Yesu ayile kuYelusalema kuChiwanyino chaKukunjika Tembele (chipwe Hanuka). Chiwanyino kana chapwile chakwanuka kukunjika cheka tembele. Kaha chapwileko omu mwahichile myaka yayivulu kufuma haze Mwangana waSulya Antiochus IV Epiphanes atungililile lijiko lyakulumbila halijiko lyakulumbila lyalinene kutembele yaKalunga. Kutwala muze, vana vakapilishitu umwe wamukwitava chavaYuleya vatambwile cheka Yelusalema nakukunjika cheka tembele kuli Yehova. Kufuma vene haze, mwaka himwaka chiwanyino kana vachilingilenga mukakweji waKishileve ha 25. Kakweji kana tunahase kumwesekesa kulwola lwakusongo yakakweji waNovember kuheta kumaputukilo akakweji waDecember kweseka nakalenda yamakumbi ano.

Mungonde yachishika, Yesu apwile nakutambuka mutembele, musenge yaSolomone. VaYuleya vamujingilikile nakwamba ngwavo: “Nautulingisanga tuhuhwasane palanga nakumwaka uka? Nge ove yove Kulishitu, kaha tulweze hatoma.” (Yowano 10:22-24) Uno Yesu avakumbulwile ngachilihi? Ambile ngwenyi: “Ngwamilwezanga lyehi, oloze enu kamwetavileko.” Yesu kavalwezele hatoma ngwenyi ikiye Kulishituko, nge muze alwezele pwevo wakaSamaliya halishima ngwenyi ikiye vene Kulishitu. (Yowano 4:25, 26) Alijimbwile ivene hakwamba ngwenyi: “Shimbu kanda Apalahama asemuke, ami kungwapwile.”—Yowano 8:58.

Yesu asakile vatu vakukulule vavene ngwavo ikiye Kulishitu hakwesekesa milimo yenyi alingilenga kuvyuma vahanjikile chimweza ngwavo vikiko mwakalinga Kulishitu. Evi vikiko vyalingishile alweze tumbaji twenyi lwola lumwe ngwenyi kanda navalweza vatu ngwavo ikiye Meshiyako. Oloze alwezele jino ava vaYuleya vakukakama michima hatoma ngwenyi: “Milimo nguli nakuzata ami mulijina lyaTata, yikiko yili nakuhana unjiho hali ami. Oloze enu kamwetavileko.”—Yowano 10:25, 26.

Mwomwo ika vahonene kwitavila ngwavo Yesu ikiye Kulishitu? Ambile ngwenyi: “Enu kamwetavileko, mwomwo kamweshi mumikoko jamiko. Mikoko jami veji kwivwililanga kulizu lyami, kahami ngwavatachikiza, kaha veji kungukavangizanga. Ami nanguvahana kuyoya chahaya myaka yosena, kaha chikupu vene kaveshi kukavanongesako. Kakweshi umwe mwakahasa kuvahukula mulivoko lyamiko. Vyuma nanguhane Tata vyavilemu chikuma kuhambakana vyuma vyeka vyosena.” Jino Yesu avalwezele usoko atwama nawo naIse, ambile ngwenyi: “Ami naTata twapwa umwe.” (Yowano 10:26-30) Yesu apwile hano hamavu, oloze Ise apwile mwilu. Ngocho echi kachalumbununa nge Yesu naIse vapwa mujimba umweko. Oloze vapwa umwe, kulumbununa nge valinunga hamwe muvilinga.

Mazu ahanjikile Yesu evwishile vaYuleya kupihya ngocho vambachile malolwa nakusaka kumujiha. Oloze Yesu kevwile womako. Ambile ngwenyi: “Ami ngunamisolwela milimo yamwenemwene yayivulu yakuli Tata. Uno hamilimo kaneyi, mulimo muka namungwashila malolwa?” Vamukumbulwile ngwavo: “Etu katweshi kukwashila malolwa hamulimo wamwenemweneko, shina hakusaula Kalunga, mwomwo unalilingisa kupwa ukalunga.” (Yowano 10:31-33) Yesu kalivulukile kupwa hikalungako, kaha mwomwo ika vamuhanyinyine mulonga kanou?

Yesu ambile ngwenyi apwile nangolo jize vaYuleya vafwelelele ngwavo Kalunga kaha ikiye atwama najo. Chakutalilaho, Yesu ambile kutalisa ‘kumikoko’ ngwenyi: “Nanguvahana kuyoya chahaya myaka yosena,” chuma chize kaveshi kuhasa kulinga vatuko. (Yowano 10:28) VaYuleya vahumbwile vyuma avalwezele Yesu ngwenyi Ise ikiye amuhanyine ngolo.

Yesu hakukana makuli avo, avakumbulwile ngwenyi: “Uno kavasoneka muJishimbi jenuko [hali Samu 82:6] ngwavo, ‘Ami ngwambile ngwami: “Enu munapu mutulunga”’? Kachi nge vaze valangulwile namazu aKalunga avavulukile ngwenyi ‘tulunga,’ . . . kahami vanalingisa kupwa wajila kuli Tata nakungutuma mukaye mungwambe ngwenu, ‘Unasaula Kalunga,’ mwomwo ngunambe ngwami, ‘NguMwanaKalunga’ nyi?”—Yowano 10:34-36.

Eyo, Visoneka vyavuluka navaka-kuyula mwamupi ngwavo “tulunga.” Jino ava vaYuleya vahanyine ngachilihi Yesu mulonga hakwamba ngwenyi “NguMwanaKalunga”?  Ahanjikile chishina chize chavapayishile, ambile ngwenyi: “Kachi nge kangweshi nakuzata milimo yaTatako, kaha kanda kungwitavilako. Oloze kachi nge nguli nakuyizata, numba tuhu enu kamweshi kungwitavilako, oloze itavilenuko milimo mangana mutachikize nakwitavila lika ngwenu, Tata alikata nayami, kaha ami nawa ngwalikata naTata.”—Yowano 10:37, 38.

Ngocho vaYuleya vasakile kumukwata Yesu, kaha achinyine. Afumine kuYelusalema nakuzauka Kalwiji Yotau nakuya kuchihela kuze Yowano aputukilile kumbapachisa vatu kafwe myaka yiwana kunyima. Chasoloka nge chihela kana kachapwile kwakusuku nakusulo yaKalungalwiji waNgalileyako.

Mayongomena ejile kuli Yesu nakwamba ngwawo: “Yowano kalingile chinjikizo numba chimweko, oloze vyuma vyosena vize Yowano ahanjikile hali ou mutu, vyapwile vyamuchano.” (Yowano 10:41) Ngocho vaYuleya vavavulu vaputukile kufwelela Yesu.