Jesu anoenda ku Jerusarema ku Dhiri ro Kupira (rinozwi Hanuka). Dhiri iri ngo ro kuceukija kupihwazve ko themberi. Makore anokhwedera 100 apera, Mambo Antioko Wocirongomuna Epifanio wo ku Siria, wakavaka dandiro panyezuru po dandiro guru ro themberi ya Mwari. Tevere, vana vo mupiri wo ciJudha vakatorazve Jerusarema vopirazve themberi kuna Jehovha. Kubvira pondhopo, kuno ciceukijo cinoithwa mu dhiya 25 yo mweji wa Kisreu unozwirana no kupera ko mweji wa Cikowe mbhera kutanga ko mweji wa Mbuji.

Inguva yo ushika (kana cipepo). Jesu ari muthemberi, muvharanda ya Soromoni. VaJudha vanomuzenengera vecimuvereketera ngo hasha veciti: “Munozotigarisa mbhera rini? Tibvunjei pa mbhene kudari uri Kristu.” (Johani 10:22-24) Jesu anopingurisa kudini? Iyena anoti: “Ndakamubvunja kare, amuzivi kunditenda.” Iyena aazivi kunasa kujekesa kamare kuti ndi Kristu inga manangire aakaita ecibvunja muSamaria paainga ari pa mwimbo. (Johani 4:25, 26) Asi anovonesa kuti iyena ndiyena Kristu paanoti: “Abrahama acito abahwa, inini ndaingepo.”—Johani 8:58.

Jesu anoda kuti vandhu vazive vega kuti iyena ndi Kristu ngo kuvona zvaari kuita no zvainga zvakaporofithwa ngo pamusoro po zvaizoita Kristu. Ndizvona zvakamuitisa kuti panguva imweni, iyena anobvunja vajiji vake kuti vatame kubvunja vandhu kuti iyena wainga Mesia. Asi wari iyena anonanga pambhene ecibvunja vaJudha ava vanomuzonda eciti: “Mabasa o ndinoita ngo zina ra Baba wangu anondiitira ufakazi. Kaveta imwimwi amutendi.”—Johani 10:25, 26.

Ngenyi avatendi kuti Jesu ndi Kristu? Iyena anoti: ‘Imwimwi amutendi, ngokuti amuripi mabvuta angu. Mabvuta angu anozwa izwi rangu. Inini ndinomaziva; iwona anonditevera. Inini ndinomapa uhomi hucingaperi. Aazofibze; apana anozomatora mu nyara jangu. Baba wangu, vaya vakandipa mabvuta aya, anosisira maningi kupinda zvese.’ Perepo iyena anovonesa kuti ano ushamwari maningi na babake, eciti: “Inini na Baba wangu tiri umwe basi.” (Johani 10:26-30) Zvecivoneka kuti Jesu ari pasi pano zve Babake vari kudenga, iyena aaripi kunangadi kamare kuti vovaviri i mundhu umwe. Asi, ivona vanoita ciro no cidisiso cimwe, vakabatana.

Magama a Jesu anoitisa kuti vaJudha vasare vakanyangajwa maningi zvokuti vanobojera mapuwe kuti vamuurae. Asi iyena aatozvithyi, zve anoti: “Ndakaita mabasa mazinji auxoni panyasi penyu, ngo simba ra Baba wangu. Ngorapi basa ro ndakaita ro munoda kundifura ndirona?” Ivona vanodavira kuti: ‘Asipi ngo ndava yo basa rauxoni ro tinoda kukufura ngo mapuwe, kaveta ngo ndava yo kuxora Mwari; ngokuti, . . . unojiita Mwari.’ (Johani 10:31-33) Jesu aazivi kumbonanga kuti iyena ndi Mwari. Waro ngenyi vanomupumbhisa kudaro?

VaJudha vanotendera kuti simba ra Jesu rinobva ka Mwari basi. Inga muezaniso, ngo pamusoro po “mabvuta,” Jesu anoti: “Inini ndinomapa uhomi hucingaperi.” I mundhunyi anokwanisa kupekeja upenyu ucikaperi? (Johani 10:28) Jesu paakananga pambhene kuti iyena wakapuwa simba ndi Babake, vaJudha avazivi kugara nazvo mu mwoyo.

Jesu anoramba kupumbhwa uku eciti: “Akuzivi kutahwa here mu mutemo wenyu [pana Nduyo 82:6, Baiberi Mazwi Akacena aMwari] kuti, ‘Ndakati, “imwimwi muri zvimwari”’? Kudari akadaninja kuti ‘zvimwari,’ kuna vayani vakagumihwa no izwi ra Mwari . . . Munovereketa ngenyi ndiyena, uwo wakagajwa ndi Baba no kumutuma panyika, kuti: ‘Unotuka Mwari,’ ngo kuti ndakananga kuti: ‘Inini ndiri Mwana wa Mwari’?”—Johani 10:34-36, BMAA.

Nee Bhaibheri rinotodaninjavo vandhu vakatoshata kuti “zvimwari.” Waro Ngenyi vaJudha vari kupekeja ndava Jesu ngo kuti wananga kuti iyena ndi “Mwana wa Mwari”? Jesu anonanga zviro zvavaidikana kukhohwa ndizvona eciti: “Ndikatama kuita mabasa a Baba wangu, mucanditenda! Kaveta ndikamaita, pikija mukaramba kunditenda, tendanyi mabasa; kudaro munozovona no kuziva kuti Baba vari mondiri, ininivo ndiri mwa Baba.”—Johani 10:37, 38.

 Masoko a Jesu anoitisa kuti vaJudha vaeje kumubata, asi anovambzengazve inga zvaakamboitaya. Perepo anobuda ku Jerusarema woambuka Murambo wa Jordhani mbhera ku ndharaundha yakatangiraya Johani kubhabhatija vandhu ku makore marongomuna apera. Zvinoita inga kuti indharaundha inowanika kakusi ngo mu mbhiripiri mo jombe ro Garireya.

Mbungano inoenda kuna Jesu yeciti: “Bzokadi Johani aazivi kuita muxamaiso uriwese; kaveta bzese bzaakananga yena ngo njio ya uu, mbzakadi.” (Johani 10:41) Ngo kudaro vaJudha vazinji vanova no gonda na Jesu.