KAPITE 81
ʼE Tahi Mo Te Tamai, Kaʼe ʼe Mole Ko Ia Te ʼAtua
-
“KO AU MO TE TAMAI ʼE MA TAHI”
-
ʼE FAKAFISI IA SESU ʼE KO IA TE ʼATUA
Neʼe haʼu ia Sesu ki Selusalemi ki te ʼAho Lahi ʼo Te Fakatapu (peʼe Hanuka). Neʼe ko he ʼaho lahi moʼo fakamanatuʼi te toe fakatapuʼi ʼo te fale lotu. Ia taʼu ʼe teau tupu ki muʼa atu, ko te Hau Silia ko Atioko 4 Epifano, neʼe ina laga he ʼaletale ʼi te fuga ʼaletale lahi ʼo te fale lotu ʼo te ʼAtua. Ki muli age, ko te ʼu foha ʼo he pelepitelo Sutea neʼe natou ʼohofi pea natou maʼu ia Selusalemi, ʼo natou toe fakatapuʼi te fale lotu. Talu mai ai, neʼe fai he fakamanatu ʼi te taʼu fuli ʼi te ʼaho 25 ʼo Kiseleve, ʼae ʼe fakaʼuhiga ki te fakaʼosi ʼo Novepeli pea mo te kamata ʼo Tesepeli.
Neʼe ko te temi momoko ʼaia. Neʼe haʼele ia Sesu ʼi te fale lotu ʼi te lalo ʼatu pou ʼo Salomone. Pea neʼe ʼa takai ia ia e te kau Sutea ʼo natou kole fenei age ki ai: “ ʼE ke fakaha mai anai koa ʼafea te moʼoni ʼo ʼuhiga mo koe? Kapau ko koe ia Kilisito, fakaha fakahagatonu mai.” (Soane 10:22-24) Neʼe kotea te tali ʼa Sesu? Neʼe ina tali fenei age: “Neʼe kua ʼosi au fakaha atu, kaʼe ʼe mole kotou tui.” Neʼe mole fakaha fakahagatonu age e Sesu kia natou ʼe ko ia ia Kilisito, ohage ko tana fakaha ki te fafine Samalitana ʼi te vai keli. (Soane 4:25, 26) Kaʼe neʼe ina fakaha age pe ko ai ia ia, ʼi tana ui fenei: “ ʼI muʼa ʼo te tupu ʼo Apalahamo, neʼe kua au maʼuli au.”—Soane 8:58.
Neʼe loto e Sesu ke mahino ia te hahaʼi ʼe ko ia ia Kilisito, ʼaki tanatou fakatatau ʼana gaue pea mo te ʼu gaue ʼae neʼe fakakikite ʼe tonu ke fai e Kilisito. Ko te tupuʼaga la ʼaia ʼo tana ui age ʼi ʼihi temi ki ʼana tisipulo, ke ʼaua naʼa natou fakaha ki he tahi ʼe ko ia te Mesia. Kaʼe neʼe ina ui fakahagatonu fenei leva ki te kau Sutea itaita ʼaia: “Ko te ʼu gaue ʼae ʼe au fai ʼi te huafa ʼo taku Tamai ʼe fakamoʼoni ʼo ʼuhiga mo au. Kaʼe ʼe mole kotou tui.”—Soane 10:25, 26.
He koʼe neʼe mole natou tui ʼe ko Sesu ia Kilisito? Neʼe ina ui fenei: “ ʼE mole kotou tui, koteʼuhi ʼe mole kotou kau ki ʼaku ovi. ʼE fakalogo ʼaku ovi ki toku leʼo, pea ʼe au iloʼi natou, pea ʼe natou mulimuli ia te au. ʼE au foaki kia natou te maʼuli heʼe gata, pea ʼe mole natou mamate anai ʼi he temi, pea ʼe mole faʼao anai natou e he tahi mai toku nima. ʼE maʼuhiga ʼaupito ia natou ʼae neʼe foaki mai e taku Tamai.” Pea neʼe fakaha age leva e Sesu kia natou tana felogoʼi lelei ʼae mo tana Tamai, ʼi tana ui fenei: “Ko au mo te Tamai ʼe ma tahi.” (Soane 10:26-30) Neʼe nofo Sesu ʼi te kele kaʼe nofo tana Tamai ʼi selo, koia neʼe mole feala ke ina ui ʼe ko ia mo tana Tamai ʼe ko he foʼi tokotahi. Kaʼe neʼe ina fakaha ʼe tatau tanā fakatuʼutuʼu pea ʼe nā logo tahi.
