Jesuseʼ tsʼoʼok u taal Jerusalén utiaʼal u kʼiinbesajil úuchik u kʼuʼubul le templooʼ. Kex cien años paachileʼ, Antíoco IV Epífanes, u reyil Siriaeʼ, tu beetaj junpʼéel altar yóokʼol u nojoch altar Dios yaan teʼ templooʼ. Ka máan kʼiineʼ u paalal juntúul sacerdote judíoeʼ tu jel utskíintoʼob Jerusalén ka tu jel kʼuboʼob le templo tiʼ Jéeobaoʼ. Desde teʼ kʼiinoʼob jeʼeloʼ ku beetaʼal le kʼiinbesaj cada 25 tiʼ Kislevoʼ, le mesaʼ ku káajal tu jóokʼbal noviembre yéetel ku tsʼoʼokol tu yookbal diciembre.

Lelaʼ u kʼiiniloʼob keʼel. Jesuseʼ táan u xíimbal teʼ templo ichil u columnaʼob Salomonoʼ. Le judíoʼob túunoʼ tu baʼpachtoʼobeʼ ka joʼopʼ u yaʼalikoʼobtiʼ: «¿Tak baʼax kʼiin ken a waʼaltoʼon jach máaxech? Wa teech le Cristooʼ, juntaatsʼ ka a waʼaltoʼon» (Juan 10:22-24). Jesuseʼ tu núukajtiʼob: «Tsʼoʼok in waʼalikteʼex, baʼaleʼ maʼ ta creertikeʼex». Jesuseʼ maʼ u jach aʼaltiʼob wa letiʼ le Cristo, jeʼex úuchik u yaʼalik tiʼ le koʼolel samariaileʼ (Juan 4:25, 26). Baʼaleʼ letiʼeʼ tsʼoʼok u yaʼaliktiʼob tuʼux u taal, tumen tu yaʼalajtiʼob: «Táanil tiʼ u síijil Abrahaneʼ, teneʼ tsʼokaʼaniliʼ in wantaleʼ» (Juan 8:58).

Jesuseʼ u kʼáat ka tsʼaʼabak cuenta letiʼ le Cristo yoʼolal le baʼaxoʼob ku beetkoʼ. Le oʼolal yaʼab u téenel tu yaʼalaj tiʼ u disipuloʼob maʼ u yaʼalikoʼob tiʼ mix máak wa letiʼ le Mesíasoʼ. Baʼaleʼ beoraaʼ letiʼeʼ tu yaʼalaj tiʼ le j-kʼasaʼan judíoʼoboʼ: «Le baʼaxoʼob kin beetik tu kʼaabaʼ in Taataoʼ ku jaajkúuntikoʼob jach máaxen. Baʼaleʼ teʼexeʼ maʼ ta creertikeʼex» (Juan 10:25, 26).

¿Baʼaxten letiʼobeʼ maʼ tu creertikoʼob wa Jesuseʼ letiʼe Cristooʼ? Jesuseʼ tu yaʼalaj: «Teʼexeʼ maʼ ta creertikeʼex tumen maʼ in walakʼ tamaneʼexiʼ. In walakʼ tamanoʼobeʼ ku yuʼubikoʼob in tʼaan, teneʼ in kʼaj óoloʼob yéetel ku taaloʼob tin paach. Teen túuneʼ yaan in tsʼáaik kuxtal minaʼan u xuul tiʼob, yéetel mix bikʼin kun xuʼulsbiltiʼob, tsʼoʼoleʼ mix máak kun tokikoʼob tin kʼab. Le baʼax tsʼoʼok u tsʼáaikten in Taataoʼ maas nojoch tiʼ u maasil baʼaloʼoboʼ». Jesuseʼ tu yaʼalajtiʼob bix yanil yéetel u Taata, tu yaʼalajtiʼob: «Teen yéetel le Taataoʼ juntúuliliʼon» (Juan 10:26-30). Jesuseʼ tiaʼan way Luʼumeʼ, u Taataeʼ tiaʼan teʼ kaʼanoʼ, le oʼolal maʼ táan u yaʼalik wa jach juntúuliliʼ yéetel u Taataiʼ. Baʼaxeʼ tu yaʼaleʼ juntúuliliʼob tumen junpʼéeliliʼ bix u tuukuloʼob.

