Tsëpitaqa, Templu Ushatsi fiestamanmi Jesusqa ëwarqan, tsëtaqa Janucä nirpis reqiyanmi. Tsë fiestaqa, templuta yapë ushatsiyanqantam yarpätsikoq. Pachak watapitapis masnam pasarishqa karqan Jerusalenman Siria nacion tröpankuna yëkushqa kanqampita, tsë witsanmi Antïocu IV Epïfanis rey, Diospa templunchö këkaq altar jananman juk diospaq altarta rurashqa karqan. Tiempuwannam, juk judïu sacerdötipa tsurinkuna altsayarqan y templuta Jehoväpaq yapë ushatsiyarqan. Tsëpita patsëmi, kislev killapa 25 kaq junaqninchö tsë fiestata celebrayan. Tsë killaqa kaq, noviembri killa ushëpita diciembri killa qallananyaqmi.

Tamya witsanmi kaq y alläpam alalaq. Jesusqa templuchömi purikarqan, Salomonpa columnakunayoq pasadïzunchö, y tsëchömi judïukuna jirurüriyarqan y kënö tapuyarqan: “¿Imëyaqtaq yarpakachätsiyämar katsiyämanki? Qam Cristu karqa, cläru willëkayämë” (Juan 10:22-24). Jesusnam kënö nirqan: “Qamkunataqa willayarqoqnam, peru qamkunaqa manam creiyankitsu”. Pëqa manam Samaria warmitanötsu Diospa Akrashqan kanqanta pëkunata defrenti nishqa karqan (Juan 4:25, 26). Pï kanqantaqa, “Abrahan manaraq kaptinmi, noqaqa karqäna” nirmi musyatsikushqa karqan (Juan 8:58).

Jesusqa pë Cristu kanqanta kikinkuna cuentata qokuyänantam munarqan, y tsëtaqa rurayänan karqan, pë rurëkanqankunata Diospa Akrashqan imakunata ruranampaq kaqta Diospa Palabranchö leyishqa kayanqanwan igualatsirmi. Tsërëkurmi, pï kanqanta pitapis mana willakuyänampaq qateqninkunata nishqa karqan. Peru tsë kutiqa judïukunatam cläru kënö nirqan: “Teytäpa jutinchö ruranqä rurëkunam, noqa pï kanqäta musyatsikun. Peru qamkunaqa manam creiyankitsu” (Juan 10:25, 26).

¿Imanirtaq Jesus Cristu kanqantaqa creiyaqtsu? Pëmi kënö nirqan: “Qamkunaqa manam creiyankitsu, porqui qamkunaqa manam üshäkunatsu kayanki. Üshäkunaqa qayanqätam wiyayan, y noqaqa pëkunata reqïmi, y pëkunaqa qatiräyämanmi. Noqaqa imëyaqpis kawakïtam pëkunata qö, y manam ni imëpis ushakätsishqatsu kayanqa, y manam ni pipis makïpita qochimanqatsu. Teytä qomanqanqa wakin kaq cösaskunapitapis mas precisaqmi”. Tsëpitanam Teytanwan alläpa kuyanakuyanqampaq parlar kënö nirqan: “Noqawan Teytaqa juknöllam kayä” (Juan 10:26-30). Peru Jesusqa Patsachömi këkarqan y Teytanqa ciëluchömi, tsëmi jukllëllaqa kayarqantsu. Sinöqa, alläpa kuyanakurnin y juntu trabajarninmi juknöllaqa kayan.

Judïukunaqa tsënö ninqampitam tsampir wanutsita munayarqan, peru Jesusqa manam mantsakarqantsu. Kënömi nirqan: “Teytä mandamaptinmi mëtsika alli rurëkunata qamkunata rikätsiyarqoq. ¿Mëqan kaq rurëpitataq rumiwan tsampiyämanki?”. Judïukunanam, ‘manam allikunata ruranqëkipitatsu rumiwan tsampiyaq, sinöqa Diosta ofendir dios tukunqëkipitam’ niyarqan (Juan 10:31-33). Jesusqa manam ni imëpis Dios kanqantaqa nishqatsu karqan, tsëqa, ¿imanirtaq tsënö acusayarqan?

Dios katsinqan poderyoq kanqanta Jesus nishqa kaptinmi, peru judïukunaqa tsë poderyoqqa Dioslla kanqantam niyaq. Jukqa karqan, qateqninkunata kënö nishqa kanqampitam: “Noqaqa imëyaqpis kawakïtam pëkunata qö” (Juan 10:28). Peru judïukunaqa, Teytampita autoridäta chaskishqa kanqanta ninqantaqa manam cuentapaqtsu churashqa kayarqan.

Dios tukunqanta nir acusayaptinmi, Salmus 82:6 textupita parlar kënö nirqan: “¿Manaku Leynikikunachö kënö qellqarëkan: ‘Noqam  nirqö: “Qamkunaqa dioskunam kayanki”’ nir? Diosqa, parlar condenanqan kaqkunapaqpis ‘dioskuna’ ninmi [...], tsëqa, ¿imanirtaq noqataqa Teyta akramashqa këkaptin y nunakunaman kachamashqa këkaptin, ‘Diospa Tsurinmi kä’ ninqäpita ‘Diosta ofendipam parlanki’ niyämanki?” (Juan 10:34-36).

Diospa Palabranqa, mana allita ruraq juezkunapaqpis “dioskuna” ninmi. Peru Jesusqa “Diospa Tsurinmi kä” nirqanllam, tsëmi judïukunaqa mana ninqampita acusëkäyarqan. Tsëmi pëkunata cläru kënö nirqan: “Teytäpa rurëninkunata mana ruraptïqa, ama creiyämëtsu. Peru pëpa kaqta ruraptïqa, noqata mana creimarpis, ruranqäkunam creiyë, tsënöpa Teyta noqawan juknölla kanqanta, y noqa Teytawan juknölla kanqäta musyayänëkipaq” (Juan 10:37, 38).

Jinan höram tsarita tïrayarqan, peru Jesusqa escapakurqanmi. Jerusalenpita yarqurirmi, Jordan mayuta tsimparir Juan bautizar qallanqan sitiuman ëwarqan. Tsëqa Galilëa qochapa ura kaq lädunmampatsunchi këkan.

Tsëchö këkaqkunam kënö ninakuyarqan: “Juanqa manam ni juk señal-llatapis rurarqantsu, peru kë nunapaq Juan ninqankunaqa rasumpa kaqllam llapampis kashqa” (Juan 10:41). Tsëmi Jesusman markäkur qallëkuyarqan.