Yesu obiro Jerusalem e Sawo mar Walo Hekalu. Itimoga sawono mondo opargo kaka ne owal hekalu. Higni mokalo mia achiel motelo, Ruodh Siria miluongo ni Antiochus Epiphanes mar 4, ne ogero kar misango e wi kendo maduong’ man e hekalu mar Nyasaye. Bang’e, yawuot jadolo moro ma Ja-Yahudi noloyo jolwenj Siria mi gichako gibedo gi teko kendo e wi Jerusalem. Kae to ne gitimo sawo mar walo hekalu ne Jehova kendo. Chakre kanyo, koro ne itimoga rapar mar walo hekaluno tarik 25 e dwe mar Chislev higa ka higa. E kalenda ma watiyogo sani, dweno chakrega kochomo giko mar dwe mar Novemba kata chak dwe mar Desemba.

Sani koro en kinde mag koyo. Yesu wuotho e hekalu e agola miluongo ni agoch Solomon. Jo-Yahudi lwore koni gi koni kendo gipenje niya: “Ibiro miyo wasik gi kiawa nyaka karang’o? Ka in e Kristo, wachnwa ayanga.” (Johana 10:22-24) Ere kaka Yesu dhi dwokogi? Odwokogi kama: “Ne asewachonu, to e ma ok uyie.” Yesu pok nonyisogi achiel kachiel ni en e Kristo, kaka nonyiso dhako ma Nya-Samaria ma noromogo e soko mar pi. (Johana 4:25, 26) Kata kamano, nosetemo konyogi ng’eyo ni en ng’a kane owachonegi ni: “Ka Ibrahim pok nobetie, ne antie.”​—Johana 8:58.

Yesu diher ni ji onon tije motimo ka luwore gi weche ma ne okor ni Kristo ne dhi timo, kae to gifweny giwegi ni en e Kristo. Mano e momiyo kinde moko nosekwero jopuonjrene ni kik gihul ne ng’ato ang’ata ni en e Mesia. To koro sani owacho ne Jo-Yahudi mager kodego ratiro kama: “Tije ma atimo e nying Wuora chiwo neno kuoma. To ok uyie.”​—Johana 10:25, 26.

Ang’o momiyo Jo-Yahudigo ok oyie ni Yesu e Kristo? Yesu wachonegi niya: “Ok uyie nikech ok un rombena. Rombena winjo dwonda, to ang’eyogi kendo giluwa. Amiyogi ngima ma nyaka chieng’, kendo ok nokethgi ngang’, bende onge ng’at ma nomayagi e lweta. Gima Wuora osemiya en gima duong’ moloyo gik mamoko duto.” Kae to Yesu nyisogi kaka en gi winjruok maber ahinya gi Wuon mare. Owachonegi kama: “An kod Wuora wan achiel.” (Johana 10:26-30) Nikech Yesu ni e piny to Wuon-gi nie polo, ok dibed ni otemo wacho ni en e Wuon-gi. Kar mano, gin e achiel nikech gin gi winjruok achiel kod paro achiel.

Weche ma Yesu owachogo wang’o i Jo-Yahudigo e okang’ ma miyo gikwanyo kite e kindeni bende mondo gichielego otho. Timgino ok bwog Yesu kata matin. Owachonegi niya: “Ne anyisou tije mabeyo mang’eny moa kuom Wuora. Kuom tijego, en tich mane momiyo uchiela gi kite?” Gidwoke ni “Wachieli gi kite, ok nikech tich moro maber, to nikech ichayo Nyasaye; nimar . . . itimori iwuon ni in nyasaye.” (Johana 10:31-33) Yesu ne pok owachogae ni en nyasaye, omiyo ang’o momiyo jogi wacho ni owacho ni en nyasaye?

Gima Yesu temo wacho en ni en gi teko ma Jo-Yahudi paro ni Nyasaye kende e ma onego obedgo. Kuom ranyisi, nowacho e wi “rombe” kama: “Amiyogi ngima ma nyaka chieng’,” ma en gima dhano adhana dak tim. (Johana 10:28) Jo-Yahudi ok fweny wach ma Yesu osewacho ayanga ni Wuon-gi e ma omiye teko ma otiyogo.

Mondo onyis ni paro ma gin-gono ok long’o, Yesu penjogi kama: “Donge ondik e Chiku [e Zaburi 82:6] ni, ‘Ne awacho ni: “Un nyiseche”’? Ka Nyasaye noluongo joma wach Nyasaye oseketo bura kuomgi ni ‘nyiseche’ . . . an ng’at ma Wuora nopwodho mi ooro e piny, be duwachna ni, ‘Ichayo Nyasaye,’ mana nikech ne awachonu ni, ‘An Wuod Nyasaye’?”​—Johana 10:34-36.

Ee, Ndiko luongo kata mana jong’ad-bura manie piny ma ok ng’ad bura e yo makare ni,  “nyiseche.” Omiyo, ere kaka Jo-Yahudigi nyalo donjo ne Yesu nikech owacho ni ‘en Wuod Nyasaye’? Kuom mano, Yesu wachonegi wach monego okonygi fwenye. Owachonegi niya: “Ka ok atim tije mag Wuora, kik uyie kuoma. To ka atimogi, kata obedo ni ok uyie kuoma, yieuru kuom tijego, eka ung’e kendo udhi nyime ng’eyo ni Wuora ni e winjruok achiel koda, kendo an e winjruok achiel kod Wuora.”​—Johana 10:37, 38.

Weche ma Yesu owachogo miyo Jo-Yahudi temo make. Kata kamano, Yesu wuok kendo ma ok gimake. Owuok Jerusalem kae to odhi loka Aora Jordan e alwora ma Johana nochakoe tij batiso higni ma dirom ang’wen ma nosekalo. Nenore ni kanyo ok bor gi kama Nam Galili rumoego yo milambone.

Oganda maduong’ biro ir Yesu kendo giwacho kama: “Johana ok notimo kata ranyisi achiel, to gik moko duto ma Johana nowacho kuom ng’atni, osebet adier.” (Johana 10:41) Kuom mano, Jo-Yahudi mathoth keto yie kuom Yesu.