Yesu wayile ku Yelusalema ku Kijiilo kya Kuzhijika Nzubo ya Lesa, (nangwa’mba Hanukkah). Kino kyajinga kijiilo kya kuzhijika jibiji nzubo ya Lesa. Kukila pa myaka kitota kimo kunyuma, Mfumu wa Silya, aye Antiokasi wa buna Epiphanes washimikile kya kusokelapo bitapisho peulu ya kya kusokelapo bitapisho kyajinga pa nzubo ya Lesa. Mu kuya kwa kimye, baana babalume ba ñanga Muyudea batambwile Yelusalema ne kupana jibiji nzubo ya Lesa kwi Yehoba. Kufumatu kyokyo kimye, baikalanga na kijiilo pa mwaka pa mwaka pa 25 Kiselevu, ñondo wa waesakana na moba a ku mpelo ya November ne a ku ntatwilo ya December.

Kyajinga kimye kya mashika. Yesu wapitañenenga mu bukonde bwa Solomone, bwajinga ku nzubo ya Lesa. Bayudea bamubungile ne kumushikisha’mba: “Mambo ka o wabujila kwitubuula patoka? Umvwe yobe Kilishitu, tubuule patoka.” (Yoano 10:22-24) Yesu wakumbwile’mba ka? Wakumbwile’mba: “Nemubuujile anweba, bino kechi mwaitabila ne.” Yesu kechi wibabuujile mu kushinkamika amba ye Kilishitu byonka byo abuujile mwanamukazhi mwina Samaliya ku mushima ne. (Yoano 4:25, 26) Pano bino, wisolwele byoebalumbulwijilenga’mba: “Abalahama saka akyangye kusemwa, amiwa najinga konka.”—Yoano 8:58.

Yesu wakebele bantu bene kuyuka’mba ye Kilishitu kupichila mu kwesakanya mingilo yanji ku byaambijilwe jimo amba Kilishitu byo byo akoba. O ene mambo o akambizhanga baana banji ba bwanga bimye bimo kubula kubuulapo muntu nangwa umo amba ye Mesiasa. Bino wabuujile Bayudea bakosele michima amba: “Mingilo yo mbena kwingila mu jizhina ja Batata, yo inshimuna. Bino anweba kechi mwaitabila ne.”—Yoano 10: 25, 26.

Mambo ka o babujile kwitabila’mba Yesu ye Kilishitu? Yesu waambile’mba: “Anweba kechi mwaitabila ne, mambo kechi mwi mikooko yami ne. Mikooko yami yumvwa jiwi jami, ne ayo neiyuka kabiji indondela. Nkeipa bumi bwa myaka ne myaka, ne ayo kechi bakeyonauna ne, kabiji kafwako ukeinsompola mu kuboko kwami ne. Mikooko yo bampa Batata yanema bingi kukila bintu bikwabo.” Kepo Yesu ebabuujile bulunda bwawama bo ajinga noba ne Bashanji amba: “Amiwa ne Batata twi umo.” (Yoano 10:26-30) Yesu wajinga pano pa ntanda, Bashanji bajinga mwiulu, onkao mambo, kechi walumbulwilenga’mba aye ne bashanji muntu umo ne. Walumbulwilenga’mba bengila mwingilo umo, kabiji bakwatankana.

Bayudea byo bazhingijile pa byambo byaambile Yesu, batolele mabwe amba bamwipaye. Bino Yesu kechi waubile moyo ne. Waambile’mba: “Naubile mingilo yavula yawama kufuma kwi Batata. Nanchi pa yoya mingilo wepi ye mubena kukeba kungashilapo mabwe?” Abo bamukumbwile’mba: “Tubena kukwasa mabwe kechi na mambo a mingilo yawama ne, bino . . . mambo obewa nangwa kya kuba wi muntu, witela’mba wi lesa.” (Yoano 10:31-33) Byo kyajinga kuba’mba kechi witelelepo aye mwine amba lesa ne, mambo ka Bayudea o baambijile bino?

Mambo Yesu waambilenga’mba uji na bulume Bayudea bo baitabijile’mba bwafwainwatu Lesa kwapwa. Kimye kimo Yesu waambile pa “mikooko” amba: “Nkeipa bumi bwa myaka ne myaka,” kintu kyakonsha kubula kuba muntu. (Yoano 10:28) Nangwa byonkabyo, Bayudea kechi bakwatakanye’mba Yesu wayukile’mba watambwile luusa kufuma kwi Shanji ne.

Yesu wamwesheshe’mba bamupelengamo mambo a bubela. Wibashikishe’mba: “Nanchi mu Mizhilo yenu [pa Salamo 82:6], Lesa kechi waambile’mba, ‘Anweba mwi balesa’ nenyi? Inge aye wibatelele’mba ‘balesa’ aba bo bazhachisha ku mambo a Lesa, . . . bino amiwa ye bazhijika Batata ne kutuma pano pa ntanda, mwakonsha kuñambila byepi amba, ‘Ubena kwamba mwenga,’ byo naamba namba, ‘Yami Mwana Lesa’?”—Yoano 10:34-36.

Kya kine, Binembelo byakonsha ne kutela mitonyi yabula koloka amba “balesa.” Nanchi Bayudea bafwainwe kupamo mambo Yesu byo aambile’mba “Yami Mwana Lesa” nyi? Yesu waambile kintu kyafwainwe kwibashiina amba: “Umvwe kechi mbena kwingila mingilo ya Batata ne, kungitabila ne. Pakuba umvwe yo mbena kwingila, nangwa kya kuba kechi mwangitabila ne, itabilaiko  mingilo, pa kuba’mba muyuke ne kuyukisha’mba Batata baji ne amiwa, ne amiwa nji ne Batata.”—Yoano 10:37, 38.

Yesu byo aambile bino, Bayudea bakebele kumukwata, bino, wanyemene. Wafuminemo mu Yelusalema ne kuya ku bushiya bwa Mukola wa Yodano ku mpunzha kwabatizhenga Yoano myaka ina yapichilepo. Ino mpunzha kyamweka kechi yaikejile kwalepa na kabeta ka ku bulenge bwa Kalunga ka Ngalilea ne.

Bantu bavula baishile kwi Yesu ne kwamba’mba: “Yoano kechi waubilepo kiyukilo kya kukumya nangwa kimo ne, bino byonse Yoano byo aambile pa uno muntu, byajinga bya kine.” (Yoano 10:41) Kabiji bavula konkakwa baitabijile mwi Yesu.