Yésus a te ye’ele a saé fe bôt e Judée a Jérusalem. Éyoñe ji, a tyi’ilan Ôsoé Jourdain asu na a ke a ye’ele bitison bitisone ya Pérée. Ve, a mbeme fe bulan Jérusalem.

Nté Yésus a ne Pérée, môt a sili nye na: “A Tat, bôt be ayen ényiñ ya melu mese, ye be ne tyôtyoé?” Môt ate a yiane yem nsañeta’ane ô ne zañe betebe ôsu ya ñyebe a lat a abime bôte da ye nyiñ, ye abui bôt ye tyôtyoé bôt. A li’i kate nye abime bôte da ye nyiñ, Yésus a viane liti jôme ba yiane bo asu na be bi ényiñ. A jô na: “Tameka ke ve’elane nyiin ôfanefan mbé.” É ne fo’o été na, asu na be bi ényiñ, ba yiane ve nya ngulu. Amu jé? Yésus a ve éyalan a jô’ô na: “Amu me ajô mia na, bôt abui be aye kômbô nyiin, ve be aye bo te ngule ya nyiin.”​—Luc 13:23, 24.

Asu na a liti amu jé é ne mfi ya ve abui ngul, Yésus a jô na: “Éyoñ mie ndaa a kôlôya si a dip mbé, a mi ataté tebe atan a kut mbé, a jô na, A Tat, di’i bia mbé. . . . Wôna a ye jô na, Me ajô mia na, Me nji yem mfa’a mi aso; mia bese mi abo mam abé, kôla’ane valé.”​—Luc 13:25-27.

Éve’an éte ja liti été môt a tele éyoñ a so mvus (é to ke na, jam éziñ é nji be é bili nye) a koene na, mimbé mi nto mfetan. A te yiane kui awolo ja’a émien a nji kômbô ji’a so. Nalé fe, abui bôt é nga yiane bu’uban a Yésus nté a mbe valé na be nyoñe ñye’elane be nye. Be nji belan fan éte asu na be telé nya ékaña’a ôsu binyiñe biap. Abui bôte Yésus a te zu soé e nji kañese zene Zambe a te tak asu na be bi ényiñ. Yésus a jô na ba ye “yi a latane mesôñ” éyoñe ba ye wua be atan. Ve, bôte ba ye “so mfa’a jôp de atôô a mfa’a jôp de adim, a mfa’a ya nord a mfa’a ya sud,” ôwé, ba ye so meyoñe mese “a tabe si [Éjôé] Zambe.”​—Luc 13:28, 29.

Yésus a timine na: “Bôte bevo’o be ne mvus [ane bôte be nji bo Bejuif, a Bejuif ba biasé] be aye tebe ôsu, a ba be ne ôsu [Bejuif be ne betebe ôsu ya ñyebe, bôte ba bo éngeleze’e na be ne mvoñe bôt Abraham] be aye tebe mvus.” (Luc 13:30) Bifia ‘ba ye tebe mvus’ bia tinane na, bôte be ne bikala’a bete ba ye ke nyoñe ngap éziñ a Éjôé Zambe.

Ane Bepharisien béziñ ba zu bemene Yésus a jô nye na: “Kôlô’ô va, amu Hérode [Antipas] a kômbô wôé wo.” Éko éziñ, Hérode émien a te té foé éte asu na Yésus a tup, a kôlô nlame te. Hérode a yiane ko woñ ya beta be’e ajô éziñ a awu nkulu mejô mfe, fo’o v’ ane é nga boban a Jean Baptiste. Ve Yésus a yalane Bepharisien na: “Kela jôan nkemva’a te na: ô lôô ma vaa mimbia minsisim a ma saé bôt den a akiti; a e môse lale wo ye bo wu e mmanan  ésaé.” (Luc 13:31, 32, Mfefé Nkôñelan) Éyoñ a loene Hérode na “nkemva’a,” Yésus a yiane simesane fulu medu’an tit éte é bili. Ve, Hérode nge môte mfe a vo’o duk nge jo’otane Yésus nlô. A zu ke ôsu a bo ésaé Ésa wé ya yôp a te ve nye; a zu de bo ane nta’ane mame Zambe ô né, sa ke ane wu môta binam ô né.

Yésus a ke dulu dé ôsu mfa’a ya Jérusalem, amu, aval émien a jô, “be aye wôé nkulu mejô vôm mfe, ve Jérusalem.” (Luc 13:33) Teke nkulan ajô éziñ wo te liti na, Messie a yiane wu e tison ete, nde ñhe amu jé, Yésus a jô na nne a yiane wu wôé? Amu Jérusalem a ne teme teme tisone ya nlam ôte, vôme bibu’a 71 ya Sanhédrin bi ne, a vôm ba tyi’i bôte mejô (e bôte ba nyoñ ane bivuse bekulu mejô). A fe na, vôm ate nnye ba ve betit e metuna’a. Nde ñhe, e mise me Yésus, be vo’o wôé nye vôme mfe, ve vôm ate.

Yésus a tat a jô’ô na: “A bôte ya Jérusalem, a bôte ya Jérusalem, mi wô’ô wôé bekulu mejô, a lume bôt be azu mia minlômane mekok! Me nga yi kôane bone benan mekôan abui, ane nyia kup a kôane bone bé mefape si, mi ve ben! Tama yenan, nda jenan é li’iya momo.” (Luc 13:34, 35) Ayoñe te da bene Mone Zambe, amu nalé da yiane bi mekua amu mboan ôte!

Ôsusua na Yésus a kui Jérusalem, évete Bepharisien éziñ ja bañete nye nda jé na be ke di môse Sabbat. Bôte ba te bañete ba tu’a lôbô jame Yésus a zu bo asu môt éziñ a ne valé a kone hydropisie (ôkone môt a bi éyoñe mendim me ne nye nyul abui, biyoñe biziñ e mebo nge ke e mekul mebo). Yésus a sili Bepharisien a beye’ele Atiñe na: “Nge môt a saé môt môse [Sabbat], ye mvaé ye abé, a bo jé?”​—Luc 14:3.

Môt éziñ a nji ve éyalan. Yésus ve mane saé môte nyô, nde a beta sili na: “E mbé ya be mia, nge monafame wé nge nya’a jé ja ku anjeñ, a ye bo te dutu je môse Sabbat été été?” (Luc 14:5, Mfefé Nkôñelan) E valé fe, be nji bi éyalane be ne ve asu mbamba mfasane mame nyu.