Jesus kam long Jerusalem for wanfala hipap wea olketa Jew kolem Hanukkah. Winim 100 year bifor, King Antiochus IV Epiphanes bilong Syria tekovarem Jerusalem and wakem wanfala altar antap long altar long temple bilong God. Bihaen, olketa son bilong wanfala priest bilong olketa Jew tekem bak Jerusalem and dedicatem moa temple long Jehovah. Disfala hipap, Hanukkah, hem for celebratem datwan. Olketa Jew celebratem diswan evri year long Chislev 25. Datfala month Chislev hem long end long November and start long December.

Hem cold season and Jesus hem wakabaot insaed long temple long area wea olketa kolem, Varanda bilong Solomon. Olketa Jew hipap raonem hem and sei: “Hao nao iu no talem mifala hu nao iu? Sapos iu nao Christ, talem kam stret nomoa!” (John 10:22-24) Jesus sei long olketa: “Mi talem iufala finis, bat iufala nating bilivim mi.” Jesus talem stret long wanfala woman bilong Samaria hem nao Christ, bat hem no duim olsem long olketa Jew hia. (John 4:25, 26) Nomata olsem, hem showimaot klia hu nao hem. Hem talem olketa finis: “Bifor Abraham hem born, mi stap finis.”—John 8:58.

Jesus laekem pipol for comparem wanem hem duim witim wanem olketa profesi sei Christ bae duim, mekem olketa seleva luksavve hem Christ. Dastawe samfala taem hem talem olketa disaepol for no talem eniwan hem nao datfala Messiah. Bat distaem hem tok stret long olketa Jew wea againstim hem and sei: “Olketa samting wea mi duim long nem bilong Dadi bilong mi showimaot hu nao mi. Bat iufala no biliv.”—John 10:25, 26.

Why nao olketa no bilivim Jesus hem datfala Christ? Hem sei: “Iufala no biliv bikos iufala no olketa sheepsheep bilong mi. Olketa sheepsheep bilong mi herem toktok bilong mi, and mi savve long olketa, and olketa followim mi. Bae mi mekem olketa laef olowe. No eniwan long olketa bae dae and no eniwan bae tekem olketa from mi nao. Olketa sheepsheep wea Dadi givim long mi olketa important winim evri nara samting and no eniwan savve tekem olketa from Dadi long heven.” Then for strongim long olketa wei wea hem fren gud witim Dadi bilong hem, Jesus sei: “Mi and Dadi long heven, mitufala wan mind nomoa.” (John 10:26-30) Nomata Jesus hem stap long earth and Dadi bilong hem stap long heven, tufala wan mind and waka tugeta.

Toktok bilong Jesus mekem olketa Jew kros tumas so narataem moa olketa tekem ston for sutim hem dae. Jesus no fraet, bat hem sei: “Iufala lukim mi duim plande gudfala samting wea Dadi long heven talem mi for duim. So wanem samting wea mi duim nao mekem iufala laek sutim mi long ston?” Olketa sei: “Hem no from iu duim gudfala samting nao mifala laek sutim iu long ston. Mifala laek sutim iu bikos long rabis samting wea iu talem. Iu tingse iu wanfala god.” (John 10:31-33) No enitaem Jesus sei hem wanfala god, so why nao olketa accusim hem olsem?

Jesus sei hem garem paoa wea long tingting bilong olketa Jew, God nomoa garem. Olsem example, hem sei: “Bae mi mekem olketa [sheepsheep] laef olowe.” Datwan hem samting wea no eni man long earth savve duim. (John 10:28) Nomata Jesus talem stret long olketa Jew hem kasem paoa from Dadi bilong hem, olketa no laek tingim datwan.

For showimaot samting olketa talem hem no tru, Jesus sei: “Long Law bilong iufala [long Psalm 82:6], God hem sei, ‘Iufala olketa god,’ iaman? Long olketa Holy Raeting, God hem kolem olketa man wea hem judgem, long ‘god’ . . . Bat Dadi long heven nao sendem mi kam long world and markem mi for duim spesol waka, so hao nao iufala sei mi talem rabis samting taem mi sei mi Son bilong God?”—John 10:34-36.

Olketa Holy Raeting kolem olketa judge wea no duim stret samting “olketa god.” So hem no stret for olketa Jew accusim Jesus taem hem sei: “Mi Son bilong God.” Hem storyim samting wea shud mekem olketa bilivim datwan. Hem sei: “Sapos mi no duim samting wea Dadi bilong mi laekem mi for duim, iufala  no biliv long mi. Bat sapos mi duim samting wea Dadi bilong mi laekem, biliv long datwan. Maet iufala no biliv long mi, bat biliv long samting wea mi duim mekem iufala savve, and gohed for savve, mi and Dadi long heven, mitufala wan mind.”—John 10:37, 38.

Taem Jesus tok olsem, olketa Jew trae for holem hem moa, bat hem ranawe. Hem lusim Jerusalem and go moa long narasaed long Jordan River long ples wea John baptaesim pipol samting olsem fofala year bifor. Luk olsem disfala ples hem klosap nomoa long south saed long Sea long Galilee.

Staka pipol kam long Jesus and sei: “John no duim eni mirakol, bat evri samting wea hem talem abaotem disfala man hem tru.” (John 10:41) So staka Jew biliv long Jesus.