Chaymantam Jesusqa Jerusalenman rirqa ‘Diospa wasinta yuyarinapaq fiestaman’. Chay fiestawanmi Diospa wasin chuyanchasqa kasqanta yuyariqku. Yaqa 100 wata masnin ñawpaqtam Siriamanta runakuna Jerusalenman yaykururqaku, chaypim Antioco Epifanes kamachiqninku runa Diospa hatun altarninpi taytacha-mamachapaq altarta ruwarurqa. Ichaqa chaymanta qipamanmi judio casta sacerdotepa churinkuna Jerusalenpi chay wasita kaqmanta Diospaq sapaqcharqaku. Chaytam fiestata ruwaspa watan-watan yuyariqku. Chay fiestaqa qallariq 25 kislev killamantam, chay killaqa noviembre chawpi killamanta diciembre chawpi killakamam karqa.

Chay killakunaqa paranan hinaspa chirinan tiempoñam karqa. Jesusñataqmi Diospa wasin ukupi purichkarqa, hinaptinmi judiokuna chawpicharuspanku nirqaku: “¿Haykapikamataq iskayrayachiwankiku? Cristo kaspaykiqa clarotayá willawayku”, nispa (Juan 10:22-24). Jesusñataqmi nirqa: “Qamkunamanqa nirqaykichikñam, ichaqa manam creenkichikchu”, nispa. Jesusqa manam Samaria lawmanta warmiman hinaqa pimanpas nirqachu ‘ñuqam Cristoqa kani’ nispaqa (Juan 4:25, 26). Chaywanpas Cristo kasqantaqa qawachirqañam kaynata nispan: “Manaraqpas Abrahan kachkaptinmi ñuqaqa karqaniña”, nispa (Juan 8:58).

Jesusqa Diospa kachamusqan kasqanmanta runakuna kikillanku musyanankutam munarqa, payqa ruwasqanta Diospa palabranpi willakuykunawan tupachispa musyanankutam munarqa. Chayraykum qatiqninkunamanpas nirqa pim kasqanmanta ama willakunankupaq. Ichaqa chay runakunatam kaynataña nirqa: “Taytaypa sutinpi ruwasqaykunam ñuqamanta willakun. Qamkunaqa manam creenkichikchu”, nispa (Juan 10:25, 26).

Hinaspam imanasqa iskayrayasqankumanta nirqa: ‘Qamkunaqa manam creenkichikchu ñuqapa ovejaykuna mana kasqaykichikrayku. Ovejaykunaqa ecoytam uyarin ñuqapas paykunataqa riqsinim, paykunaqa qatiwantaqmi. Ñuqam wiñay kawsayta paykunaman quni, manam haykapipas chinkanqakuchu, manataqmi makiymantaqa pipas qichuwanqachu. Taytaypa quwasqanqa imakunamantapas aswan valorniyuqmi’, nispa. Hinaspam taytanwan imayna kasqankumanta nirqa: “Taytaywan ñuqaqa hukllam kaniku”, nispa (Juan 10:26-30). Ichaqa manam taytanwan huk runalla kasqanmantachu rimachkarqa, aswanqa imapas ruwanankupaq huklla kasqankumantam.

Judiokunañataqmi Jesuspa rimasqanwan llumpayta piñakuspa rumiwan chuqaparuyta munarqaku. Jesusmi ichaqa mana manchakuspan nirqa: “Taytay kamachiwaptinmi achkallaña allin ruwaykunata qawachirqaykichik. Chaynaqa, ¿mayqin ruwasqaykunamantam chuqapawayta munankichik?”, nispa. Judiokunañataqmi nirqaku: ‘Manam allin ruwasqaykimantachu, aswanqa Diospa contranpi mana allinkuna rimasqaykimantam, qamqariki kikikim dios tukuchkanki’, nispa (Juan 10:31-33). Ichaqa manam haykapipas Jesusqa Dios kasqantaqa nirqachu.

Aswanqa atiyniyuq kasqallantam qawachirqa ovejakunamanta kaynata nispan: “Ñuqam wiñay kawsayta paykunaman quni”, nispa (Juan 10:28). Judiokunapaqmi ichaqa Jehova Dioslla atiyniyuq karqa, chaymi Jesustaqa dios tukuq kasqanpaq tumpaqku. Chaymantapas yanqapaqmi hapirqaku Jesusman taytan atiy qusqantaqa.

Chaymi yanqamanta tumpasqankuta qawachinanpaq Jesusqa Salmo 82:6 nisqanmanta nirqa: ‘¿Manachu Moisespa leyninpi Diosqa nichkan: “Ñuqam nirqani: ‘Qamkunaqa dioskunam kankichik’, nispa?”. “Dioskuna” nispanmi suticharqa palabranwan sentenciasqa kaqkunata. Ñuqataqa  hanaq pacha taytam chuyanchawaspan runakunaman kachamuwarqa, ¿hinaptinchu Diospa churinmi kani nisqayrayku niwankichik, “Diospa contranpim rimanki” nispa?’ (Juan 10:34-36).

Diospa qillqankunapiqa “dioskuna” ninmi mana allin ruwaq juezkunamantapas. Hinaptinqa, ¿imanasqataq “Diospa churinmi kani” niptillan Jesusta wañurachiyta munarqaku? Jesusqa nirqataqmi: “Taytaypa ruwanankunata mana ruwaptiyqa amayá creewaychikchu. Ruwaptiyyá ichaqa ñuqata mana creewaspapas ruwasqaykunata creeychik, chaynapi hanaq pacha taytay ñuqawan huklla kasqanta hinaspa ñuqapas paywan huklla kasqayta yachanaykichikpaq chaynataq hinalla entiendenaykichikpaq”, nispa (Juan 10:37, 38).

Hinaptinmi judiokunaqa Jesusta hapirunankupaq pawaykurqaku, Jesusmi ichaqa lluptikurqa. Payqa Jerusalenmantam Jordan mayupa wak lawninman ayqikurqa, chaypim bautizaq Juanqa yaqa tawa wata ñawpaqta runakunata bautizarqa.

Chaymanmi achka runakuna Jesusman rirqaku kaynata ninakuspanku: “Juanqa manam chulla milagrollatapas ruwarqachu, ichaqa kay runamanta tukuy ima nisqanqa chiqapmi kasqa”, nispa (Juan 10:41). Hinaptinmi achkallaña Jesuspi iñikurqaku.