Jesusmi Jerusalenman jamuran templo ch’uyanchay fiestaman. Yaqa 200 wata jinañan juj rey templopi kaq altar patapi juj altarta ruwachisqa. Chaymi juj sacerdoteq wawankuna Jerusalén llaqtata libraspa templota ch’uyanchachisqaku Jehová Diospaq. Chaymantapachan judiokunaqa sapa wata juj fiestata ruwaqku kislev killapi 25 p’unchaypi, chay killaqa noviembre, diciembre killakuna ukhupin karan.

Chiri tiempon chayqa karan. Templopi Jesús purishaqtinmi judiokuna payta muyuykuspa niranku: “¿Jayk’aqkaman mana willawankikuchu pichus kasqaykita? Cristo kanki chayqa, sut’intayá niwayku”, nispa (Juan 10:22-24). Jinan Jesusqa niran: ‘Ñamá riki niraykichisña, qankunataq mana creewankichischu’, nispa. Manaña Jesusqa sut’intachu willakuran Mesías kasqanta chaypas, niranmi: “Manaraq Abrahán kashaqtinqa ñan noqaqa karaniña”, nispa (Juan 4:25, 26; 8:58). Chaywanmi willakusharan pichus kasqanta.

Jesusqa imachus ruwasqankunata rikuspa runakuna pay Cristo kasqanta reparanankutan munaran. Chaymi askha kutipi kamachikuran ama pimanpas Mesías kasqanta willanankupaq. Chay judiokunatan ichaqa niran: “Yayaypa sutinpi imaymanakuna ruwasqaymi noqamantaqa sut’ita willakun. Qankunan ichaqa mana creenkichischu”, nispa (Juan 10:25, 26).

Jinaspan Jesusqa imaraykus mana paypi iñisqankuta rikuchinanpaq niran: “Qankunan ichaqa mana creenkichischu, mana ovejaykunachu kasqaykichisrayku. Ovejaykunaqa uyarinkun kunkayta, noqapas reqsinin paykunataqa, paykunataq qhepayta jamunku. Noqaqa wiñay kausaytan paykunaman qosaq, chhaynapin mana jayk’aqpas wañunqakuchu, manataqmi pipas makiymantaqa qechuwanqachu. Yayaypa qowasqankunaqa tukuy imamantapas aswan allinmi”, nispa. Chaymantataq niran: “Noqawan Yayawanqa jujllan kayku”, nispa (Juan 10:26-30). Chaywanmi Jesusqa rikuchisharan Yayanwan juj yuyaylla kasqanta.

Judiokunan ichaqa chaywan phiñakuspa rumikunata oqarikuranku Jesusta ch’aqenankupaq. Jinan Jesusqa niran: “Yayaymanta kaq askha allin ruwaykunatan qankunaman rikuchiraykichis, chaykunamanta ¿mayqen kaqmantataq qankunari ch’aqewankichis?”, nispa. Paykunataq niranku: ‘Manan imapas allin ruwasqaykimantachu ch’aqeshaykiku, aswanpas Diosta k’amisqaykimantan, “diosmi kani” nisqaykimantawan’, nispa (Juan 10:31-33). Jesusqa manan jayk’aqpas “diosmi kani” niranchu. Chhaynaqa, ¿imanaqtintaq chhaynatari tumpasharanku?

Wakin nisqankunata pantasqata entiendesqankuraykun. Paykunapaqqa Diosllan wiñay kausaytaqa qoyta atinman karan, chaymi phiñakuranku Jesús: “Noqaqa wiñay kausaytan [ovejaykunaman] qosaq”, nispa niqtin (Juan 10:28). Ichaqa ñan Jesusqa willaranña Diospa atiyninwan chayta ruwanan kasqanta, chay judiokunataq mana chayta yuyarirankuchu.

Chaymi Jesusqa niran: “¿Manachu chaskisqaykichis kamachikuy simipi Diosqa nishan: ‘Qankunaqa dioskunan kankichis’, nispa? Arí, Diosqa ‘dioskuna’ nispan niran simin qelqaq juchachasqan runakunata [...]. Noqaqa kani Diospa ch’uyanchasqan runan, paymi kay pachamanpas kachamuwan; qankunataq ichaqa ‘Diospa Churinmi kani’ nisqayrayku: ‘Diostan pisichaspa k’amishan’, niwashankichis”, nispa (Salmo 82:6; Juan 10:34-36).

Chhaynaqa manan razón karanchu Jesusta juchachashanankupaqqa. Chaymi Jesusqa niran: ‘Manachus Yayaypa munayninta ruwashani  chayqa, ama creewaychischu. Ichaqa ruwashanichus chayqa, manaña rimasqayrayku creenkichischu chaypas, creeychisyá ruwasqaykunaraykullapas; chhaynapin entiendenkichis Yayaqa noqawan jujllachasqa kasqanta, noqataq Yayawan jujllachasqa kasqayta’, nispa (Juan 10:37, 38).

Jinan judiokunaqa Jesusta jap’iyta munaranku, Jesusmi ichaqa chaymanta ayqekuran. Chaymantataq payqa Jerusalenmanta ripuspa Jordán mayuta chimparan, jinaspa maypichus bautizaq Juan bautizayta qallariran chay ladoman riran. Chayqa cercallan kashanman karan Galilea qochamanta.

Chaypin askha runakuna Jesusman riranku, jinaspa ninakuranku: “Juanqa manaña juj milagrollatapas ruwaranchu chaypas, kay runamanta tukuy ima rimasqanqa cheqaqmá kasqa”, nispa (Juan 10:41). Jinan askha runakuna Jesuspi iñiranku.