Jesusajj Judeankiri Jerusalenankiri jaqenakaruw yatichäna, qollarakïna. Ukatjja Pereankir taqe uka markanakan yatichañatakiw Jordán Jawir pasäna. Qhepatjja, Jerusalenaruw kuttʼarakïna.

Jesusajj Pereankaskäna ukhajja, akham sasaw mä jaqejj jisktʼäna: “¿Tata, jukʼanirukit salvasini?” sasa. Religión pʼeqtʼirinakajja, waljaniti jan ukajj jukʼanikicha salvatapjjani uka toqetwa wal parlapjjäna, uka jaqejj uk yatpachänwa. Jesusajj qhawqhanis salvasipjjani uk sañat sipansa, maynejj kunsa salvasiñatakejj lurañapa ukwa qhanañchäna, akham sasa: “Kʼullkʼu punknam mantañatakejj walpun chʼamachasipjjam” sasa. Cheqansa maynejj uka punknam mantañatakejj wal chʼamachasiñapa. ¿Kunatsa? Jesusajj saskakïnwa: “Nayasti sapjjsmawa, waljaniw mantañ munapjjani, ukampis janiw mantapkaniti” sasa (Lucas 13:23, 24).

Kunatsa maynejj chʼamachasiñapa uk qhanañchañatakejj Jesusajj sänwa: “Utanejj sartasin punku sum llawintjjani ukhajja, anqäjjan saytʼataw jumanakajj uñjasipjjäta, akham sasaw punku leqʼepjjarakïta: ‘Tata, llawirapjjeta’ sasa. [...] Jupajj akham sapjjarakïtamwa: ‘Jumanakajj kawkitäpjjstajjaya, janiw nayajj yatkti. ¡Nayat jitheqtapjjeta, jan walinak lurir jaqenaka!’ sasa” (Lucas 13:25-27).

Uka uñachtʼäwejj qheptʼat purir jaqejj kuna jan walinsa uñjasispa ukwa amuytʼayistu. Uka jaqetakejj inas qheptʼat puriñajj walikïskchïna, ukampis purïna ukhajja punkojj llawintatäjjänwa. Chʼamäkchïnsa, janïräkipanwa puriniñapäna. Ukhamarakiw Jesusan yatichäwinakapatjja walja jaqenakajj sum yateqapjjaspäna. Ukampis jupanakatakejj janiw Diosar adorañajj nayrankkänti. Janirakiw jupanakajj Diosajj salvasiñatak yanaptʼkäna ukarus yäqapkänti. Ukatwa Jesusajj jupanakar akham säna: “Jumanakajj anqar jaqonukut uñjasipjjäta ukhajja, ukanwa jachapjjäta, laka chʼakhanaksa tʼurusipjjäta. Ukatsti jaqenakaw inti jalsu toqetsa, inti jalant toqetsa, alay toqetsa, aynach toqetsa jutapjjani, jupanakarakiw Diosan Reinopan mesan qontʼasipjjani” sasa (Lucas 13:28, 29).

Jesusajj saskakïnwa: “Khitinakatï qhepankapki ukanakatjja yaqhepajj nayrankapjjaniwa, [mä arunjja, jan judiöpki ukanakasa jiskʼachat judionakasa nayrankapjjaniwa], nayrankapki ukanakatsti yaqhepajj qhepankapjjarakiniwa [mä arunjja, Abrahamat jutirïpjjatapat jachʼa jachʼa tukuri judionakajj qhepankapjjaniwa]” sasa (Lucas 13:30). Jachʼa jachʼa tukurinakajj ‘qhepankapjjaniwa’ sasinjja, janiw Diosan Reinopar mantapkaniti sañwa munaskäna.

Ukatjja yaqhep fariseonakajj Jesusar akham sapjjänwa: “Akat mistusin sarjjam, [Herodes Antipasaw] jiwayañ muntam” sasa. Inas Herodes pachpajj Jesusan sarjjañapataki ukham  parlchïna. Herodesajj ajjsarayaspachänwa, jupajj Bautisir Juanaruw jiwayäna, ukhamasti janiw yaqha profetar jiwayañ munkpachänti. Jesusasti fariseonakarojj akham sänwa: “Sarapjjam, uka qamaqerojj akham sanipjjam: ‘Jichhürumpi qharürumpejj demonionakwa nayajj alissuskäjja, usutanakwa qollarakëjja, ukampis jurpüruw ukanak lurañ tukuyaskäjja’ sasa” (Lucas 13:31, 32). Qamaqenakajj wal engañjañ yatipjje, ukatwa Jesusajj Herodesar ‘qamaqe’ sasin sispachäna. Jesusajj Awkipan munañaparjamaw taqe kunsa luräna, janiw Herodesan munañaparjamasa ni yaqha jaqenakan munañaparjamasa lurkänti.

Jesusajj Jerusalenar saraskakïnwa, ¿kunatsa? Jupajj sänwa: “Jerusalén anqäjjanjja janiw mä profetarojj jiwayasiñapäkiti” sasa (Lucas 13:33). Janiw kuna profecias Mesiasajj uka markanwa jiwani sasin siskänti, ukhamajj ¿kunatsa uka markan jiwañat parläna? Sanedrín sat jachʼa tribunalankir 71 jilïrinakajja, Jerusalén markankapjjänwa, ukanwa falso profetat juchañchatanakajj juzgatäpjjerïna. Uka markanrakwa sacrificionak loqtapjjerïna. Ukatwa Jesusajj ukham parlpachäna.

Jesusajj llakisiñatjja akham sänwa: “¡Jerusalén, Jerusalén, profetanakar jiwayir marka, juman ukar khitanit jaqenakar qalamp kʼupjir marka! ¡Qhawqha kutiw nayajj wawanakamar tantachañ munayätjja, kunjamtï wallpajj chhiwchhinakapar chheqa manqhapar jawsthapki ukhama! Jumanakasti janiw munapktati. Jumanakan templomjja Diosajj apanukuniwa” sasa (Lucas 13:34, 35). Uka markajj janiw Diosan Yoqapar istʼañ munkänti, ukhamajj ¡jan walinakanwa uñjasiñapäna!

Janïr Jesusajj Jerusalenar purkäna ukhajja, fariseonakat mä jilïriw sábado urun manqtʼasiñatak invittʼäna. Amparamp kayump pʼusuntat mä jaqew ukankarakïna, ukhamajj kunsa Jesusajj lurani ukwa invitadonakajj wal uñchʼukisipkäna. Jesusajj akham sasaw fariseonakarusa Ley sum uñtʼiri jaqenakarusa jisktʼäna: “¿Sábado urun qollañajj walikïskiti janicha?” sasa (Lucas 14:3).

Jupanakasti amukïpjjänwa. Uka jaqer qollasajja, Jesusajj akham sasaw sarakïna: “Jumanak taypit maynin wawapasa, jan ukajj toropasa sábado urun mä uma phujur jalantaspa ukhajja, ¿janit jupajj jankʼak wayskaspa?” sasa (Lucas 14:5). Jesusan ukham sum amuytʼayatapatjja, janirakiw kamsapkänsa.