I nun nga Zezi o Zerizalɛmun lɔ’n, ɔ kannin Ɲanmiɛn ndɛ kleli sran mun, kpɛkun ɔ yoli be juejue. Ɔ yoli i sɔ’n wie Zide mɛn’n nun lɔ klɔ uflɛ wie’m be su ekun. I sin’n, ɔ kpɛli Zurdɛn nzue ba’n, ɔ ko kannin Ɲanmiɛn ndɛ’n klɔ nga be o Pere mɛn nun lɔ’n, be su. Kɛ ɔ cɛli kan’n, ɔ sɛli i sin Zerizalɛmun lɔ ekun.

Kɛ Zezi o Pere mɛn’n nun lɔ’n, bian kun usɛli i kɛ: “?E Min, sakpa naan be nga bé fíte nun’n, b’a sɔnman?” Atrɛkpa’n, bian sɔ’n si kɛ Zuifu’m be Ɲanmiɛn sulɛ wafa’m be su kpɛnngbɛn’m be si ndɛ sɔ’n su akplowa kpa. Wie’m be waan be nga bé fíte nun’n, be sɔnnin. Wie’m be waan b’a sɔnman. Zezi w’a tɛman bian’n su trele. Sanngɛ ɔ kannin like ng’ɔ fata kɛ sran kun yo naan w’a fite nun’n, i ndɛ. Ɔ seli kɛ: “Amun mian amun ɲin kpa sin anuan fii’n nun.” ?Ngue ti yɛ ɔ fata kɛ be mian be ɲin-ɔn? Zezi tɛli su kɛ: “Ń kán klé amun kɛ sran kpanngban bé wá kúnndɛ kɛ bé sín nun, sanngɛ be su kwlá sinman nun.”​—Liki 13:23, 24.

Zezi kannin ndɛ kun ɲanndra nun naan sran’m be wun i kɛ ɔ fata kɛ be mian be ɲin kpa. Ɔ seli kɛ: “Kɛ awlo’n i fuɛ’n wá jáso tó anuan’n nun’n, amún ká gua su lɔ amún bóbó anuan’n. Yɛ amún sé kɛ, ‘E Min, tike e anuan.’ [...] Sanngɛ ɔ́ sé amun kɛ, ‘An jaso min wun lɛ, amun mɔ amun yo sa ng’ɔ timan su’n. N siman amun finwlɛ!’”​—Liki 13:25-27.

Ndɛ sɔ’n nun’n, be kannin sa ng’ɔ juli bian kun su’n i ndɛ. Yɛle kɛ bian sɔ’n i ɲinfu w’a baman dɔ su. Yɛ kɛ ɔ́ bá’n, nn b’a ɲin anuan’n lalaa. Sɛ i li bɔbɔ dɔ su balɛ’n ti kekle mɛn i’n, sanngɛ ɔ fata kɛ ɔ bla dɔ su. I kunngba’n yɛle be nga be tili Zezi i nuan ndɛ’n be nun sunman be liɛ’n. I nun nga Zezi te o lɛ’n, sɛ ɔ ti kɛ be fali ndɛ ng’ɔ kannin’n su’n, nn be ɲannin su ye. Ɲanmiɛn sulɛ’n w’a yoman be cinnjin. Ɔ maan be nga Ɲanmiɛn sunmannin Zezi be sin’n, be nun sunman b’a yoman like nga Ɲanmiɛn kunndɛ kɛ be yo naan b’a ɲan be ti’n. Zezi waan bé wá kán be bo bé gúa be gua su lɔ. Lɔ yɛ ‘bé sún, bé dí be je’n niɔn.’ Kɛ ɔ́ yó sɔ’n, sran’m “bé fín wia afiliɛ nin wia atɔliɛ lɔ, ɔ nin mɛn’n i nglo lɔ lika’n nin i ngua lɔ lika’n nun bé bá,” yɛle kɛ bé fín mɛn wunmuan nun bé bá. Kpɛkun “bé wá trán tabli sin Ɲanmiɛn i Famiɛn diwlɛ’n nun lɔ.”​—Liki 13:28, 29.

Zezi seli ekun kɛ: “Be nga be ka siɛn’n [mɔ be yɛle be nga be timan Zuifu’n annzɛ be nga Zuifu’m be buman be sran’n], bé dún mmua, yɛ be nga be dun mmua’n, bé ká siɛn.” (Liki 13:30) Be nga be dun mmua’n, yɛle Zuifu’m be Ɲanmiɛn sulɛ wafa’m be su kpɛnngbɛn mɔ be fa Abraamun i anunman mɔ be ti’n, be di be nuan’n. Zezi seli kɛ i sɔfuɛ’m “bé ká siɛn.” Yɛle kɛ be su tranman Ɲanmiɛn i Famiɛn diwlɛ’n nun wie.

