Yezu ye mɔgɔw kalan ani a ye banabagatɔw kɛnɛya Zude mara la ani Zeruzalɛmu dugu la. O kɔ, a ye Zurudɛn baji cɛtigɛ ka Pere duguw yaala n’a be mɔgɔw kalan. Nka a tɛna mɛɛn ka kɔsegi Zeruzalɛmu.

Ka Yezu to Pere mara la, cɛɛ dɔ y’a ɲininga ko: “Matigi, mɔgɔ caaman tena kisi wa?” N’a sɔrɔ o cɛɛ b’a lɔn ko diinan kuntigiw be ɲɔgɔn sɔsɔ o koo la. Mɔgɔ daa min bena kisi, sanni Yezu k’o fɔ cɛɛ ye, a y’a fɔ mɔgɔ ka ɲi ka koo minw kɛ walisa ka kisi. A ko: “Aw ye jija ka don ni dafitini ye.” Tiɲɛn na, mɔgɔ ka ɲi ka jijali kɛ. Mun na do? Yezu y’o ɲɛfɔ ko: “Ne b’a fɔ aw ye ko mɔgɔ caaman bena cogo ɲini ka don, nga u tena se.”—Luka 13:23, 24.

Walisa k’a yira ko an ka kan ka jijaliba kɛ, Yezu ye ntalen dɔ la ko: “Ni sotigi wilila ka daa sɔgɔ tuma min na k’aw to kɛnɛma, aw ben’a daminɛ ka daa kɔkɔ k’a fɔ ko: ‘Matigi, daa yɛlɛ an ye.’ A bena aw jaabi ko a t’aw bɔyɔrɔ lɔn . . . , ko aw kojugukɛlaw bɛɛ ka bɔ n kɔrɔ.”—Luka 13:25-27.

Mɔgɔ min be to kɔ, ka n’a sɔrɔ daa sɔgɔra, o ntalen b’o tigi ka koo le yirala ten. N’a sɔrɔ o tigi y’a latigɛ ka na wagati min bɛnnin b’a ma. A tun ka ɲi ka na joona hali n’o tun bɛnnin tɛ a ma. Ka Yezu to u cɛma, mɔgɔ caaman tun be ni sababu ye k’a lamɛn. U tun bena se ka tiɲɛn batoli kɛ u ɲɛnako fɔlɔ ye. Nka u m’o kɛ. Yezu cira mɔgɔ minw ma do? Olu fanba banna Ala ka labɛn na, min tun bena u kisi. Yezu y’a fɔ ko tuma min na u bena fili kɛnɛma, ‘u na kasi k’u ɲinw ɲimi.’ A y’a fɔ tugun ko mɔgɔ dɔw bena na “ka bɔ kɔrɔn ni tilebin ani saheli ni worodugu yanfan fɛ,” o kɔrɔ, ka bɔ duniɲa faan bɛɛ la “ka u sigi dumuni la Ala ka masaya la.”—Luka 13:28, 29, ABM.

Yezu y’a ɲɛfɔ ko: “Kɔmɔgɔ dɔw [i n’a fɔ siya wɛrɛ mɔgɔw ni Yahutu diinan kuntigiw b’u ka siya mɔgɔ minw mafiɲɛya] bena kɛ ɲamɔgɔw ye, ɲamɔgɔ dɔw [diinan kuntigi minw be waso k’u ye Ibrayima bɔnsɔn ye] bena kɛ kɔmɔgɔw ye.” (Luka 13:30). U bena kɛ “kɔmɔgɔw” ye, o kɔrɔ ko o mɔgɔ waleɲumanlɔnbaliw tɛna don Ala ka Masaya la fewu.

