Jesus udah ngajar sereta ngeraika orang ba Judea enggau Jerusalem. Udah nya iya mupuk ngagai seberai Sungai Jordan lalu berengkah ngajar ari nengeri siti ngagai nengeri siti ba Perea. Tang, enda lama udah nya, Jesus deka pulai baru ngagai Jerusalem.

Lebuh Jesus ba Perea, siku lelaki nanya iya: “Tuan, kati semina mimit aja orang ke deka diselamatka?” Lelaki nya engka munyi nya laban iya nemu kelikuh bala tuai pengarap pasal penyampau orang ke deka diselamatka. Taja pia Jesus enda terus nyaut lelaki nya tang iya nerangka utai ke patut digaga ngambika ulih diselamatka. Iya madah: “Bebendar meh tama nengah pintu ti sempit.” Nya alai, sesiku orang patut bebendar, taja pan enda senang. Nama kebuah? Laban Jesus madahka: “Mayuh orang deka nguji tama nengah pintu nya tang enda ulih mujur.”—Luke 13:23, 24.

Ngambika ulih nunjukka kebuah patut bebendar, Jesus madahka: “Pengudah orang ke bempu rumah ngunchi pintu, kita deka bediri ba luar lalu ngetuk pintu. Kita deka madahka, ‘Tuan, buka pintu tu ke kami.’ . . . Tang iya deka madah ngagai kita, ‘Aku enda nemu ari ni penatai kita. Rari ari aku, semua kita ke ngereja utai ti jai!’”—Luke 13:25-27.

Jaku sempama nya ngambarka orang ke datai laun laban nya maya ti sesuai ba iya. Taja pia lebuh iya datai, pintu udah dikunchi. Iya patut datai tumu agi, taja pan nya maya ti enda ngena ba iya. Tu meh utai ke nyadi ngagai mayuh orang Judah, laban sida tau bulih penguntung ari ajar Jesus maya iya agi bisi begulai enggau sida. Sida ngelepaska peluang ngenuluka sembah ti bendar dalam pengidup sida. Taja pan Jesus udah dikirumka nginjil ngagai orang Judah, tang mayuh ari sida enggai nerima peluang ke diberi Petara ngambika ulih diselamatka. Jesus madahka sida deka “nyabak sereta begerit ngeli” lebuh sida dibuai keluar. Tang orang ari semua bansa, ke datai “ari timur, barat, utara, enggau selatan deka duduk enggau makai ba Perintah Petara.”—Luke 13:28, 29.

Jesus nerangka: “Sekeda orang ke dudi [orang ke ukai bansa Judah sereta orang Judah ke dikemaruhka] deka nyadi dulu, lalu sekeda orang ke dulu [tuai pengarap orang Judah ti sumbung laban sida peturun Abraham] deka nyadi dudi.” (Luke 13:30) Nama reti sida deka nyadi “dudi”? Reti iya, sida ke enda beterima kasih tu nadai peluang nyadi sebagi ari Perintah Petara.

Sekeda orang Parisi datai ngagai Jesus lalu madah: “Mupuk nuan ari endur tu laban Herod [Antipas] deka munuh nuan.” Engka Raja Herod empu ke nabur cherita bula tu laban iya deka Jesus mupuk ari endur nya. Herod engka takut enggaika iya munuh Jesus baka iya ke kala munuh John Pemaptisa. Tang Jesus madah ngagai orang Parisi: “Alai, padah ngagai munsang  ke pintar nipu nya, ‘Seharitu enggau pagila, aku deka muru melikat ti jai sereta ngeraika orang ti sakit. Ba hari ketiga, pengawa aku deka tembu.’” (Luke 13:31, 32) Lebuh Jesus madahka Herod nya baka siku “munsang,” iya engka merujuk ngagai ulah munsang ke pintar amat nipu. Taja pia, Jesus enda nejuka Herod tauka orang bukai nipu iya. Jesus deka terus ngereja pengawa ke diberi, nitihka maya ti udah ditetapka Petara, ukai mensia.

Jesus neruska pejalai iya ngagai Jerusalem laban iya madah: “Siku nabi enda ulih dibunuh ba luar Jerusalem.” (Luke 13:33) Tang nadai jaku benabi ke madah Messiah mesti dibunuh ba Jerusalem. Nyadi, nama kebuah Jesus madahka iya deka dibunuh dia? Tu ketegal, Jerusalem nya indu nengeri alai 71 iku orang ari Raban Kunsil Orang Judah deka begelumu. Jerusalem mega endur alai orang ke dituduh nyadi nabi ti pelesu deka dipechara. Nambahka nya, pemeri jelu suah diserahka ba Jerusalem. Nya alai, Jesus nemu iya enda tau enda dibunuh ba Jerusalem.

Ku Jesus: “Jerusalem, Jerusalem, nuan munuh bala nabi lalu nuku orang ke dianjung ngagai nuan ngena batu. Aku suah bendar deka ngempuruka bala anak nuan baka indu manuk ke ngempuruka anak iya ba baruh sayap iya! Tang nuan enggai. Nya alai, Petara deka ninggalka rumah nuan!” (Luke 13:34, 35) Ketegal bansa Israel enggai nerima Anak Petara, sida mesti diukum!

Sebedau Jesus datai ba Jerusalem, siku ketuai orang Parisi mai iya makai ba rumah iya maya Hari Sabat. Orang ba dia bendar amat beratika Jesus laban ba dia bisi siku lelaki ke sakit. Lelaki nya merinsa ketegal sebengkah penyakit ke ngasuh tubuh iya kembai (penyakit nya ngasuh tubuh ngembuan kelalu mayuh ai). Nyadi Jesus nanya orang Parisi enggau sida ke landik pasal Adat: “Kati nya ngelanggar Adat enti kitai ngeraika orang maya Hari Sabat?”—Luke 14:3.

Tang sida enda bemunyi. Jesus lalu ngeraika lelaki nya, udah nya iya nanya sida: “Enti anak lelaki tauka sapi kita labuh ngagai telaga maya Hari Sabat, sapa entara kita ke enda beguai deka narit iya pansut?” (Luke 14:5) Sekali agi, sida enda tesautka iya laban utai ke dipadah iya masuk akal.