Zezi in ansenny e geri bann dimoun Zide ek Zerizalenm. Apre i kontinyen son minister dan bann lavil enn apre lot dan distrik Pere, lot kote Larivyer Zourden. Me i pa pou pran bokou letan avan i retourn Zerizalenm.

Ler Zezi i Pere, en zonm i demann li: “Senyer, zis en ptigin dimoun ki pou ganny sove?” Petet sa zonm i konnen ki bann sef relizye i kontan fer bann deba konsernan si bokou oubyen zis en ptigin dimoun ki pou ganny sove. Zezi i sanz konversasyon e olye koz lo konbyen dimoun ki pou ganny sove, i koz lo sa ki en dimoun i bezwen fer pour ganny sove. I dir: “Fer bokou zefor pour antre par laport etrwat.” Sa i montre nou ki nou bezwen fer zefor, nou bezwen lite pour antre par laport etrwat. Akoz? Zezi i eksplike: “Mon dir zot, bokou pou esey antre me zot pa pou kapab.”​—Lik 13:23, 24.

Zezi i donn en legzanp pour montre akoz i enportan pour fer bokou zefor. I dir: “Kan met lakour i leve e tak laport, zot pou debout deor, tap laport e dir, ‘Senyer, ouver laport pour nou.’ . . . Me i pou dir zot, ‘Mon pa konnen lekel zot. Sorti la devan mwan, zot tou ki fer lemal!’”​—Lik 13:25-27.

Sa legzanp i montre sityasyon en dimoun ki’n vin an retar petet akoz i’n vin sa ler ki bon pour li. Me ler i arive, laport in fermen e take. I ti’n devret vin pli boner, menm si sa pa sa pli bon moman pour li. Sanmenm sa ki’n arive avek bokou dimoun ki ti’n kapab benefisye avek lansennyman Zezi. Zot pa’n sezi sa loportinite pour ki vre ladorasyon i vin en priorite dan zot lavi. Laplipar dimoun ki Zezi in ansennyen pa’n aksepte laranzman Bondye pour zot ganny sove. Zezi i dir ki zot pou “plere e grens zot ledan” ler zot ganny zet deor. Par kont, bann dimoun “sorti dan les ek was, nor ek sid,” setadir dan tou nasyon, “pou vin atab dan Rwayonm Bondye.”​—Lik 13:28, 29.

Zezi i eksplike: “Sa bann ki dernyen [setadir bann ki pa Zwif ek bann Zwif ki ganny konsidere bann dernyen dimoun] pou vin premye e bann ki premye [setadir bann sef relizye Zwif ki fyer akoz zot desandans Abraam] pou vin dernyen.” (Lik 13:30) Sa bann dimoun ki mank lapresyasyon pour keksoz spirityel pou vin “dernyen” dan sa sans ki zot pa pou antre dan Rwayonm Bondye ditou.

Apre sa, serten Farizyen i vin kot Zezi e konsey li: “Kit sa landrwa parski Erod [Antipas] i anvi touy ou.” Petet Lerwa Erod li menm ki’n konmans sa rimer pour esey fer Zezi kit sa landrwa. Kekfwa Erod i per ki dan en fason ou en lot i pou enplike dan lanmor en lot profet, parey  i ti leka avek lanmor Zan ki batize. Me Zezi i dir bann Farizyen: “Al dir sa renar, ‘Gete, mon pe sas demon e geri bann dimoun ozordi ek demen e trwazyenm zour, mon pou’n fini fer tou sa ki mon annan pour fer isi.’” (Lik 13:31, 32) Ler Zezi i kriy Erod “renar,” i posib ki i pe refer avek lefet ki bann renar i rize. Par kont, Zezi pa pou les Erod oubyen okenn lezot dimoun manipil li ouswa fer li kit sa landrwa vitman. I pou fer sa travay ki son Papa in donn li, dapre progranm Bondye, pa progranm zonm.

Zezi i kontiny son vwayaz ver Zerizalenm, parski parey i dir, “i pa kapab arive ki en profet i ganny met amor an deor Zerizalenm.” (Lik 13:33) Napa okenn profesi Labib ki dir ki Mesi i bezwen mor dan sa lavil, alor akoz Zezi i dir ki i pou ganny touye laba? Parski Zerizalenm i lavil prensipal. Se laba ki Sannedren i ete. Sannedren i lakour siprenm Zwif ki i annan 71 manm. Normalman, se sa lakour ki ziz bann dimoun ki’n ganny akize konman fo profet. Deplis, Zerizalenm i sa landrwa kot bann sakrifis zannimo i ganny ofer. Alor Zezi i realize ki i pa ti pou akseptab pour li ganny touye okenn lezot landrwa.

Zezi i osi dir: “Zerizalenm, Zerizalenm, lavil ki’n touy bann profet e ki’n saboul avek ros bann ki’n ganny anvoye kot li, konbyen fwa mon ti anvi rasanble ou bann zanfan parey en mer poul i rasanble son bann piti anba son lezel! Me zot pa ti oule. Gete! Zot lakaz pou ganny abandonnen.” (Lik 13:34, 35) Sa nasyon pe rezet Garson Bondye e zot pou bezwen pey konsekans zot aksyon!

Avan Zezi i ariv Zerizalenm, en sef bann Farizyen i envit li pour vin pran en repa kot li zour Saba. Bann dimoun ki’n ganny envite i vey tou sa ki Zezi pe fer pour gete si i pou geri en zonm ki annan en maladi ki fer delo akimile dan son lekor (souvandfwa dan lipye). Zezi i demann bann Farizyen ek bann eksper Lalwa: “Eski i kont lalwa pour geri en dimoun zour Saba?”​—Lik 14:3.

Personn pa reponn. Zezi i geri sa zonm e apre i demann zot: “Lekel parmi zot ki si son garson ouswa son toro i tonm dan en pwi zour Saba ki pa pou deswit tir li?” (Lik 14:5) Ankor enn fwa, zot pa kapab dir nanryen.