Fariziɲɛ dɔw nana Yezu sɛgɛrɛ k’a fɔ a ye ko: “Taga yɔrɔ wɛrɛ ka yan bila, bari Erɔdi [Antipasi] b’a fɛ k’i faga.” N’a sɔrɔ masacɛ Erɔdi yɛrɛ lo ye mɔgɔw bila o kuma fɔli la walisa Yezu ka dugu bila. Zan Batizelikɛla sara Erɔdi sababu lo la. Sisan, n’a sɔrɔ a be siranna ko kira wɛrɛ kana na faga ani u kana na o saya la ale kun na cogo dɔ la. Nka Yezu y’a fɔ Fariziɲɛw ye ko: “Aw ka taga fɔ o namaramɔgɔ  nin ye ko ne be jinaw gwɛn ka bɔ mɔgɔw la, ka banabagatɔw kɛnɛya bii ni sini, ani a tile sabanan loon, ne bena tila n ka baara la.” (Luka 13:31, 32). Yezu kɛtɔ ka Erɔdi weele ko “namaramɔgɔ,” n’a sɔrɔ a be kumana a ka ceguya koo lo la. Mɔgɔ si, hali Erɔdi yɛrɛ tɛna se k’a yira Yezu la a ka ɲi ka min kɛ. A Faa ye cii min di a ma, a bena o dafa ka kɛɲɛ ni Ala ka wagati latigɛnin ye, adamaden si ta tɛ.

Yezu bele b’a ka tagama na walisa ka taga Zeruzalɛmu sabu, a yɛrɛ ka fɔta la, “a bɛnnin te kira ka faga yɔrɔ wɛrɛ Zeruzalɛmu kɔ.” (Luka 13:33). Bibulu ka kiraya kuma si t’a fɔ ko Masiya ka kan ka sa Zeruzalɛmu. Mun na Yezu do y’o fɔ? Zeruzalɛmu lo ye masadugu ye. Yahutuw ka kititigɛsoba n’a kititigɛla 71 nunu siginin be yen le. U ye minw jalaki k’u ye ngalon kiraw ye, olu ka kiti be tigɛ o yɔrɔ lo la fana. Ka fara o kan, bɛgɛn sarakaw be bɔ yen. O koo bɛɛ kama, Yezu b’a jati ko ale tɛ se ka faga yɔrɔ wɛrɛ Zeruzalɛmu kɔ.

Yezu dusu kasinin y’a fɔ ko: “Zeruzalɛmukaw, Zeruzalɛmukaw, aw minw be kiraw faga, ka Ala ka cidenw bon ni kabakuruw ye k’u faga, siɲɛ joli ne tun b’a fɛ k’aw lajɛn n kɔrɔ i n’a fɔ sisɛ b’a deenw lajɛn a gaman kɔrɔ cogo min na, nga aw ma sɔn! Ayiwa, aw ka boon lakolon bena to.” (Luka 13:34, 35). O cogo le la, o mɔgɔw banna Ala Dencɛ la. A nɔfɛkow fana tɛna taga k’u dan.

Sanni Yezu ka don Zeruzalɛmu dugu kɔnɔ, Fariziɲɛw kuntigi dɔ y’a weele ka taga dumuni kɛ a ka soo. Lafiɲɛlon lo ani cɛɛ dɔ be yen, farikolofunun bana b’a la. Mɔgɔ minw be yen, olu be kɔnɔni kɛra k’a filɛ Yezu bena min kɛ. Yezu ye Fariziɲɛw ni sariya karamɔgɔw ɲininga ko: “A daganin bɛ ka banabagatɔ kɛnɛya lafiɲɛlon na wa, walima a daganin tɛ?”—Luka 14:3.

U si m’a jaabi. Yezu ye cɛɛ kɛnɛya. O kɔ a y’u ɲininga ko: “Jɔn le be yan aw cɛma n’a dencɛ, walima a ka misi benna kɔlɔn kɔnɔ lafiɲɛlon na, n’a tena o bɔ joona?” (Luka 14:5). U si ma dɔ sɔrɔ k’a fɔ tugun k’o ɲiningali kabakoman jaabi.