Yesu nenzi muYerusalema kuchawija chakuhana (hela, Hanuka). Ichi chidika chekalaña chakwanuka kuhana tembeli kamuchiyedi. Yaaka yakubadika ha 100 yahitilihu, Mwanta waSiriya Antiochus IV Epiphanes watuñili kameña hakameña keneni hatembeli yaNzambi. Chimwahitili mpinji anyana kawatupristu aYudeya atambwili Yerusalema nawa ahanini cheñi tembeli kudi Yehova. Kufuma tuhu haniyi mpinji anukaña chaaka nichaaka haKisilevi 25 kakweji kanesekani nakumakumishilu aNovember nikumatachikilu aDecember.

Himumpinji yachishika. Yesu nakukwenda mutembeli mwikeki daSolomoni. Kweniku aYudeya anamunyeñumuki nawa anamwili nawu: “Muloñadi chiwunakubulila kutulejela hatooka? Neyi yeyi Kristu, tuleji hatooka.” (Yowanu 10:22-24) Yesu wukwakula nindidi? Nakuli nindi: “Nayileja dehi, ilaña himunakuhweleliku.” Yesu nayileji wanyi hatooka nindi yena diyi Kristu neyi chamulejeliyi mumbanda kaSamariya heshima. (Yowanu 4:25, 26) Hela chochu, wayilejeli, chahosheliyi nindi: “Henohu Abarahama kanda yavwaliki, ami nadiña kwoku.”—Yowanu 8:58.

Yesu nakukeña antu akunkululi nawu diyi Kristu kuhitila mukwesekeja nyidimu yindi nayashimwineñawu dehi nawu Kristu wakayila. Dichaletesheli mpinji yikwawu kuleja atumbanji twindi nindi bayi aleja antu nawu diyi Mesiyaku. Ilaña ichi naleji awa aYudeya anakukaana nindi: “Nyidimu yinnakukoña mwijina daTata yami, diyashimunaña wunsahu hadi ami. Ilaña himunakuhweleliku.”—Yowanu 10:25, 26.

Muloñadi chinakubula kumukuhwelelawu Yesu nawu diyi Kristu? Nahoshi nindi: “Himunakuhweleliku, muloña mudi anyikoku ami wanyi. Anyikoku ami atiyaña izu dami nawa nayiluka, dichi anlondelaña. Nayinkaña wumi wahaya nyaaka, nawa hiyamba kayikisañanaku, dichi kwosi wakayihukula muchikasa chamiku. Anyikoku ananyinkiyi Tata yami alema kubadika yuma yejima.” Nkumininaku Yesu nayileji chekala wubwambu windi natata yindi, nahoshi nindi: “Ami naTata twekala wumu.” (Yowanu 10:26-30) Yesu wudi hamaseki nawa tata yindi wudi mwiwulu, dichi hanatalishi mukwila nindi yena niTata yindi ekala muntu wumuku. Ilaña, ekala wumu munyidimu yazatañawu, kwikala akwatankana.

Mazu anahoshi Yesu anayihilishi aYudeya chakwila ananoni malola nawu amujahi. Yesu hanatiyi womaku. Nahoshi nindi: “Nayimwekesheleli nyidimu yayivulu yakudi Tata. Mudimu wumu wudihi haniyi nyidimu wumunakukeña kuñasilahu malola?” Anamwakuli nawu: “Hitunakukwasila hamudimu wawuwahiku, ilaña hakuhosha kasawuntu; muloña eyi . . . wadilishaña eyi aweni kwikala nzambi.” (Yowanu 10:31-33) Yesu kanda aditeneñahu dehi nindi hinzambi, muloñadi chinakumwinkelawu muloña?

Yesu nakuhosha nindi wukweti ñovu yinelukiwu aYudeya nawu yekala naNzambi hohu nkawindi. Chakutalilahu, kutalisha kudi “anyikoku” wahosheli nindi: “Nayinkaña wumi wahaya nyaaka,” chuma chikukañanya kuhanawu antu. (Yowanu 10:28) AYudeya anakudiwula chuma chinahoshiy Yesu hatooka nindi amwinka wuswa kudi Tata yindi.

Hakukaana muloña wunakumutwikawu, Yesu nehuli nindi: “Komana muNshimbi jenu [Masamu 82:6] asonekamu wanyi nawu, wayiteneni nindi ‘Nahosheli nami: “Enu mudi anzambi”’? Neyi yena wayiteneni nindi ‘anzambi’ owu afwishawu namuloña kudi izu daNzambi . . . indi ami ajilikiliwu kudi Tata nakuntemesha mukaayi, munateli kuñila ñahi nenu, ‘Wunakuhosha kasawuntu,’ muloña nahosha nami, ‘Nidi Mwana kaNzambi’?”—Yowanu 10:34-36.

Diimu, Nsona yatena niansompeshi awantu atama nawu “anzambi.” Muloñadi awaYudeya chikumwinkelawu Yesu muloña hakuhosha nindi “Nidi Mwana kaNzambi”? Nayileji chuma chikuyikwasha kutiyishisha, nahoshi nindi: “Neyi inakuzata nyidimu yaTata yami wanyi, bayi munkuhwelelaku. Ilaña neyi diyi yinnakuzata, hela chakwila himunankuhweleliku, kuhwelelenu nyidimu kulonda mwiluki  nikutwalekahu nakukuhwelela nenu Tata wadikunda nanami, ninami nawa nadikunda naTata.”—Yowanu 10:37, 38.

Chinatiyiwu chumichi, aYudeya anakukeña kumukwata Yesu, ilaña cheñi nayitemuki. Nafumi muYerusalema nawa nayi kwishinadi daYodani kwatachikililiyi kupapatishayi yaaka yiwana yinahitihu. Hatela hahalehi wanyi nakukabeta kachidiilu chakaluñalwiji kaÑaliliya.

Mazaza anenzi kudi Yesu nawa anahoshi nawu: “Yowanu hakoñelihu chihayamisha hela chimuku, ilaña yuma yejima yahosheliyi Yowanu hadi iwu muntu, yadiña yalala.” (Yowanu 10:41) Dichi aYudeya amavulu anamukuhweleli Yesu.