Te Yesus e kon na Yerusalem, den sma e hori a fesa fu memre a ten di a tempel ben gi abra na Gado baka. Den e kari a fesa disi Hanuka. Moro leki wán hondro yari na fesi, Kownu Antiokus IV Epifanes fu Siria, ben bow wan altari na tapu a bigi altari na ini a tempel fu Gado. Bakaten den manpikin fu wan Dyu priester ben teki Yerusalem abra baka èn den ben gi a tempel abra baka na Yehovah. Sensi a ten dati den ben e hori wan fesa ibri yari na tapu 25 Kislef fu a Dyu kalender. A mun disi e bigin na a kaba fu november èn a e kaba na a bigin fu december.

A de a kowru ten fu a yari èn Yesus e waka na ini a tempel na ini a gadri fu Salomo. Ne den Dyu lontu en èn den taigi en: „O langa yu o meki wi wakti? Efu yu na a Krestes, dan taigi wi dati krin” (Yohanes 10:22-24). San Yesus o piki den? A e taki: „Mi taigi unu, ma toku unu no e bribi.” Yesus no taigi den langalanga taki en na a Krestes neleki fa a ben taigi a Samaria uma na a peti (Yohanes 4:25, 26). Ma toku a ben sori den suma na en. A ben taki: „Fosi Abraham ben de, mi ben de kaba.”​—Yohanes 8:58.

Yesus wani taki den sma srefi musu kon frustan taki en na a Krestes. Den ben o frustan dati te den ben o luku san a e du èn san den profeititori ben taki fu a Krestes. Dati meki Yesus taigi den disipel na tra okasi taki den no musu taigi sma taki en na a Mesias. Ma now a e taigi den ogri-ati Dyu disi krin: „Den sani di mi e du na ini a nen fu mi Tata, e sori krin taki na mi. Ma unu no e bribi.”​—Yohanes 10:25, 26.

Fu san ede den no e bribi taki Yesus na a Krestes? Yesus e taki: „Unu no e bribi, fu di unu a no mi skapu. Mi skapu e arki mi sten. Mi sabi den èn den e waka na mi baka. Mi o gi den têgo libi èn den no o dede kwetikweti. Nowan sma o puru den na mi anu. Den skapu di mi Tata gi mi prenspari moro ala tra sani.” Dan Yesus e taigi den o bun a de nanga en Tata. A e taki: „Mi nanga a Tata na wán” (Yohanes 10:26-30). Yesus de dyaso na grontapu èn en Tata de na hemel. Sobun, a no kan de so taki en nanga en Tata na wán sma. Den de wán fu di den e denki a srefi èn den e wroko leki wán man fu doro a srefi marki.

Den sani di Yesus taki e meki den Dyu ati bron so te, taki den e piki ston baka fu ston en kiri. Ma Yesus no e frede. A e taki: „Mi sori unu furu moi sani di a Tata taigi mi fu du. Fu sortuwan fu den sani disi unu wani ston mi kiri?” Den e taigi en: „A no fu di yu du wan moi sani, meki wi wani trowe ston na yu tapu fu kiri yu, ma na fu di yu afrontu Gado. . . . Yu meki yusrefi tron wan gado” (Yohanes 10:31-33). Ma noiti Yesus taki dati en na wan gado. Sobun, fu san ede den e krutu en fu a sani disi?

We, Yesus taki dati a abi a makti fu du son sani, ma den Dyu feni taki na Gado wawan abi a makti fu du den sani dati. Fu eksempre, Yesus taki dati a „o gi têgo libi” na den „skapu”, ma libisma no man du so wan sani (Yohanes 10:28). Den Dyu e frigiti taki Yesus taki krin dati a kisi a makti disi fu en Tata.

Yesus e sori den taki a sani di den taki no tru. A e taigi den: „Na ini a Wèt fu unu [na Psalm 82:6] Gado skrifi: ’Mi taki: „Unu na gado”’, a no so? Gado e kari den sma di a krutu ’gado’. . . . Mi na a sma di Gado meki kon santa èn di a seni kon na grontapu. Sobun, fa unu kan taigi mi: ’Yu afrontu Gado’, fu di mi taki dati mi na Gado Manpikin?”​—Yohanes 10:34-36.

Iya, srefi den libisma krutuman di e du kruka sani Gado Wortu e kari „gado”. Sobun, fa den Dyu disi kan krutu Yesus fu di a taki, „Mi na Gado Manpikin”? Dan Yesus e taigi den wan sani di musu overtoigi den: „Efu mi no e du den sani di  mi Tata taigi mi fu du, dan un no musu bribi mi. Ma efu mi e du den, dan bribi den sani di mi e du, awansi unu no wani bribi mi. Dan unu o sabi now èn fu ala ten taki a Tata de wán nanga mi èn mi de wán nanga a Tata.”​—Yohanes 10:37, 38.

Di Yesus taki a sani disi den Dyu pruberi fu grabu en, ma disi leisi srefi a man lowe gowe. A e gowe libi Yerusalem, dan a e abra Yordan-liba go na a presi pe Yohanes bigin dopu sma sowan fo yari pasa. Soleki fa a sori, dan a presi disi no fara fu a zuidsei syoro fu a Se fu Galilea.

Ipi-ipi sma e kon na en èn den e taki: „Yohanes no du nowan wondru, ma ala den sani di Yohanes taki fu a man disi, tru” (Yohanes 10:41). A de krin taki furu Dyu e bribi na ini Yesus.