Yesu ya tsɔɔ ní ngɛ Yudea kɛ Yerusalem nɛ e tsa hiɔtsɛmɛ hulɔ. Lɔ ɔ se ɔ, e ho Yordan Pa a se ya ngɛ Perea kpokpa a nɔ. E ya tsɔɔ ní ngɛ lejɛ ɔ, se e be kɛe nɛ e maa kpale kɛ ya Yerusalem ekohu.

Benɛ Yesu ngɛ Perea a, nyumu ko bi lɛ ke: “Nyɔmtsɛ, anɛ nihi bɔɔ pɛ a yi wami nɛ a ma he lo?” Eko ɔ, nyumu ɔ le kaa jami hɛ mi nyɛɛli ɔmɛ jeɔ atsinyɛ ngɛ nihi abɔ nɛ a ma he a yi wami ɔ he. Ni komɛ deɔ ke a ma he nihi fuu a yi wami, nɛ ni komɛ hu ke nihi bɔɔ pɛ nɛ a ma he a yi wami. Se Yesu tsɔɔ we nimli abɔ nɛ a ma he a yi wami, mohu ɔ, e tsɔɔ nɔ́ nɛ e sa kaa nihi nɛ a pee konɛ a he a yi wami. Yesu ha heto ke: “Nyɛɛ bɔ mɔde nɛ nyɛɛ sɛ agbo tokofii ɔ mi.” Ngɛ anɔkuale mi ɔ, e biɔ mɔde bɔmi, kɛ hɛ mi miami loko nɔ ko ma nyɛ maa pee jã. Mɛni he je? Yesu tsɔɔ mi ke: “Ejakaa, i ngɛ nyɛ dee ke, nihi babauu ma hla kaa a sɛ mi, se a be nyɛe.”​​—Luka 13:23, 24.

Yesu de nɔ́ ko nɛ maa ye bua mɛ konɛ a na bɔ nɛ e sa nɛ a wlua a he ha a. E de mɛ ke: ‘Be ma nɛ wetsɛ ɔ maa te si, nɛ e ma nga sinya a. Kɛkɛ ɔ, benɛ nyɛ daa si ngɛ we ɔ se ɔ, nyɛ ma bɔni sinya a simi. Nyɛ ma de ke, “Nyɔmtsɛ, bli wɔ oo, bli wɔ!” Se e ma he nɔ ke, “I li he nɛ nyɛ je!” Nyɛɛ je ye nɔ, nyɛ nɛ nyɛ peeɔ ní yayamihi!’​​—Luka 13:25-27.

Enɛ ɔ tsɔɔ nɔ́ nɛ maa ba nihi nɛ a maa kpɛ se kɛ ya ngɛ be nɛ a suɔ mi ɔ a nɔ. A ma ya na kaa a fɔ sinya a mi momo. Jinɛ e sa nɛ a ko ya mla ke jã a peemi be mɛ dae po. Jã a ji bɔ nɛ e ba ngɛ nihi fuu nɛ jinɛ a ko ná Yesu ní tsɔɔmi ɔ he se ɔ a blɔ fa mi. A kua he blɔ nɛ a ná kaa a kɛ anɔkuale jami maa pee nɔ́ titli ngɛ a si himi mi ɔ. Nihi nɛ Mawu tsɔ Yesu kɛ ya a ngɔ ɔ kplɛɛ we blɔ nya nɛ Mawu to nɛ e kɛ ma he a yi wami ɔ nɔ. Yesu tsɔɔ kaa ke a tsi nihi nɛ a kpɛ se ɔ blɔ ɔ, a ‘maa wo yana, nɛ a ma kpe a lungu nya.’ Se kɛ̃ ɔ, “nihi maa je beleku, kɛ bonyoku, kɛ omleyi, kɛ leneyi kɛ ba,” nɛ tsɔɔ kaa nihi babauu maa je je kɛ wɛ, nɛ “a ma ba ye ní ngɛ Mawu matsɛ yemi ɔ mi.”​​—Luka 13:28, 29.

Yesu ya nɔ nɛ e de ke: “Nihi nɛ kpɛ se amlɔ nɛ ɔ [ma je li kɛ Yuda bi nɛ a bui mɛ ɔ] maa pee kekletsɛmɛ, nɛ ni nɛmɛ nɛ ye kekle blɔ he amlɔ nɛ ɔ [kaa Yuda bi nɛ a buu mɛ wawɛɛ nɛ a fĩaa kaa a ji Abraham bimɛ ɔ] maa pe sekpɛtsɛmɛ.” (Luka 13:30) ‘Se nɛ a kpɛ’ ɔ tsɔɔ kaa a be Mawu Matsɛ Yemi ɔ mi sɛe, ejakaa nɔ́ mwɔɛ a hɛ.

