Yesu wanguluta ku Yerusalemu kuchichita Phwandu Lakupaturiya nyumba yakusopiyamu (pamwenga kuti Hanuka). Phwandu lenili lachitikanga kuti akumbukiyi zuŵa lo angupaturiya so nyumba yakusopiyamu. Vyaka vakujumpha 100 kuvuli, Fumu ya Asiriya Antiochus IV Epiphanes, wanguzenga malu ngakuperekiyapu sembi kwa achiuta aboza pachanya pa malu ngakulu ngakuperekiyapu sembi munyumba yakusopiyamu yaku Chiuta. Pati pajumpha nyengu, ŵana aku Matatiyo yo wenga wasembi wachiyuda, angulonda Yerusalemu, ndipu nyumba yakusopiyamu anguyipaturiya so kwaku Yehova. Kwambiya pa nyengu yeniyi, phwandu la pachaka layambanga pa 25 Kisilevi. Mwezi wa Kisilevi utamba kukumaliya kwa mwezi wa November ndipu umala kukwambiriya kwa mwezi wa December.

Nyengu iyi, mwenga mu chipwepwi ndipu Yesu wayendanga munyumba yakusopiyamu mukhondi lavipilala laku Solomoni. Pavuli paki, Ayuda angumuzunguliya ndipu angwamba kumufumba kuti: “Kumbi utisuzgengi maŵanaŵanu mpaka zuŵanji? Asani ndiwi Khristu, tikambiyi ŵaka kwambula kubisa.” (Yohane 10:22-24) Kumbi Yesu wanguŵamuka wuli ŵanthu ŵenaŵa? Iyu wanguti: “Ndakukambiyani kali kweni mugomezga cha.” Yesu wanguŵavumbuliya cha kuti iyu ndi Khristu nge po wanguchitiya ndi munthukazi waku Samariya yo wangukumana nayu pa chisimi. (Yohane 4:25, 26) M’malu mwaki, iyu wangukamba ŵaka vinthu vo vatingi viŵawovyengi kuziŵa kuti iyu ndi Khristu. Iyu wanguti: “Abrahamu wechendaŵeku, ini ndipu ndiliku kali.”—Yohane 8:58.

Yesu wakhumbanga kuti ŵanthu aziŵi ŵija kuti iyu ndi Khristu asani awona kuti vo iyu wachita viyanana ndi vo vingukambikiya limu kuti Khristu wazamuchita. Ndichu chifukwa chaki nyengu zinyaki wakambiyanga akusambira ŵaki kuti angakambiyanga munthu weyosi cha kuti iyu ndi Mesiya. Kweni pa nyengu iyi wangukambiya Ayuda akususka ŵenaŵa kuti: “Ntchitu zo ndichita mu zina la Ada ndizu zipereka ukaboni wakukwaskana ndi ini. Kweni mugomezga cha.”—Yohane 10:25, 26.

Ntchifukwa wuli ŵanthu ŵenaŵa alekanga kugomezga kuti Yesu ndiyu Khristu? Yesu wangukamba kuti: “Mugomezga cha, chifukwa ndimwi mbereri zangu cha. Mbereri zangu zituvwa mazu ngangu, ini nditiziziŵa ndipu zitindilondo. Nditizipaska umoyu wamuyaya ndipu zazamunangikapu cha, kweniso palivi weyosi yo wazakuzikwatapuwa mumanja mwangu. Cho Ada andipaska, ntchakuzirwa kuluska vinthu vinyaki vosi.” Pavuli paki, Yesu wangukamba kuti iyu ndi Awisi akoliyananga ukongwa. Iyu wanguti: “Ini ndi Ada te amoza.” (Yohane 10:26-30) Pa nyengu iyi, Yesu wenga pacharu chapasi ndipu Awisi ŵenga kuchanya. Mwaviyo, Yesu wang’anamuwanga kuti iyu ndi Awisi ndi munthu yumoza chayiyu cha. M’malu mwaki wang’anamuwanga kuti mbakukoliyana ndipu chilatu chawu ntchimoza.

