដោយ ដើម្បីអ្នករាល់គ្នាអាចដឹងហើយជឿរហូតថា បិតានៅស្ថានសួគ៌រួបរួមជាមួយនឹងខ្ញុំ ហើយខ្ញុំក៏រួបរួមជាមួយនឹងបិតានៅស្ថានសួគ៌ដែរ»។—យ៉ូហាន ១០:៣៧, ៣៨
ពេលជនជាតិយូដាឮដូច្នេះ នោះពួកគេខំចាប់លោកយេស៊ូ តែលោកបានគេចផុតពីពួកគេម្ដងទៀត។ រួចមក លោកបានចេញពីក្រុងយេរូសាឡិម ហើយធ្វើដំណើរឆ្លងកាត់ទន្លេយ៉ូដាន់ ឆ្ពោះទៅត្រើយម្ខាងទៀតជាកន្លែងដែលយ៉ូហានបានជ្រមុជទឹកឲ្យគេជិតបួនឆ្នាំមុន។ តាមមើលទៅ កន្លែងនេះគឺមិនសូវឆ្ងាយប៉ុន្មានពីភាគខាងត្បូងនៃចុងសមុទ្រកាលីឡេទេ។
នៅទីនោះ មនុស្សជាច្រើនបានទៅឯលោកយេស៊ូ ហើយក៏តាំងនិយាយថា៖ «ពិតមែនតែយ៉ូហានមិនបានធ្វើសញ្ញាសម្គាល់ណាមួយ ប៉ុន្តែអ្វីៗទាំងប៉ុន្មានដែលយ៉ូហានបាននិយាយអំពីបុរសម្នាក់នេះគឺពិតទាំងអស់»។ (យ៉ូហាន ១០:៤១) ដូច្នេះ ជនជាតិយូដាជាច្រើនចាប់ផ្ដើមជឿលើលោកយេស៊ូ។
