Yésu a niiga, a mélés ki makon ma bôt i Yudéa ni Yérusalem. Nano, a nlel Lom Yordan inyu ke i niiga bôt bitison bi Péréa. Ndi a ga nom bé, i mbus ndék ngéda a ga témb i Yérusalem.

I Péréa, mut wada a mbat Yésu le: “A Lét, baa ndék bôt yon i nkôhna tohi?” Bebek mut nunu a nyi le yak baéga bibase ba mbéna kwel mu jam li. Ndi iloole a timbhe kunda yada, Yésu a ñunda jam mut a nlama boñ inyu kôhna tohi. A nkal le: “Boña biliya bi ngui inyu jubul i nwemel ntitigi.” Ñ, biliya bi ngui bi mbéda. Inyuki? Yésu a ntoñol le: “Inyule me nkal bé le ngandak y’a yéñ jôp, ndi b’a la bé.”​—Lukas 13:23, 24.

Inyu unda nseñ u yé i boñ biliya bi ngui, Yésu a nkal le: “I ngéda nwet ndap a ntelep, a kwés likôga, n’a telep i mbégdé, ni koodege likôga, ni kalak le: ‘A Nwet, yible bés.’ . . . Ndi a’ kal bé le: ‘Me nyi bé me hee ni nlôl. Nyodna me ha, a bé bobasôna ba ni yé bagwelnson ba ngitelepsép!’”​—Lukas 13:25-27.

Hihéga hi, hi ñunda jam li mpémél mut a nsôk, ki le a ban-ga bé njom yo ki yo i sôk. A nkoba le ba nyip makôga. A lam-ga lo bisu bi ngéda to ibale hala a bé tééñga nye. Nlélém, ngandak i bé lama ôt nseñ ni biniigana bi Yésu. Ndi ba bi gwélél bé pôla i bi tina bo inyu boñ le bibégés bipubi bi yila jam li bisu i niñ yap. I bôt Yésu a bi lôl, libim ikété yap li bi tjél neebe njel Djob a bi kôôba inyu tohi yap. Yésu a nkal le ba ga ‘ee, ba je ki masoñ’ ngéda ba ga leñ bo mbégdé. Ñ, “i pes likôl ni i hiôñk, i ñombok ni i nwelmbok,” bôt ba biloñ gwobisôna ba ga “je i nlélém téblé i Ane Nyambe.”​—Lukas 13:28, 29.

Yésu a ntoñol: “Bahogi ba ba nsôk [kiki bet ba ta bé Lôk Yuda ni bôt ba Lôk Yuda ba ba nkôhna ndééñga] b’a ba bôt ba bisu, yak bape ba ba yé ba bisu [hala wee baéga bibase bi Lôk Yuda ni ngôk wap inyule ba yé ndaye i Abraham] b’a ba bôt ba nsôk.” (Lukas 13:30) Inyu bôt bana ba nyi bé ti mayéga, i ba “bôt ba nsok” i nkobla le ba ga jop yaga bé i Ane Djob.

Farisai ihogi i nlo tehe Yésu, i mbéhe nye le: “Pam, nyodi hana, inyule Hérôdé a nyéñ nol we.” Bebek Kiñe Hérôdé nyen a ntinde bôt i pot hala, inyu boñ le Yésu a nyodi mu libôga li. I nla ba le Hérôdé a nkon woñi le bôt ba ga ôm nye nsohi le a nyoñ ki ngaba i nyemb i mpôdôl numpe, nlélém kiki a boñ ni Yôhanes Nsôble. Ndi Yésu a ntimbhe Farisai le: “Kena, kala ndon i le: ‘Nun-ki! Me mpémés mimbuu mimbe, me mélés ki makon ma  bôt len ni yani, ndi i hilo hi nyônôs aa, m’a mélés bôlô yem.’” (Lukas 13:31, 32) Mu kiki Yésu a nsébél Hérôdé le “ndon,” a mpôdôl dipa i nuga i, i yé i bana. Ndi Yésu a nwas bé le Hérôdé tole mut numpe a kal nye jam a nlama boñ. A ga yônôs nson Isan a bi ti nye, inoñnaga ni ntjega u Djob, he u mut binam bé.

Yésu a nke ni bisu mu liké jé i Yérusalem, inyule inyu yé “mpôdôl a nlama bé nôla homa numpe, ndik i Yérusalem.” (Lukas 13:33) Mbañ i Bibel to yada i nkal bé le Mésia a nlama wél mu tison i, ndi inyuki Yésu a nkal le a ga nôla nyoo? Inyule Yérusalem a yé tison bisu, nyoo nyen Ntôñ bakéés bakeñi u yéne (tole Sanédriñ i i gwé 71 bakéés), nyoo ki nyen ba nkéés i bet bôt bape ba nhoñol le ba yé bapôdôl ba bitembee. Jam lipe li yé le nyoo nyen ba nti binuga i sesema. Inyu hala nyen Yésu a nhoñol le ba nlama bé nol nye homa numpe.

Ni njôghe i ñem, Yésu a nkal le: “A Yérusalem, a Yérusalem, we nu u nol bapôdôl, u ômôk ki ba ba ñôma i weeni ngok, ngélé yañen me bi yéñ kot bon boñ nlélém kiki ñin kôp u nkot bon bé isi bipapai gwé! Ndi u bi gwés bé hala. Nuna-ki! Ba mal tjiile bé ndap nan.” (Lukas 13:34, 35) Litén li ntjél hémle Man Djob, jon li nlama kôhna bikuu!

Ilole a mpam i Yérusalem, nkena wada mu ntôñ Farisai a naña nye i je i mbai yé. Di yé kel Sabat. I bet ba yé ha, ba mbéñge jam Yésu a ga boñ, inyule mut wada a yé ha, a gwé béba kon (ngim kon i i mboñ le nyuu i mbet, téntén makôô). Yésu a mbat Farisai ni bayimbén le: “Baa i yé kunde i mélés kon i kel Sabat tole hala a ta bé kunde?”​—Lukas 14:3.

Mut to wada a ntimbhe bé. Yésu a mbuubaha mut, i mbus a mbat bo le: “Njee ikété nan a’ pala bé pémés man wé tole nyaga yé ibale i nkwo ikété bee i kel Sabat?” (Lukas 14:5) Yak ha ki, mut to wada a ntimbhe bé Yésu.