Ayuda angukwiya ukongwa chifukwa cha mazu ngo Yesu wangukamba ndipu anguto so mya kuti amubayi. Kweni Yesu wanguchita mantha cha ndi venivi. M’malu mwaki wanguŵakambiya kuti: “Ndakulongoni ntchitu zinandi zamampha zakutuliya kwa Ada. Pa ntchitu zenizi, ndi nizi zo zakuchitiskani kuti mundiponyi mya?” Ayuda wo angumumuka kuti: “Titikuponya mya chifukwa cha ntchitu yamampha cha, kweni chifukwa chakuti unyoza Chiuta. Pakuti . . . utijiwona kuti ndiŵi chiuta.” (Yohane 10:31-33) Yesu wangukambapu cha kuti iyu ndi chiuta. Nanga ntchifukwa wuli Ayuda amumbanga mulandu wenuwu?

Yesu wakambanga kuti iyu we ndi nthazi zo Ayuda agomezganga kuti ndi Chiuta pe yo watenere kuja nazu. Mwakuyeruzgiyapu, wachikamba za “mbereri,” Yesu wangukamba vinthu vo munthu weyosi wangachita cha. Iyu wanguti: “Nditizipaska umoyu wamuyaya.” (Yohane 10:28) Ayuda anguyitoliyaku kanthu cha fundu yo Yesu wangukamba mwambula kubisa yakuti iyu wakupaskika nthazi ndi Awisi.

Pakukana mulandu waboza wo Ayuda amumbanga, Yesu wanguŵafumba kuti: “Kumbi mu Dangu linu [pa Sumu 82:6] mukulembeka cha kuti, ‘Ndingukamba kuti: “Ndimwi achiuta”’? Asani ŵanthu wo mazu ngaku Chiuta ngatiŵasuska wanguŵadana kuti ‘achiuta,’ . . . mbwenu yimwi mukamba ini ndamunthu wakuti Ada akunditowesa ndi kunditumiza pacharu chapasi kuti, ‘Unyoza Chiuta,’ chifukwa ndingukamba kuti, ‘Ndini Mwana waku Chiuta’?”—Yohane 10:34-36.

Asani Malemba ngakamba kuti ŵanthu ambula urunji wo alamuliya ‘mbachiuta,’ nanga ntchifukwa wuli Ayuda ambanga mulandu Yesu po wangukamba kuti “Ndini  Mwana waku Chiuta”? Yesu wangukamba fundu yinyaki yo yatingi yiŵawovyengi kuvwisa kuti iyu ndi Mwana waku Chiuta. Iyu wanguti: “Asani ntchitu zo ndichita za Ada cha, mbwenu lekani kundigomezga. Kweni asani ndizu ndichita, chinanga kuti mutindigomezga cha, gomezgani ntchitu zo, kuti muziŵi kweniso kuti mulutirizgi kuziŵa kuti Ada akoliyana nani, ndipu ini ndikoliyana ndi Ada.”—Yohane 10:37, 38.

Ayuda ŵati ŵavwa vo Yesu wangukamba, akhumbanga kumuko, kweni iyu wanguthaŵa so. Iyu wangutuwaku ku Yerusalemu ndipu wanguluta kusirya linyaki la Msinji wa Yorodani kumalu ngo Yohane wangwamba kubatiziya ŵanthu vyaka vinayi kuvuli. Mwambula kukayika, kwenuku kwenga kutali cha ndi kumwera, kukumaliya kwa Nyanja ya Galileya.

Ŵanthu anandi anguza kwaku Yesu ndipu akambanga kuti: “Yohane wanguchita chisimikizu chechosi cha, kweni vosi vo Yohane wangukamba vakukwaskana ndi munthu uyu, venga vauneneska.” (Yohane 10:41) Viwoneke limu kuti Ayuda anandi anguvwana mwaku Yesu.