Hnei Iesu hna inin me aloine la itre atr e Iudra me Ierusalema. Thupene lai, nyidrëti a sasaithe jë la Hneopegejë Ioridrano, me hamë ini trootro ngöne la itre traone e Pere. Ngo easenyi hë matre bëeke jë nyidrë e Ierusalema.

Ame lo Iesu e Pere, hnyinge jë hi la ketre atr koi nyidrë ka hape: “Joxu, xalaithe hi la itre hna troa amelen?” Atre hi angeic ka hape, ketre hnyinge lai ka troa amejëne la isi ithanata thene la itre hene ne hmi. Angatr a pi atre ka hape, tro kö a ala nyimu la itre hna troa amelen. Ngo tha sa pi kö Iesu la hnyinge celë, nyidrëti pe a amamane la nyine kuca matre mel. Öni nyidrë: “Isine jë troa lö qa ngöne la qëhnelö ka ilitr.” Eje hi, nyipiewekë troa nue trengecatr. Hnauën? Öni Iesu: “Ala nyimu la itre ka ajane troa cili thenge, ngo tha ijiji angatre kö.”—Luka 13:23, 24.

Thupene lai, Iesu a hamëne pi la ketre ceitun nyine amamane la enyipiewekëne troa catr, öni nyidrë: “Tro hë la atrekë hnalapan a mejë, me kiine la qëhnelö, nge tro pë hë nyipunie a lapa qëhnelö, me fenafena, me hape, ‘Joxu, thawa pi koi hun.’ Ngo tro nyidrëti a sa ka hape: ‘Thatre kö ni ka hape, angetre kaa nyipunie.’ ”—Luka 13:25-27.

Kola qaja la ejolene la atr ka traqa hmitr—ma angeic a kuci mekun—ngo traqa ju hi angeic a öhne la qëhnelö a hna kiin. Ngacama tha aja i angeice kö, ngo tro angeic lo a isine troa canga traqa. Ceitune hi lai me itre atr laka, maine ju, tro hi angatr a nue Iesu troa ini angatr. Ngo tha hnei angatre kö hna amë panëne la nyipici. Nge ame pë hë lo angetre Iudra, hnei angatr hna xelene la iamele qaathei Akötresie. Matre öni Iesu, tro angatr “a treije me latresi” ke troa kuië angatr e trön. Nge tro pë hë a traqa “la itre atr qa koië me kuë, me kolopi me kolojë,” qa ngöne la nöjei nöj matre “ce xeni ngöne la Baselaia i Akötresie.”—Luka 13:28, 29.

Öni Iesu hmaca: “Tro hë la itre ka traqa pi [tune la itre atr ne la itre xa nöj, me angetre Iudra hna wangacon] a tro pa, nge tro la itre ka traqa pa, [itre hene ne hmi ka selëne laka, itre nekö i Aberahama angatr] a tro pi.” (Luka 13:30) Haawe, ame la kola hape, “traqa pi,” tre kola hape, luzi hë la Baselaia i Akötresie koi angatr.

Ame hnei itre Faresaio hna traqa koi Iesu me qaja ka hape: “Kötre pi qaa la, ke Herodra a thele troa humuthi nyipë.” Ma hnei Herodra Joxu hna sili ithanata matre tro Iesu a tro qa lai. Nge ma tha aja i Herodra kö troa nyi zö angeic la meci ne la ketre perofeta, tune lo ka traqa koi Ioane Bapataiso. Ngo öni Iesu koi itre Faresaio ka hape: “Qaja ju kowe lai kuli waele cili ka hape, ‘Dreng! Eni a helëne la itre dremoni, me aloine la itre trene mec enehila me elany,  nge tro ni a afenesine la huliwang ngöne la hnaakönine drai.’ ” (Luka 13:31, 32) Ame la Iesu a jele “kuli waele” Herodra, nyidrëti hi lai a qaja la aqane nyinyithina i angeic, tune la aqane ujë ne la kuli wael. Ngo pëkö atr ka atreine iaö Iesu. Haawe, tro kö nyidrëti a eatrën la aja ne la Kem i nyidrë, thenge la ijine hna sa hnei Iehova, ngo tha aja i atre kö.

Iesu hë a tro Ierusalema ke öni nyidrë, “tha hna aijijëne kö troa humuthe la ketre perofeta tröne Ierusalema.” (Luka 13:33) Pëkö hna perofetan ka hape, troa humuthe la Mesia ngöne la traone cili, matre hnauëne la Iesu a qaja kape, troa humuthi nyidrëti e Ierusalema? Pine laka, e cili hi e Ierusalema la Hnakootre Ka Tru, nge 71 la itre ka nyi atren, nge hnë troa amekötin la itre perofeta thoi. Ketre, e cili fe la hna troa huujëne la itre öni. Matre, xecie hnyawa koi Iesu laka, troa humuthi nyidrëti e cili.

Iesu a treije pi Ierusalema me hape: “Ierusalema, Ierusalema fe, atre humuthe lo itre perofeta, me trane lo itre hna upe koi eö, anyimua thele ni troa icasinekeune la itre nekö i eö, tune la ithine ne gutu a hajuhajum la ha nekön fene la lue hnaiape ne ej, ngo xele kö nyipunie. Hanawang! Ase hë nuetrije la uma i nyipunie.” (Luka 13:34, 35) Eje hi, kola xelene la Nekö i Akötresie hnene la nöj, nge tro kö angatr a xeni pun!

Qëmekene tro Iesu a tro Ierusalema, hna hë nyidrë hnene la ketre tane la itre Faresaio troa ce xen me nyidrë e Sabath. E cili fe la ketre trahmany hna tith hnei mec (ka cipa la iwaca me iwanakoim). Matre kola thupë Iesu hnei itre atr, nge angatr a mekune ka hape, tro jë kö nyidrëti a aloine la wezipo. Hnyinge jë hi Iesu koi itre Faresaio me itre ka inine la Wathebo ka hape: “Hapeu, meköti kö troa aloine la trene mec ngöne la drai Sabath, maine waea?”—Luka 14:3.

Pëkö ca meje i angatr. Iesu a aloine jë lai atr me hape: “Maine troa kei e hnine la hnaop la nekö i nyipunie maine kau pena e drai Sabath, hapeu, drei e nyipunie la ka tha tro kö a huli nyën qaa lai?” (Luka 14:5) Ngo pë pala hi meje i angatr.