Mangajari jala pamalumhon halak ma Jesus di Judea dohot di Jerusalem. Dungkon i laho ma ibana tu bariba ni Sunge Jordan laho mangajari di angka kota di distrik Perea. Dung i pintor mulak ma ibana tu Jerusalem.

Tingki di Perea Jesus, disungkun sahalak baoa ma ibana, “Tuan, ai holan saotik do na boi malua?” Diboto baoa i do, na marsoal angka pamimpin agama taringot tu sadia godang do na laho dipalua. Alai ndang olo Jesus mangalusi sungkun-sungkunna i. Dipaboa Jesus ma aha na ingkon diulahon asa boi malua. Didok ibana ma, “Bahen ma nasa gogom laho masuk sian pintu na sompit i.” Boasa ingkon marsitutu asa boi malua? Jesus mandok, “Godang do halak na naeng masuk tusi, alai ndang tarbahensa.”​—Lukas 13:23, 24.

Dipaboa Jesus ma tudosan na patuduhon boasa porlu marsitutu. Didok ma, “Tingki hehe nampunasa jabu jala dikunci pintu, jongjong ma hamu di luar jala tuktuhanmuna ma pintu i huhut mandok, ‘Tuan, bungka ma jo.’ . . . Alai alusanna ma hamu, ‘Ndang hutanda manang na ise hamu. Laho ma hamu sian lambungkon, hamu sude siula na jahat!’”—Lukas 13:25-27.

Leleng pe ro halak na di tudosan i, ala i do lomo ni rohana. Ingkon marsitutu ma nian ibana hatop ro, asa unang sanga ditutup jala dikunci pintu. Songon i ma na masa tu angka halak na so manjumolohon parale-aleon ni nasida tu Debata dohot na so olo manangihon ajaran ni Kristus. Aha ma na masa tu nasida? Jesus mandok, “Mangangguhi jala muruk situtu” ma nasida tingki disampathon tu luar. Nang pe songon i, “marroan ma angka halak sian timur dohot barat, jala sian utara dohot selatan”, manang sian saluhut bangso. “Rap mangan ma nasida di Harajaon ni Debata.”​—Lukas 13:28, 29.

Didok Jesus ma muse, “Adong do halak na parpudi [na so Jahudi dohot halak Jahudi na lea] gabe na parjolo jala adong do halak na parjolo [pamimpin agama Jahudi na ginjang roha ala pinompar ni si Abraham] gabe na parpudi.” (Lukas 13:30) Gabe “parpudi”, lapatanna ndang dohot nasida tu Harajaon ni Debata.

Dung i ro ma deba halak Parise mandapothon Jesus jala didok ma, “Kaluar jala laho ma ho sian on, ai naeng bunuon ni si Herodes do ho.” Olo do ra Raja Herodes na paboa-boahon barita i asa laho Jesus sian huta i. Ndang olo ibana didok na pamatehon angka panurirang, nang pe ibana do na pamatehon si Johannes Pandidi. Alai didok Jesus ma tu nasida, “Laho ma hamu jala dok ma tu si serigala i, ‘Sadari on dohot marsogot, palaohon suru-suruan na jahat jala pamalumhon angka na marsahit do ahu, alai di ari patoluhon marujung ma ulaonki.’” (Lukas 13:31, 32) Didok Jesus do si  Herodes “serigala”, ala licik ibana. Alai ndang mabiar Jesus tu si Herodes dohot tu manang ise pe. Diulahon ibana do tanggung jawab na nilehon ni Amana, mangihuthon tingki naung ditontuhon Debata.

Dung i, laho ma Jesus tu Jerusalem. Ai didok ibana do, “Na so tupa sahalak panurirang mate di luar ni Jerusalem.” (Lukas 13:33) Ndang adong disurathon di Bibel na ingkon di Jerusalem Messias mate. Alani i, boasa didok Jesus songon i? Ala huta na ringkot do Jerusalem, disi do 71 anggota ni Sanhedrin jala disi do angka panurirang na so tutu diuhumi. Na rumingkot, disi do angka binatang dipelehon. Alani i, diboto Jesus ma na ingkon disi do ibana dibunu.

Dung i, diandungi Jesus ma huta i jala didok ma, “Jerusalem, Jerusalem, dibunu ho do angka panurirang jala didangguri ho do halak na sinuru manopot ho. Nunga piga hali naeng hupapungu angka anakmu songon induk ni manuk na papunguhon angka anakna tu toru ni habongna, alai ndang olo hamu. Ida ma! Tadingkonon nama jabumuna.” (Lukas 13:34, 35) Ndang olo bangso i manangihon anak ni Debata, gabe diuhum Debata ma nasida!

Andorang so sahat ibana tu Jerusalem, ditogihon sahalak pamimpin ni halak Parise ma ibana mangan tu jabuna tingki ari Sabbat. Diparrohahon nasida ma, pamalumon ni Jesus do manang na ndang sahalak baoa na sigurbahon di tingki i. Disungkun Jesus ma tu halak Parise dohot tu siboto Patik, “Mangihuthon patik, boi do pamalumon na marsahit di ari Sabbat?”​—Lukas 14:3.

Ndang adong na mangalusi. Dungkon i dipamalum Jesus baoa i jala disungkun ma tu nasida, “Ise sian hamu, molo madabu anakna manang lombuna tu sumur di ari Sabbat na so pintor manogu i?” (Lukas 14:5) Alai ndang taralusi nasida be Jesus.