Le baʼaxoʼob tu yaʼalaj Jesusoʼ tu beetaj u kʼuuxil le judíoʼoboʼ, ka tu kaʼa chʼaʼajoʼob tuunich utiaʼal u muruxtuntikoʼob. Baʼaleʼ Jesuseʼ maʼ sajakchajiʼ. Tu yaʼalajtiʼob: «Yaʼab baʼaloʼob maʼalobtak ku taal tiʼ le Taata tin weʼesajteʼexoʼ. ¿Yoʼolal máakalmáak tiʼ le baʼaloʼob ken a muruxtunteneʼexaʼ?». Letiʼobeʼ tu yaʼaloʼob: «Maʼ tu yoʼolal junpʼéel baʼal maʼalob ken k-muruxtuntechiʼ, baʼaxeʼ tumen táan a pochʼik Dios, tumen techeʼ kex chéen wíinikecheʼ táan a taaskaba juntúul dios» (Juan 10:31-33). Jesuseʼ mix juntéen tu yaʼalaj wa Dios, le oʼolal ¿baʼaxten túun tu yaʼaloʼobtiʼ lelaʼ?

Jesuseʼ táan u yaʼalik yaan poder tiʼ ku tuklik le judíoʼob chéen tiʼ Dios unaj u yantaloʼ. Jeʼex le ka tu yaʼalaj tiʼ le tamanoʼoboʼ: «Teen túuneʼ yaan in tsʼáaik kuxtal minaʼan u xuul tiʼob», lelaʼ junpʼéel baʼal maʼ tu páajtal u beetaʼal chéen tumen wíinik (Juan 10:28). Le judíoʼoboʼ maʼ táan u chʼaʼikoʼob en cuentail Jesuseʼ táan u yaʼalik u Taata tsʼáa Poder tiʼ.

Jesuseʼ tu yaʼalaj utiaʼal u yeʼesik maʼ jaaj le baʼax ku yaʼalikoʼoboʼ: «¿Maʼ wa tsʼíibtaʼan teʼ Ley [tu libroil Salmo 82:6] yaanteʼexoʼ: ‹Teneʼ tin waʼalaj: «Teʼexeʼ dioseʼex»›? Dioseʼ tu yaʼalaj ‹diosoʼob› tak tiʼ le máaxoʼob kʼeʼeyoʼob teʼ Kiliʼich Tsʼíiboʼ, tsʼoʼoleʼ le Kiliʼich Tsʼíiboʼ maʼ tu páajtal u mixbaʼalkúuntaʼal. ¿Baʼaxten túun ka waʼalikeʼex  tiʼ teen, máax kiliʼichkúuntaʼanen yéetel túuxtaʼanen way yóokʼol kaab tumen le Taataoʼ: ‹Táan a pochʼik Dios›, tumen tin waʼalaj u Paalen Dios?» (Juan 10:34-36).

Le Kiliʼich Tsʼíiboʼoboʼ ku yaʼalik «dios» tak le kʼeban máakoʼoboʼ. Le oʼolal ¿baʼaxten ku kʼuuxil le judíoʼob ikil u yaʼalik Jesús letiʼeʼ ‹u Paal Dios›? Letiʼeʼ tu yaʼalaj junpʼéel baʼal unaj u yáantkoʼob u creertoʼob: «Wa maʼ tin beetik le baʼaxoʼob uts tu tʼaan in Taataoʼ maʼ a creertikeneʼex. Baʼaleʼ wa kin beetkeʼ, kex maʼ a creertikeneʼexeʼ, creerteʼex le baʼaxoʼob kin beetkoʼ utiaʼal ka a wojéelteʼex yéetel ka pʼáatak ta tuukuleʼexeʼ, le Taataoʼ junmúuchʼ yanil tin wéetel, teen xaneʼ junmúuchʼ yanilen yéetel le Taataoʼ» (Juan 10:37, 38).

Le judíoʼob túunoʼ tu yóotoʼob u machoʼob Jesús tu kaʼatéen, baʼaleʼ kaʼa púutsʼtiʼob. Letiʼeʼ lukʼ Jerusaleneʼ ka bin tu jáal u áalkab jaʼil Jordán, le tuʼux ku tsʼaa okjaʼ Juan kex cuatro años paachiloʼ. Maʼ xaaneʼ lelaʼ maʼ náach tiʼ u noojol u kʼáaʼnáabil Galileaiʼ.

Le máakoʼoboʼ taaloʼob yiknal Jesuseʼ ka joʼopʼ u yaʼalikoʼob: «U jaajileʼ, Juaneʼ maʼ tu beetaj mix junpʼéel milagroiʼ, baʼaleʼ jach jaaj tuláakal le baʼaxoʼob tu yaʼalaj yoʼolal le máakaʼ» (Juan 10:41). Bey túunoʼ yaʼab tiʼ le judíoʼoboʼ tu tsʼáaj u fejoʼob tiʼ Jesús.