Farizifuɛ wie’m be wa wunnin Zezi i wun. Be seli i kɛ: “Jaso wa kɔ. Afin Erɔdu [Antipasi] kunndɛ kɛ ɔ́ kún wɔ.” Atrɛkpa’n, Famiɛn Erɔdu yɛ ɔ truli ndɛ sɔ’n niɔn. Ɔ yoli sɔ naan Zezi wanndi. Atrɛkpa’n, srɛ kun Erɔdu. Afin sɛ Zezi ka lɛ’n, ɔ cɛman naan i bɔbɔ Erɔdu i sa w’a tran Ɲanmiɛn i nuan ijɔfuɛ kun ekun  i kunlɛ’n nun. Afin i sa trannin Zan Batɛmun yofuɛ’n i kunlɛ’n nun. Sanngɛ Zezi seli Farizifuɛ’m be kɛ: “Amun ko se gblɛfuɛ tɛ sɔ’n kɛ, ‘Nian, n su fuan mmusu mun, yɛ ń yó sran’m be juejue andɛ nin ainman. Kpɛkun i le nsan su’n, ń wíe min junman’n i dí.’” (Liki 13:31, 32) Sa nga Erɔdu waan ɔ́ yó’n, w’a kunman Zezi i srɛ kaan sa. Asa ekun’n, sran uflɛ w’a kwlá wlɛmɛn i srɛ. Zezi dili i Si i junman’n kɛ ng’ɔ kleli i kɛ ɔ yo’n sa. W’a nianman sran ɲrun naan w’a di i junman’n.

I sin’n, Zezi fali Zerizalɛmun atin’n, afin ɔ seli kɛ: “Ɔ timan su kɛ be kun Ɲanmiɛn nuan ijɔfuɛ kun lika uflɛ, saan Zerizalɛmun lɔ.” (Liki 13:33) Biblu’n nun ndɛ fi seman kɛ saan Zerizalɛmun lɔ yɛ ɔ fata kɛ Mesi’n wu-ɔ. ?Yɛ nn, ngue ti yɛ Zezi seli kɛ lɔ yɛ bé kún i’n niɔn? Ɔ seli sɔ afin Izraɛli nvle’n i klɔ dan’n yɛle Zerizalɛmun. Lɔ kusu yɛ Zuifu’m be Jɔlɛ difuɛ dandan mun be tran be di jɔlɛ-ɔ. Be ti sran ableso-nin-kun (71). Asa ekun’n, sɛ sran kun se i wun kɛ ɔ ti Ɲanmiɛn nuan ijɔfuɛ naan sran’m be bu i kɛ ɔ ti ato’n, lɔ yɛ be di i jɔlɛ-ɔ. Asa kusu’n, lɔ yɛ sran’m be fa nnɛn’m be yi tɛ-ɔ. I kwlaa sɔ’n ti yɛ Zezi seli kɛ lɔ yɛ bé kún i’n niɔn.

Kɛ Zezi bú sa ng’ɔ́ wá tɔ́ Zerizalɛmunfuɛ’m be su’n i akunndan’n, ɔ seli kɛ: “Ɔo, Zerizalɛmunfuɛ mun, Zerizalɛmunfuɛ mun! Amun kun Ɲanmiɛn nuan ijɔfuɛ mun yɛ amun finfin be nga be sunman be amun sin’n be yɔbuɛ. Blɛ sunman nun’n, n kloli kpa kɛ ń yíayía amun kɛ akɔ ta kun yiɛyiɛ i mma kanngan mun i ndɛwa’m be bo’n sa! Sanngɛ amun a kplinman su. Amun nian! Amun sua’n w’a ka amun sa nun.” (Liki 13:34, 35) Zuifu’m b’a sɔman Ɲanmiɛn i Wa’n nun klanman. Ɔ maan bé wá ísɛ i bo nzuɛn’n.

Kwlaa naan Zezi w’a ju Zerizalɛmun’n, Farizifuɛ’m be su kpɛn kun yiɛli i awlo lɔ kɛ be ko di like. Cɛn sɔ’n ti Wunmiɛn-lolɛ-cɛn. Bian kun mɔ tukpacɛ wie ti’n w’a wlawla’n, ɔ o lɛ wie. Be nga be o sua’n nun lɛ’n, be niannin Zezi siin naan bé wún like ng’ɔ́ wá yó bian’n. Zezi usali be nga be si Mmla’n i kpa’n nin Farizifuɛ’m be kɛ: “?Sran kun le atin yo sran kun juejue Wunmiɛn-lolɛ-cɛn’n nun, annzɛ ɔ leman atin?”​—Liki 14:3.

Sran fi w’a kwlá tɛman su. Zezi yoli bian’n i juejue, kpɛkun ɔ usali be kɛ: “?Amun nun onin yɛ sɛ i wa yasua, annzɛ i nannin tɔ gbo kun nun Wunmiɛn-lolɛ-cɛn’n nun’n, ɔ su kaman lɛ yimɛn i-ɔ?” (Liki 14:5) B’a kwlá tɛman kosan sɔ’n su ekun.