Awor, Hesus tabata na Herúsalèm pa e Fiesta di Dedikashon (òf, Hanuká). E fiesta akí tabata pa konmemorá e rededikashon di e tèmpel. Un siglo promé, Rei Antioko IV (Epifanes) di Siria a traha un altar riba e altar grandi na e tèmpel di Dios. Mas despues, e yu hòmbernan di Matatías, un saserdote hudiu, a rekonkistá Herúsalèm i a dediká e tèmpel atrobe na Yehova. Desde e tempu ei, tur aña, riba 25 di kisleu, e luna hudiu ku tabata korespondé ku e periodo ku ta kai entre kabamentu di novèmber i kuminsamentu di desèmber, nan tabata konmemorá e rededikashon di e tèmpel.

Tabata wenter i tabata hasi friu. Hesus tabata den e tèmpel, den e galeria di Sálomon. E hudiunan a rondon’é i a kuminsá bis’é: “Pa kuantu tempu mas lo bo tene nos den suspenso? Si bo ta Kristu, bisa nos frankamente.” (Huan 10:22-24) Kon Hesus a reakshoná? Wèl, el a bisa nan: “Mi a bisa boso, ma boso no ta kere.” Hesus no a bisa nan direktamente ku e ta e Kristu, manera el a bisa e señora samaritano na e pos. (Huan 4:25, 26) Pero na un manera indirekto, el a laga nan sa ken e ta, bisando: “Promé ku Abraham a yega di eksistí, mi tabata eksistí.”—Huan 8:58.

Hesus tabata ke pa e hendenan mes yega na e konklushon ku e ta e Kristu. E tabata ke pa nan analisá loke e Skritura a profetisá tokante e Kristu i kompará esakinan ku su obranan. P’esei, na vários okashon el a bisa su disipelnan pa no bisa ningun hende ku e ta e Mesías. Pero awor el a bisa e hudiunan hostil akí bon kla: “E obranan ku mi ta hasi den nòmber di mi Tata ta duna testimonio di mi. Ma boso no ta kere.”—Huan 10:25, 26.

Dikon e hudiunan akí no tabata kere ku Hesus ta e Kristu? Hesus a bisa nan: “Boso no ta kere, pasobra boso no ta mi karnénan. Mi karnénan ta skucha mi stèm, i mi konosé nan, i nan ta sigui mi. I lo mi duna nan bida eterno, i hamas nan lo ser destruí, i ningun hende lo no ranka nan for di mi man. E karnénan ku mi Tata a duna mi ta mas balioso ku tur otro kos.” Anto pa mustra ku e tabatin un bon relashon ku su Tata, Hesus a bisa nan: “Ami ku e Tata ta ún.” (Huan 10:26-30) Hesus tabata na tera i su Tata ta den shelu, pues e no por tabata ke men ku e i su Tata ta mesun persona. E tabata referí na e union ku tin entre e i su Tata i na e echo ku nan tin mesun propósito.

E palabranan akí a pone e hudiunan rabia asina tantu ku nan a bolbe kue piedra pa dal Hesus mata. Pero Hesus no a laga nan intimid’é. El a bisa nan: “Mi a mustra boso hopi bon obra di parti di mi Tata. Pa kua di nan boso ta piedra mi?” Nan a kontest’é: “No ta pa un bon obra ku bo a hasi nos ta piedra bo, sino pa blasfemia, pasobra . . . bo ta pretendé ku bo ta un dios.” (Huan 10:31-33) Nunka Hesus a pretendé ku e ta un dios. Dikon anto nan tabata akus’é di esei?

Segun e hudiunan, e poder ku Hesus tabata bisa ku e tin ta pertenesé solamente na Dios. Por ehèmpel, Hesus a bisa ku lo e duna ‘su karnénan’ “bida eterno.” I bon mirá, ningun hende no por hasi esei. (Huan 10:28) Pero e hudiunan a pasa por alto di e echo ku Hesus a risibí outoridat di su Tata, manera e mes a deklará públikamente.

Pa refutá nan akusashon falsu, Hesus a puntra nan: “No ta pará skirbí den boso Lei [na Salmo 82:6] ku Dios a bisa: ‘Boso ta dios’? Si Dios a yama esnan ku su palabra a kondená ‘dios’ . . . , kon anto boso por bisa ami, ku e Tata a santifiká i manda na mundu: ‘Bo ta blasfemá,’ pasobra mi a bisa ku mi ta Yu di Dios?”—Huan 10:34-36.

Sí, e Skritura ta yama asta huesnan inhustu, hende imperfekto, “dios.” Dikon anto e hudiunan tabata kritiká Hesus pasobra e tabata bisa ku e  ta “Yu di Dios”? Anto Hesus a bisa nan algu ku lo mester a konvensé nan. El a bisa: “Si mi no ta hasi e obranan di mi Tata, no kere mi. Ma si mi ta hasi nan, asta si boso no ta kere ami, kere e obranan, pa asina boso por haña sa i sigui kere ku e Tata ta den union ku mi i ami ta den union ku e Tata.”—Huan 10:37, 38.

Kon e hudiunan a reakshoná? Nan a purba di gar’é, ma el a bolbe skapa for di nan. El a bandoná Herúsalèm i bai na otro banda di Riu Yordan, kaminda Huan a kuminsá batisá hende un kuater aña promé. Kaminda Hesus a bai kisas no tabata muchu leu di e parti zùit di Laman di Galilea.

Hopi hende a bini serka Hesus i tabata bisa otro: “Huan mes no a hasi ni ún milager, ma tur loke Huan a bisa di e hòmber akí tabata bèrdat.” (Huan 10:41) Pues, hopi hudiu a pone fe den Hesus.