Neʼe iita kovi ai te kau Sutea pea neʼe natou toe toʼo ai ni maka ke natou matehi ia ia. Kaʼe neʼe mole mataku ia Sesu. Neʼe ina ui fenei: “Neʼe au fakaha atu te ʼatu gaue lelei mai te Tamai. Pea ʼe ko te gaue fea ʼi te ʼu gaue ʼaia ʼe kotou taumakaʼi ai au?” Neʼe natou tali fenei age: “ ʼE mole matou taumakaʼi koe ʼuhi ko he gaue lelei, kaʼe ʼuhi ko tau pauʼu. Koteʼuhi . . . ʼe ke ui ko koe ko he ʼatua.” (Soane 10:31-33) Neʼe mole he temi neʼe ui ai e Sesu ʼe ko ia ko he ʼatua. He koʼe leva neʼe natou fai te tukugakovi ʼaia?
Neʼe tui te kau Sutea ko te ʼAtua tokotahi pe ʼae ʼe ina maʼu te ʼu malohi ʼae neʼe ui e Sesu ʼe ina maʼu. Ohage la, neʼe ui fenei e Sesu ʼo ʼuhiga mo te ʼu “ovi”: “ ʼE au foaki kia natou te maʼuli heʼe gata,” pea ʼe ko he meʼa ʼe mole feala ke fai e he tagata. (Soane 10:28) Kaʼe neʼe galo ki te kau Sutea neʼe fakaha lelei e Sesu neʼe ina maʼu tona malohi mai tana Tamai.
Neʼe fakaha e Sesu te hala ʼo tanatou tukugakovi, ʼo ina fehuʼi fenei age kia natou: “ ʼE mole tohi koa la ʼi takotou Lao [ia Pesalemo 82:6], ‘neʼe au ui fenei: “ ʼE ko koutou ko ni ʼatua” ’? Neʼe ina fakahigoaʼi ‘ ʼatua’ ia natou ʼae neʼe fakafeagai ki ai te folafola ʼa te ʼAtua . . . Kapau koia, he koʼe ʼe kotou ui mai kia au ʼae neʼe fakamaʼoniʼoniʼi e te Tamai pea mo fekauʼi mai ki te malamanei, ‘ ʼE ke pauʼu,’ he neʼe au ui fenei: ‘Ko au te ʼAlo ʼo te ʼAtua’?”—Soane 10:34-36.
ʼEi, ʼi te Tohi-Tapu, maʼia mo te kau tuʼi fakamau heʼe faitotonu ʼe fakahigoaʼi natou ko ni “ ʼatua.” Koia, he koʼe neʼe valoki e te kau Sutea ʼaia ia Sesu ʼi tana ui fenei: “Ko au te ʼAlo ʼo te ʼAtua”? Neʼe ina fakaha he manatu neʼe tonu ke natou liliu ai ʼo tui kia te ia. Neʼe ina ui fenei: “Kapau ʼe mole au fai te ʼu gaue ʼo taku Tamai, ʼaua naʼa kotou tui mai kia au. Kaʼe kapau ʼe au fai te ʼu gaue ʼaia, tatau aipe pe ʼe mole kotou tui mai kia au, kaʼe kotou tui ki te ʼu gaue, Soane 10:37, 38.
ke feala hakotou iloʼi pea mo haga tui ʼe fakatahi te Tamai mo au pea ʼe au fakatahi mo te Tamai.”—ʼI tanatou logo ki ʼana palalau, neʼe faigaʼi e te kau Sutea ke natou puke ia Sesu, kaʼe neʼe toe hola ia. Neʼe mavae ʼi Selusalemi, ʼo fakalaka ʼi te Vai Tafe ʼo Solotane pea neʼe alu ki te koga meʼa ʼae neʼe kamata faipapitema ai ia Soane, kua hili ki ai teitei taʼu ʼe fa. Neʼe lagi mole faʼa mamaʼo te koga meʼa ʼaia mo te potu saute ʼo te Tai ʼo Kalilea.
Neʼe tokolahi te hahaʼi ʼae neʼe ʼomai kia Sesu, pea neʼe natou ui fenei: “Neʼe mole fakahoko e Soane he milakulo, kaʼe neʼe moʼoni te ʼu meʼa fuli ʼae neʼe ui e Soane ʼo ʼuhiga mo te tagata ʼaeni.” (Soane 10:41) Koia, neʼe tokolahi te kau Sutea ʼae neʼe natou tui kia Sesu.