Yezu mmulue mu Yelushalema bua Tshibilu tshia Dibanjija (anyi Hanuka). Badi batshienza bua kusekelela dibanjija dia ntempelo tshiakabidi. Bidimu bipite pa lukama kumpala, mukalenge wa bena Sulia Antiochus IV (Epifane) wakibaka tshioshelu pa tshioshelu tshinene ku ntempelo wa Nzambi. Panyima pa matuku, bana ba balume ba muakuidi muena Yuda bakakuata kabidi Yelushalema ne kubanjijabu kabidi ntempelo kudi Yehowa. Katshia ku tshikondo atshi, bakatuadija kuenza tshibilu etshi tshidimu tshionso mu dia 25 ngondo wa Kiseleu, ngondo uvua upetangana ne tshitupa tshia ndekelu tshia ngondo wa 11 ne tshia kumpala tshia ngondo wa 12.

Tshivua tshikondo tshia muvu wa mashika makole. Yezu uvua wendakana mu ntempelo mu mbalanda wa Solomo. Muaba eu bena Yuda badi bamunguila ne bamuebeja ne: “Neutulame ne mioyo kuulu kuulu too ne dîba kayi? Biwikala Kristo, tuambila patoke.” (Yone 10:22-24) Yezu wakenza tshinyi? Wakandamuna ne: “Mvua munuambile, kadi kanuena nuitabuja to.” Yezu kakabambila buludiludi ne: uvua Kristo bu muvuaye muambile mukaji muena Samalea ku tshina tshia mâyi to. (Yone 4:25, 26) Kadi wakaleja tshivuaye pakambaye ne: “Bulelela, bulelela, ndi nnuambila ne: kumpala kua Abalahama kuikalaku, meme mvuaku.”​—Yone 8:58.

Yezu uvua musue bua bantu bambe nkayabu ne: uvua Kristo pa kufuanyikija bishima bivuaye wenza ne malu akavuabu bamanyishe avua Kristo ne bua kuenza. Ke bua tshinyi imue misangu uvua wambila bayidi bende bua kabambidi muntu nansha umue ne: uvua Masiya to. Kadi mpindieu udi wambila bena Yuda ba tshikisu aba ne muoyo mujima ne: “Malu andi ngenza mu dîna dia Tatu wanyi, owu aa adi ajadika bualu buanyi. Kadi nuenu kanuena nuitabuja, bualu kanuena mikoko yanyi to.”​—Yone 10:25, 26.

Bua tshinyi kabavua bitabuja ne: Yezu uvua Kristo? Wakamba ne: “Nuenu kanuena nuitabuja, bualu kanuena mikoko yanyi to. Mikoko yanyi idi yumvua dîyi dianyi, ndi muyimanye, ne idi indonda. Ndi nyipesha muoyo wa tshiendelele, kabakuyibutula nansha kakese, ne muntu nansha umue kakuyinyenga mu tshianza tshianyi to. Tshidi Tatu wanyi mumpeshe ntshintu tshinene kupita bintu bikuabu bionso.” Pashishe Yezu udi ubambila mudiye mu malanda makole ne Tatuende wamba ne: “Meme ne Tatu tudi tshintu tshimue.” (Yone 10:26-30) Yezu uvua pa buloba ne Tatuende uvua mu diulu, nunku kavua usua kuamba ne: yeye ne Tatuende bavua muntu umue ku mubidi to. Kadi badi mu buobumue bualu badi ne tshipatshila tshimue.

Mêyi a Yezu aa akafiikisha bena Yuda munda, kuambulabu too ne mabue bua kumushipa. Yezu kakumvua buôwa bua bualu ebu to. Wakamba ne: “Ndi munuleje malu mimpe a bungi a kudi Tatu. Mbuepi bua ku malu au bunudi nungashila mabue?” Bakamuandamuna ne: “Tudi tukuasa mabue ki mbua bualu buimpe, kadi bualu udi upenda Nzambi; bualu wewe . . . udi udivuija nzambi.” (Yone 10:31-33) Katshia Yezu katu muanji kuamba ne: ndi nzambi to, kadi bua tshinyi badi bamubanda ne bualu ebu?

Eyowa, Yezu uvua wamba ne: uvua ne bukole buvua bena Yuda bamanye ne: Nzambi ke utu nabu. Tshilejilu, pa bidi bitangila “mikoko” wakamba ne: “Ndi nyipesha muoyo wa tshiendelele,” bualu buvua bantu kabayi mua kuenza to. (Yone 10:28) Bena Yuda kabavua bajingulule tshivua Yezu muambe patoke ne: uvua mupete bukokeshi kudi Tatuende.

Bu muvua Yezu mubenge bualu buvuabu bamubanda nabu ebu, wakabebeja ne: “Ki mbafunde mu Mikenji yenu [mu Misambu 82:6] ne: ‘Mvua muambe ne: “Nuenu nudi banzambi”’ anyi? Bikalaye mubikile bantu bavua dîyi dia Nzambi dibipishe ne: ‘banzambi,’ . . . nudi nungambila meme udi Tatu mujidile ne mutume pa buloba ne: ‘Udi upenda Nzambi,’ bualu mvua muambe ne: ‘Ndi Muana wa Nzambi’ anyi?”​—Yone 10:34-36.

Eyowa, Bible udi mene ubikila bantu babi badi balumbuluisha ne: “banzambi.” Nunku mmunyi muvua bena Yuda aba mua kubanda Yezu bua muvuaye muambe ne: “Ndi Muana wa Nzambi”? Wakaleja bualu buvua ne bua kubajadikila wamba ne: “Bingikala  tshiyi ngenza malu a Tatu wanyi, kanungitabuji to. Kadi bingikala ngenza malu aa, nansha munudi kanuyi nungitabuja meme, itabujayi malu aa, bua nufike ku dimanya ne nutungunuke ne kumanya ne: Tatu udi mu buobumue nanyi ne meme ndi mu buobumue ne Tatu.”​—Yone 10:37, 38.

Bena Yuda bakajinga bua kukuata Yezu, kadi wakabanyema kabidi. Wakumbuka mu Yelushalema ne kusabukaye musulu wa Yadene, uya muaba uvua Yone mutuadije kubatiza bantu bidimu bitue ku binayi kumpala. Bidi bimueneka ne: muaba eu kawuvua kule ne muaba uvua Mbuu wa Galela mushikidile ku sud to.

Misumba ya bantu yakalua kudi Yezu yamba ne: “Yone kavua muenze tshimanyinu nansha tshimue to, kadi malu onso avua Yone muambe bua muntu eu avua malelela.” (Yone 10:41) Nunku bena Yuda ba bungi bakitabuja Yezu.