Farisi bi komɛ ba wo Yesu tue nɔ ke: “Jee hiɛ ɔ nɛ o ho; ejakaa Herode [Antipa] ngɛ mo hlae nɛ e gbe.” E ma nyɛ maa ba kaa Matsɛ Herode de nɔ́ ko kaa jã konɛ e kɛ wo Yesu he gbeye nɛ e je kpɔ ɔ mi. Eko ɔ, Herode sume kaa e maa kpale ye gbalɔ ko muɔ he fɔ kaa bɔ nɛ e ye Yohane Nɔ Baptisilɔ ɔ muɔ he fɔ ɔ. Se Yesu de Farisi bi ɔmɛ  ke: “Nyɛɛ ya nɛ nyɛ ya de jamɛ a kɔkɔbo ɔ ke, ‘I ngɛ mumi yayamihi hiae, nɛ i ngɛ nihi tsae mwɔnɛ ɔ kɛ hwɔɔ, nɛ ligbi etɛne ɔ, ma gbe ye ní tsumi ɔ nya.’” (Luka 13:31, 32) Eko ɔ, bɔ nɛ kɔkɔbohi peeɔ a ní ha kɛ sisiɔ lohwe kpahi ɔ he je nɛ Yesu tsɛ Herode ke “kɔkɔbo” ɔ nɛ. Se Yesu be blɔ ngmɛe nɛ Herode loo nɔ kpa ko nɛ sisi lɛ loo e wo e he gbeye nɛ e je kpɔ ɔ mi. E sa nɛ e gbe ní tsumi nɛ e Tsɛ ɔ kɛ wo e dɛ ɔ nya ngɛ be nɛ Mawu to ɔ nya, se pi kaa bɔ nɛ adesa suɔ.

Yesu tsa blɔ nɛ e hia kɛ yaa Yerusalem ɔ nɔ, ejakaa kaa bɔ nɛ e de ɔ, “e sɛ kaa a gbeɔ gbalɔ ngɛ he kpa ko kaa ja Yerusalem.” (Luka 13:33) Gbami ko be Baiblo ɔ mi nɛ tsɔɔ kaa e sa nɛ Mesia a nɛ gbo ngɛ Yerusalem. Lɛɛ mɛni he je mɔ nɛ Yesu de kaa e sa nɛ a gbe lɛ ngɛ lejɛ ɔ? Ejakaa Yerusalem ji Yuda bi ɔmɛ a ma ngua, nɛ lejɛ ɔ nɛ kojomi he ngua nɛ ji Sanhedrin ɔ kɛ e mi kojoli 71 ɔ a ngɛ. Ke a po nɔ ko nya kaa e ji lakpa gbalɔ ɔ, lejɛ ɔ nɛ a yeɔ e sane ngɛ. Jehanɛ se hu ɔ, lejɛ ɔ nɔuu ji he nɛ a kɛ lohwehi sãa bɔ ngɛ. Enɛ ɔ he ɔ, Yesu le kaa e sɛ nɛ a gbe lɛ ngɛ ma kpa ko nɔ pe Yerusalem pɛ.

Yesu ya nɔ nɛ e de ke: “Yerusalem Yerusalem! O gbe gbali ɔmɛ, nɛ nihi nɛ a tsɔ mɛ o ngɔ ɔ, o fia mɛ tɛ! Hyɛ si abɔ nɛ i hla kaa ma bua o bimɛ ɔmɛ tsuo a nya kaa bɔ nɛ kungwɔ buaa e bimɛ a nya ngɔ woɔ e pɛli sisi; se nyɛ kplɛɛ we! Lɔ ɔ he ɔ, Mawu ma pee nyɛ ma a ma doku.” (Luka 13:34, 35) Akɛnɛ ma a kua Mawu Bi ɔ he je ɔ, e sa nɛ a gbla a tue!

Se loko Yesu maa su Yerusalem ɔ, Farisi no nɔkɔtɔma ko tsɛ lɛ ní yemi ngɛ Hejɔɔmi ligbi ko nɔ. Akɛnɛ nyumu ko nɛ e fuufuu ba lejɛ ɔ he je ɔ, nihi nɛ a fɔ mɛ nine ɔ ngɛ hyɛe kaa mɛni Yesu maa pee. Yesu bi Farisi bi ɔmɛ kɛ Mlaa tsɔɔli ɔmɛ ke: “Anɛ nyɛ mlaa a ngmɛɛ blɔ kaa a tsa nɔ Hejɔɔmi ligbi ɔ lo?”​​—Luka 14:3.

Nɔ ko nɔ ko ha we lɛ heto. Yesu tsa nyumu ɔ, nɛ e bi mɛ ke: “Ke nyɛ ti nɔ ko binyumu, loo e na ya nɔ vu mi Hejɔɔmi ligbi ɔ, anɛ e be lɛ jee ngɛ vu ɔ mi amlɔ nɔuu lo?” (Luka 14:5) Se sane nɛ ɔ Yesu bi mɛ ɔ hu a nyɛ we nɛ a je nya.